琴日聽完亞芳嘅一席話，都唔知講咩好！我真係覺得佢天真過天真嬌，單純過中學生，連潼潼都話佢超低能！

            發誓呢d嘢，亞芳竟然都會信！佢真係超低能、勁白痴！一個出來玩嘅有婦之夫發嘅所謂毒誓都好信？

      點解佢會天真都呢個程度？好彩佢而家已經清楚晒打靶嘅真面目，由愛慕變成憤怒！

                            不過我最擔心就係佢嘅憤怒！因為佢嘅憤怒係起源於好勝心，好勝心會令人做出錯誤嘅決定！

               希望佢任性過後，會學識帶眼識人！仲有佢d自己唯是嘅性格！

   我最忍唔住就係佢成日以為自己好索，其實就係公主妄想症！

                       最重要係佢仲未知道自己要咩！仲未識分何謂普通朋友，何謂飲食朋友，何謂真正朋友、知己！

          經過亞芳嘅經歷，令我更加信相呢個世界係無一見鍾情，只有日久生情！

          呢排我好忙碌，因為又要去替工！不過今次係新蒲崗，即係肥仔銘果間茶餐廳！原本想睇吓可唔可以幫亞忠博份水吧長工，可惜佢已經搵咗人！今次已經係第三次去替工，今次比我預期中辛苦，因為旺咗！我覺得因為係個水吧嘅關系，呢個水吧叫亞峰，係一個23歲嘅後生仔，又係肥仔銘嘅小學同學，所以我嘅幫忠大計不能實行！

                    經過呢兩日工作情況來看，我發覺我真係老啦，我要用9成氣力先可以追得上亞峰嘅速度。係以前，我仲可以一邊做一邊唱歌！而家真係比唔上d後生啦！經過呢一次實戰嘅經驗，我應該選擇做津津呢d唔會好急嘅餐廳，因為我知道我已經唔係以前嘅我，再唔係超級快手嘅我！

    媽媽已經回來兩日，好不容易先習慣呢度嘅酷熱天氣！因為家姐屋企向南，又向海。而呢度雖然都向海，可惜係向西，曬到亞媽都唔認得！

                     呢兩晚我都無機會煮嘢比亞媽食，因為我去咗津津替工，返4粒鐘有$250，替兩晚即係有$500，點解唔替呀？呢兩晚又見返D熟客，真係份外親切！

           家姐又傳來喜訊！話說佢搵到一個醫生，終於可以對証下藥幫佢改善病況，但係醫生講到明無可能根治，只有控制、改善！所以一定要長期食藥，一唔食藥病況又差返！好彩家姐可以好樂觀，佢話就當食胃藥！

                   不過唔知係唔係呢一年發生太多事，姐夫應付不來，媽媽話佢好似提早更年期！其實我話姐夫所有嘢都諗多咗囉！好彩我唔會似姐夫，因為我有好多好朋友，有咩事佢哋都十仆我！

         8月5號嘅零晨，我喺度聽緊【死性不改】！突然間諗起亞芳，唔知道佢戰勝心魔未呢？ 其實由一開始知道真相，我都極度緊張、關心佢，但係亞勝話我過份咗，May Be啦！只不過因為佢係我家人，我先禁激動。換轉係第二個，關我叉事咩！

                    點解做任何事都要分勝負？點解人要有好勝心？點解得唔倒就係輸？點解大多數人都唔識好心分手？呢一大堆問號係我聽完亞芳訴苦之後有感而發！其實放手都唔係一件咩大事，何況都明知無結果！就因為好勝心、唔甘心，做就咗呢D無謂嘅痛苦，無謂嘅傷害，值得咩？

             就係因為呢D好勝心，我傷害過唔少女仔！就係因為呢D唔甘心，我就一手摧毀我嘅家庭！所以我唔想亞芳將來好似我一樣，後悔一世！

                  講返D開心嘢！我計劃咗我嘅茶檔大計，只要我喺呢兩年駁命開工，好相信我會有十幾萬，之後就可以達成理想！點解無端端會錦諗？其實開茶餐廳係我嘅夢想，不過人大咗就發現，無一百幾十萬係無可能開茶餐廳！面對現實睇，開茶檔都ok呀！謙仔、潼潼第時畢業之後，佢哋有佢哋嘅事業，我就有我嘅檔口，幾好呀！最重要係家姐嘅病，大家都預咗醫唔好，第時照顧屋企嘅責任就落在我身上！點樣先可以有安穩嘅生活，就係開茶檔自給自足！所以為屋企人好，為自己都好，我都會堅持，向着目標進發！

        開口中，再開再中！呢期我啲直覺好勁，勁到我都唔相信！

                 9號果日，我陪家姐去西環覆診，結果一如所料係攞唔倒病假紙！不過都有一樣意外驚喜，就係呢個醫生坦白得有啲令人驚訝！因為佢話瑪嘉烈話家姐係XX病，即係唔知道你家姐係咩病啦！又話現階段嘅醫學，有啲病係搵唔倒亦都唔知道點解，由期係腦神經病！又叫我家姐唔好在意個病名，因為所有醫生都知道，呢個病即係唔知道係咩病！

          接著17號果日，我、潼潼、謙仔、亞芳同佢嘅男友去睇《反斗奇兵3》！當晚我同亞芳傾電話，聽了佢男友點樣照顧佢，點樣好人！掛線之後我喺度諗，呢個世界點會有完美嘅人！其實見面之後我覺得佢好人到有啲過份，男人嘅直覺話比我聽佢係有啲嘢，但係又講唔出有咩嘢！直到前日！

                              直到前日亞芳話佢唔肯講屋企、朋友嘅嘢，問親都遊花園！我即刻話佢會唔會有老婆，亞芳話佢無時無刻都喺度，如果有老婆的話何來有禁多時間，我即刻話唔比係『太空老婆』！最後我叫亞芳唔好亂想，唔明就問？結果……！我開口又中，真係有『太空老婆』，仲有『太空仔仔』喺加拿大坐移民監！

         個死賤男出嚟偷食都算啦，賤在佢仲要騙亞芳感情，刻意暪住亞芳有家庭呢個事實！呢個死打靶正一賤精，同老婆分隔兩地大能晒呀！分隔兩地就可以騙亞芳嗎？寂寞就可以騙人嘅咩？個死打靶簡直不知所謂！