今日返工
第一時間就係同我既好同事們報喜
首先知道我轉工既係冰姐同妙姐
妙姐仲攬住我好開心咁恭喜我 
你睇呢d同事幾好丫
唔知第日仲會唔會遇到咁好既人呢?
之後同知道既係chloe同阿惠囉
阿惠好羨慕呀
佢未搵到工嘛
不過唔駛驚
佢都會好快搵到工
佢咁有經驗
我叫佢地唔好同其他人講住
因為我下星期先會同老細講我搵到工囉

臨收工羅sir拎左一疊好大疊既野俾我
叫我影印釘裝喎
我見大家咁friend
幫下佢啦
遲d走都冇所謂
點知.....
途中部影印機又發癲
勁jam紙
搞到我釘釘下裝又要去搞佢
咁就出事啦 
最後釘完出黎份野d次序就亂左啦
羅sir一見到就話亂左喎
"我排左三晚架啦......唔緊要啦......你走先, 我再排過"
哇
你肯俾我走我都唔好意思啦
唉......
我幾內疚呀
咁咪同佢排返好釘返好先囉
佢問我點解會亂得咁緊要
我都唔知講乜好
明明影印完就成疊拎過去釘
中間又冇跌過
可能真係整影印機o個陣整亂左啦
佢仲要唔該我
我幾唔好意思呀
呢餐飯真係唔走得
卒之12點40先走得

放工
走左去同姑媽佢地飲茶
諗住我請架嘛
上次講好左話我搵到工先請架
點知佢今次又話姑丈中左馬仔
所以佢請喎
我:又話我搵到工我請架
姑媽:等你返左工先啦
我:到時你又話我出左糧先架啦, 上次又話我搵到就我請既
表姐:佢呃你架咋!
激死人啦!!

返到黎粉嶺勁買野呀
首先o係名都買左兩件衫
行到去粉嶺中心
見到有間鞋舖新開呀
好平呀d鞋
雖然好多人
但係我都迫左入去睇
仲買左一對便服鞋一對拖鞋呀
唔止呀
後來經過另一間boutique
買多一條褲一件衫加一隻小米奇介指
大出血呀!!!
原本拎去請飲茶既錢
就咁俾我呢度買下o個度買下咁差唔多洗晒
唉.......
你地應該明我點解平時會袋咁少錢出街啦
因為我真係會忍唔住咁洗晒架
呢個就係我既洗錢病......

過多兩個星期諗住請d friend d既同事食餐飯
臨走前請佢地食返餐啦
佢地都幫左我好多野
第日好少機會見架啦
話就話會約出黎食飯飲茶
不過會唔會真係咁神心呢?
我都唔知

哇
好爽
訓到成點鐘先起身
起身叫飯食
食飽咪睇下電視咁囉
之後就勁追我本24個比利
都仲未睇晒呀
又冇得續借喎
激死我啦!

到左夜晚就好乖咁執下張床d野啦
好多垃圾
(雖然執完都仲好多野)
換埋床單啦
沖好涼諗住玩下電腦啦
點知.......
壞機
激死我啦
卒之要format佢再裝過個window
都搞左成個幾鐘呀
好彩有高人指點我
而家搞掂晒啦
可以訓啦

又再一次證明我既天份
又再一次證明你既好

今日專登請左一日病假去second in
一訓就訓到11點幾
起身食左d野
上下網
到左點幾就換衫
因為落雨所以就撘的士過去
費事濕晒身咁去到啦

去到已經見到有個女仔啦
等多兩等
總共有三個對手
計埋我就總共四個人
我係第三個入去見架
一入到校長室
打下招呼就開始問我野啦
今次係校長同埋上次其中一個秘書見我
其實問既野同上次first in問既都差唔多
所以其實我都係答返上次既答案
我諗最慘係個秘書
同一個答案聽左兩次
都幾悶
我臨走之前聽佢地話要見埋兩個先做到決定
(兩個???咁咪即係總共五個人second in?)

