３月２日，星期三

上次同小學生玩遊戲，我地送左d鉛筆擦膠俾優勝果組o既同學，點知俾奧村老師發現左，今日捉左我地去照肺＝＝＂

佢講到我地送禮物好似賄賂咁，係犯法o既行為，仲話會影響小學對我地留學生o既印象，出年未必再同我地合作攪交流，

洗唔洗吹到咁大呀！！Semi問過小學班主任，個老師話OK我地先派，而家又話我地做壞規矩。跟住仲叫我地諗下d家長會點睇我地，

勁好笑，我真係諗唔到wor！！你o既仔女同你講，今日有外國o既哥哥姐姐同佢玩遊戲，贏左仲有禮物，點解家長會覺得有問題？！

我又唔係派錢俾佢地！！奧村老師叫我地同級主任道歉，要誠懇唔係普通果隻，要有幾誠懇呀？！跪埋响到好唔好？！

最後我地三個同班主任一齊去搵級主任道歉，果個老女人個樣＜串串貢＞，見到都想發火！鞠躬道歉仲攪笑，我真係鞠一下就抬頭，

但見到其餘三人仲鞠緊，即刻dup返低個頭，哈哈，我冇諗過要咁誠懇鞠躬ma！！　一場鬧劇，（日本老師）勁無聊∼

　小學生表演時o既道具，表演完送左俾我地。

今日係最後一次去小學交流，今次輪到佢地表演俾我地睇，個表演係介紹日本o既四季，後來仲全班表演跳舞，好勁呀！！

走o既時候佢地不停同我地握手，仲叫我地簽名留念，攪到我地三個好似大明星咁，哈哈∼

　晚餐有一味疑似蘿白炆牛根，不過味道緊係差d啦∼∼

３月３日，星期四

日本料理堂學整便當，又係煮飯，又係煎蛋，好無聊呀！！！　最後一堂都唔可以煮d有趣少少o既野＞＜

　今次煎得冇咁燶啦！　　煎肉卷，裡面係紅蘿白同豆

　製成品！

中間果兩兜仔係甜蕃薯同紅蘿白炒牛蒡。另外仲有教將蘋果切到好似兔仔咁，不過我切得太肉酸，所以食左lu，哈哈∼

２月２８日，星期一

最近麥當奴做緊40周年特價優惠，平時６百幾YEN o既巨無霸餐而家 550 YEN，淨買巨無霸更只需 200 YEN，我同Apple都好興奮。

雖然lunch時落好大雨，不過我地上個星期已經約定，所以一定要去！Mai都有同我地去，不過佢唔食牛肉所以冇食到巨無霸。

　四周圍o既人全部都係食巨無霸，真係太好味啦∼

下午出現奇蹟o既一刻，文同學終於返學！！我諗我已經有兩個星期冇見過佢，冇人知佢發生乜事，好似話病wor∼

３月１日，星期二

星期日幫Susie搬野去天王寺，今日佢好客氣咁話要請我食lunch。其實都係舉手之勞啫，Susie對我咁好，我點會托手肘丫！！

不過比起食lunch，我寧願Susie幫我＜lin骨＞，因為搬完野之後膊頭好痛。但係Susie拒絕左我，因為佢膊頭都好痛，冇力幫我＜lin骨＞

冇辦法，唯有浸下浴舒緩下啦！Susie就慘law，搬出去後水費用幾多俾幾多，所以唔可以浸浴呢！黎我間房浸啦，哈哈

２月２６日，星期六

夜晚去超市買野o既時候，睇住個男人碌左落樓梯，嚇到我死死下　個男人跌左錢想烏低身執返，之後佢失平衡，

好似差錯腳咁行左幾級樓梯，由於佢動作都幾大，所以周圍o既人都望住佢，我地睇住佢扶住側邊o既扶手，諗住佢冇事啦∼

唔知佢係咪飲醉酒冇力，突然鬆手成個人碌左落樓梯，中途仲打左個＜關斗＞，周圍冇人大叫，因為個個都嚇到呆左！！

後來有幾個男人行埋去問佢點，我見個男人冇流血又清醒，加上我留响到都冇乜野幫到手，所以繼續去超市買野∼

２月２７日，星期日

Susie今日搬走啦，真係好唔捨得！！由於佢太多行李，即使有個壯男幫佢都攪唔掂，所以我都幫佢手拎d行李去到天王寺，

再送埋佢地上的士先走。佢唔係用普通喼，係用超大個o既袋，大到真係可以裝個人，佢話黎日本o既時候個袋重25KG，

我諗而家應該過30KG，好彩個袋下面有碌，咁先拎得冇咁辛苦！！寮長俾左兩包薯片我地，坐JR時太肚餓所以開黎食，

食食下先發現原來過左期，哈哈，我地話如果聽日三個都唔舒服，就話俾老師聽係寮長..........係寮長攪到我地咁嫁