今日原本約左去做通淋巴架
點知到我lunch o個陣佢打俾我
話上次同我預約o個個pt staff搞錯左
咁我今日可唔可以早d去喎
梗係唔得啦
唔駛做咩?
又問我聽日4點得唔得
梗係唔得啦
我最早都係放4點咋
你叫我點去呢???
後來仲話連價錢都搞錯左呀!
上次同講左係$88
點知原來唔係
不過佢都知衰啦
佢話會照收返$88
算佢啦
如果唔係我真係唔去呀
而家卒之約左星期日呀
唉......又要等多一個星期
咁麻煩 
約黎約去

最後放工就返左屋企
睇多啦A夢
細佬同舅母行完書展返黎
買左麥當當食
之後等到舅父開車過黎
就一齊去探阿姨啦
佢今朝做手術呀
我地去到同佢傾左一陣佢就好似好眼睏咁啦
所以我地都唔留咁耐啦
不過見佢都幾好面色
咁就冇咁擔心啦
佢都話除左係個傷口痛之外
都冇乜其他唔舒服啦
咁就好啦
之後就一行人返黎粉嶺
等埋我阿媽放工
就去左花都買pizza食
食左好多野呀
好飽!
又食唔到麥皮餐啦
唔知又肥左幾多呢???
噢........

訓醒已經一點幾
食d野
睇下電視
一路睇
一路又訓下覺
六點幾坐埋舅父車
出去樂富同阿婆食飯
買左個芒果蛋糕
好好味!

今日返工
都係冇乜特別野做囉
好快就等到收工
收工就同左妙姐去左食泰國菜
幾抵幾好味喎
下次再去先得

食完飯妙姐就帶我去整頭啦
佢介紹我去佢剪開o個間
佢話個師傅都ok喎
一去到見到佢好nice
好主動同我地傾計呀
可能因為佢同妙姐熟啦
佢俾我種感覺好似偶像
(差唔多年紀囉,或者後生少少,當然個樣唔似)
佢真係好溫柔體貼
仲好細心呀
佢一路都好認真專注咁同我整頭呀
(一個認真做野既男人真係好有魅力呀)
真係一小執頭髮佢都拎起夾
又有風度喎
幫我拉椅喎
又叫我小心冼親
好感動啊
(至鐘意呢d男人)
我最鐘意見到佢笑
佢笑起黎有笑紋架
好cute
好得意呀
我鐘意睇佢七分面同側面
幾靚仔
睇落有d似日本仔
後生時應該幾靚仔
(哎呀,我對佢真係讚不絕口呀)
佢話我個頭之前俾人剪壞左
太碎
所以唔可以再剪
叫我留多一個月再成個頭修下
最後我足足坐左差唔多6個鐘呀
佢話我個頭好難夾呀
因為太碎
我郁都唔敢郁呀
又勁眼訓喎
勁辛苦呀!!!
不過整得好靚呀個頭
辛苦晒啦
一個月後見呀
我會再黎搵你剪架
雖然我要特登去馬鞍山
不過冇所謂
因為我迷上左呢個溫柔既男仕

今日打左電話去book通淋巴treatment
約左星期一下午
星期一要返8放4啦咁
要去慈雲山做
希望有效!

今朝返工時落好大雨呀
好彩我醒目
著返對拖鞋返去姐
如果唔係我對converse又要洗多次
(o岩o岩先洗乾淨左咋)

手頭上既工作差唔多清晒啦
而家係準備執拾我o個張仲亂過打仗既枱呀
真係冇返三四日都執唔完
不過我都好想睇下自己張枱乾乾淨淨整整齊齊個樣係點
真係我一入黎做已經好亂.....
好耐冇見過我張枱係冇野架

呢兩日不斷上網搵d關於網頁上載既資料
因為我想將我呢個日記d歌upload去第二個site
而家用緊sina
唔知點解d歌播唔到
想轉第二個用下
等d歌播得順d

今日孟老師開左佢媽媽個日記板俾我地睇
阿孟母真係又發潮又標煙呀
(即係又潮又in, "發潮標煙"係小學一齣話劇既對白)
整得好靚呀個日記板
仲要打好多字
(絕對唔似我阿媽咁只係識開機閂機, 極其量都係send e-mail, 仲要有旁述先識喎)
真係新時代新女性既典範呀!
服!

簡簡今日要帶住隻痛腳去見工呀
仲要入到天水圍
真係辛苦
去到無意中聽到個校長同人講
佢會請三個人
二個中文, 一個英文
(不過簡簡係主修數學架.......)
簡簡去到已經簽緊兩個啦
好明顯又係玩野
簡簡又好upset啦
算啦!
寶物尋歸底呀!
就快搵到份更好架
期待東涌?
好似遠左d喎.......

今晚冇食到麥皮餐呀
阿媽話晚晚食麥皮唔得喎
會死人架
(因為我煮得好難食)
所以叫我食返餐住家飯
我見佢誠意拳拳
我當然奉陪啦!
個肚腩好似細左少少少少少少
係咪心理作用呢???

原本諗住今日去整負離子呀
不過妙姐介紹個師傅今日唔開工
所以整唔到
同埋阿師傅叫我最好預多d時間
等佢可以整得好d
所以最後就約左星期六啦
等佢同我整靚d嘛

今日放工好大雨呀!
個天好似就黎塌咁呀
好恐怖呀!!!
呢幾日都係帶定"姐"穩陣d
好彩今朝d小朋友出去寫生o個陣仲好好天
唔係佢地都幾麻煩

今晚將之前o係第二個日記板寫既日記都搬埋過黎
可以一個板寫晒嘛
仲有最主要既原因係之前個板冇呢個咁靚囉

仲考慮緊去唔去通淋巴
苦惱.......