唔知係我講野講得快
定係我答野答得少呢
我感覺上好似好快就返出黎
我都好擔心自己既表現 
不過都冇計啦
都係等架啦

撘巴士出返上水
去左新都lesauda
睇下上次o係沙田睇中o個對粉紅色鞋嘛
好舒服o個對
之後一路同阿簡傾電話
一路睇鞋
咁當然梗係傾我second in既事
呢頭講緊要等電話
又唔知要等幾耐
o個頭中學就打電話黎話請我啦
幾個字時間咋喎
我都諗唔到會咁快呀真係
佢o係電話同我傾左d detail野
返工時間呀
薪金呀
佢仲想約我下星期初去簽約
我同佢講我下星期初要開會呀
所以我唔知可唔可以準時放工
但係原來再下個星期秘書姐姐陳小姐放暑假呀
所以我唯有約佢下星期五啦
希望到時可以準時放工
六點之前去到中學簽約
嘻嘻
好期待
我相信呢份工我都會做得好開心
因為d人俾我既感覺都好nice!
又係一個新開始

聽完陳小姐電話
我就好豪咁買左o個對粉紅色鞋啦
好舒服
好耐冇買過d咁舒服既皮鞋啦
二百幾蚊都唔係好貴姐

返到黎粉嶺
上樓換左衫之後就落樓下睇醫生
當然唔係病啦
我都係想要張醫生紙之嘛
咁咪扮到個樣好病咁囉 
話好頭痛呀好唔舒服呀
最後就拎左張醫生紙
咁又百五蚊啦

其實計返為左今日interview我都洗左好多錢呀
好彩請我咋
如果唔係我就真係蝕啦!!!

唔知點同老細講我唔續約啦
話佢知我搵到工
佢咪知道我講大話請假去見工囉
我唔想俾佢知喎.......
又要再諗下先......

愛上小眼睛 
好有型好可愛!

今晚係呢季最後一場馬
當然我都要返啦

break既時候o係canteen見到佢
一見佢我地就問佢上星期日做乜唔返工
佢好細聲咁答左我地
但係我地兩個人都唔知佢講乜
佢問我地下季仲做唔做
我地冇答
一黎我地都唔知
我地都仲未決定
二黎佢問完就已經俾師奶捉住左
我地冇機會答

break完之後我地趁機走左落樓下攞位
好好彩坐到偶像o個行
不過冇用丫
坐好後呀
一定見唔到偶像
不出我地所料
偶像掛住係line前同d師奶傾計
冇乜過黎line後
所以我地好少機會見佢同同佢傾計囉
都覺得好可惜

今晚真係好眼訓呀
可能係因為日頭返工太忙
冇乜休息啦
所以返到馬會都已經好累啦
累到都冇乜心機傾計
冇左偶像o係度行黎行去等我地望下佢
真係眼訓左好多 

好辛苦捱到放工
但係全場要做大end呀
天呀!!!!
我好想走呀
偶像又話如果做end時冇乜call就會放我地呢條line走先
點知........
我地俾佢昆左
我地最後係最遲走既一行
到我地走時
偶像都走左啦
byebye都同唔到佢講呀
好唔開心......

下季我仲返唔返呢?
我仲未決定呀
諗下先

棠棠成日都碌大對眼望住我地
成日都聽唔到我地講野
我諗佢同我地一樣
有職業病
係聾架!!!!

今日麵包師(外籍老師Baker)請晒我地去飲茶呀!
好多野食呀
平時做咁多野
今日梗係唔客氣勁食啦
難得佢請客喎
呵呵
食到好飽飽呀!
好耐未試過啦
飽到好似生得咁(個肚仔好大)
雖然肥左好多
不過好滿足
同一班同事一齊飲茶傾計(雖然聽佢地傾多d)
第日都未必有咁既機會啦
退休既退休
轉工既轉工
好難再遇到啦
要珍惜最後呢幾個星期

今日竟然收到我禽日見o個份工既秘書打電話黎
又話要等一至兩個星期既
咁快架
我真係冇心理準備呀 
佢原本想約我聽日見校長架
不過下午1點喎
呢d時間好難搞
而且我禽日先早退
聽日又請假好似唔係咁好
所以問佢可唔可以第二日
佢話要問下校長先
遲d再覆我
之後我開始後悔啦
好驚佢唔覆我
好彩佢好好人
再打返俾我約我星期四
咁都好d
我都有一日做好心理準備嘛
好緊張呀
終於等到有second in
希望可以一擊即中!!!