数数下，原来已经返咗5日工。已经冇知觉了，每日嘅忙碌，每日嘅庸碌...

      呢个星期应该又係得一日休息。星期六喺富力桃园会所有个活动，我哋行同省行都要参加。就连每人负责嘅部分已经选好，我负责零售部分。哈哈哈∼应该係行长觉得我吹得挂...

      每日返到屋企食下饭上下网就讲瞓觉，真係忙碌不知时日过。

      呢个星期唔知发生咩事，好多奇怪嘅人突然陆陆续续揾我。好似初中嘅某些人..高中嘅某些人...甚至大学嘅某些人..好诡异。至于某人嘅消息，好似离我千里万里了。虽然偶然会知道少少，但基本上不怎么上心了。

      今日搭车，突然谂到莎姊寻晚讲话自己有理想，虽然个理想我完全冇意见。但我都突然谂谂谂...我嘅理想又係咩呢∼咁啱经过嘉和苑，知道了!我嘅理想，就係喺嘉和苑买套复式，每日揸住部new mini返银行，每个月可以买几样gucci嘅嘢，得闲去下旅游咁...哈哈，向呢个理想进发。

      经过寻日嘅事，今日俾人打咗入冷宫。上午除咗入帐，就冇上柜了。

      起初觉得唔多舒服，绝对唔想再做落去。不过突然又觉得好轻松好舒服，所以接受了。中午开始就上柜，初初都冇咩大差错。中段时间，做咗笔汇款，个客写错收款人名，又写错金额，但我都冇发现到。直到亚丸帮我复核嘅时候先发现，原本只係认为好小事情，写过份单就搞掂嘅事情，又搞到要问行长，又打电话叫个客返嚟。

      点解每次我嘅错都俾人化大?!

      每次都好似要好多人帮我执手尾??真係觉得好委屈。自从做咗嘢之后，成日都有想喊嘅冲动。做咗嘢之后，压力好大。返到屋企都唔想讲嘢，屋企人又以为你好cool...成日都同亚妈嗌交...真係好烦。

      呢份工仲有必要继续做落去吗...未知。

      今日发生重大差错。好撞鬼∼

      个客明明要取2千现金，但我就鬼遮眼做咗存，仲俾咗个客2千蚊。亚树发现错误嘅时候，我都仲未识惊，不过后尾先知事态严重。通过帐号，查咗个客嘅电话，打到过去居然空号。冇奈之下，惟有上门揾人。亚树带住我，行完成条和平新村。终于不负有心人，俾我哋揾到个客。讲明原因之后，个客话2点倒再过银行办理。

      虽然佢态度唔多好，不过佢仲算有人性。如果唔係，嗰2千蚊就要我自己孭。

      经过呢次，终于知咩叫见过鬼好怕黑。

      个个都话我呢次好彩。但我觉得如果好彩，呢件事就唔应该发生喺我身上啦...不过点讲都好，呢次真係执返身彩啦。希望有后福有后福∼

      呢个星期返咗6日，反而唔觉得攰，係压力大。

      到咗呢个星期，Fifi已经唔会再一步一步教我做业务，最多係有时提下我咁。放晒手俾我做，反而激发我嘅斗志。

      寻日自己独自上柜一日。前一晚我就同自己讲过一定唔可以做错嘢，因为寻日係成日针对我嘅主管拉卡。结果冇令自己失望，同样唔使受到所有人嘅冷嘲热讽。争返口气∼

      寻晚，仲同班同事去咗打羽毛波。出咗声汗，好舒服...亚丸係个好玩得嘅人，又唔斤斤计较，好欣赏佢呀∼

      得1日嘅假，我选择唔出街了。

      最近比较在意自己嘅将来，爱情同面包真係好难抉择。一向我都认为自己食得饱先最重要，不过到咗现实，俾我拣嘅话，好难...同斌少呢排最常讨论嘅就係，我哋到30岁会唔会仲係冇人要呢∼人拣人，係个天俾个难题我哋，定係我哋模棱两可嘅态度难为咗个天呢??

      果然，咁先係天秤座。哈哈∼

      返工返到有啲精神分裂了。今日中午食饭前埋数，突然少咗5W...真係觉得好惊，点解会发生咁嘅失误。

      Fifi帮我对晒数，先发现有笔要走现金嘅汇款我行咗转帐，所以帐实不符了。每次发生呢种事，我就会觉得好惊，唔知又要自己填几多钱。因为试过几次唔记得问个客攞手续费，自己出咗几次钱。

      朝早要开例会，又讲咗好多做业务嘅新规定。其中一样就係出示身份证嘅都要上公安局个系统核实身份证真伪。我运用咗少少私心，上咗个系统查咗某人嘅资料。哈哈∼张相係我觉得最好笑嘅地方。虽然每日返工已经觉得冇乜时间。平时返工放工见到婆婆，都係匆匆打个招呼就走人。结果连我婆婆都话，你而家好忙喎∼

      我都唔知点解。

      今晚，原本打算去睇千嬅同Eason出<每当变幻时>嘅首映，结果千嬅唔嚟，所以冇去到，颇失望的...

      唔知係做嘢关系，定係人大咗，而家嘅开心快乐比起童年，都嚟得好虚幻。真真确确嘅开心确实冇乜∼定係自己仲喺度等紧奇迹??

      千嬅首<每当变幻时>，真係好有感觉。