２月１９日，星期六

好可憐呀！！我個網上電話用唔到呀！！之前都仲好地地，唔知點解突然間登入唔到。今日整左成個下晝（大約５小時），

仲用手機打埋去香港寬頻o既海外維修熱線（其實咪又係打返去香港），同個職員傾左半小時，都唔知計唔計長途電話錢，

最終個職員講左句：＜鍾小姐唔好意思，我都幫唔到你！＞　我簽左兩年約，好彩佢話如果真係用唔到可以同公司傾下，

提前解約，不過而家都仲未決定點做∼雖然唔係日日都有人打電話俾我，但冇電話真係好唔方便，想搵人都搵唔到！！

好彩而家Ponchi Papa有facebook，如果我send短訊俾佢，佢手提會即刻收到，咁就可以開msn或facebook同我傾計∼ ^^

２月２０日，星期日

又到左一年一度渣打馬拉松o既日子，今年Ponchi Papa都有參賽，而且比賽前仲接受左周刊同電視訪問tim！！

　東周刊訪問，大家睇左未呀？！

　電視訪問，我d朋友激讚Ponchi Papa型仔，哈哈

Ponchi Papa因為唔舒服所以今年成績麻麻，不過唔緊要，出年再接再厲！！最好捉埋Hilda Mama同帥軒一齊跑！！

２月２１日，星期一

真係要俾個＜勁＞字自己！！鬧鐘7:30am響，我8:00am先起身按熄佢，响DO DO聲下都可以訓半個鐘，係咪好勁呢？？

今個星期五就要表演＜小紅帽＞，所以係時候準備定d服飾，進入最後彩排！！今日問學校借左d假髮，大家個look好攪笑∼

　鄭同學扮女生，好想打佢！！！

　張天馳扮阿婆，好襯佢！！　 　Thomas好多肌肉！！

　我同Mai KISS KISS KISS（小紅帽同小藍帽攪基？！哈哈∼）

原來今日下午３點幾時奈良發生地震呀！！不過果時我搭緊JR返歸，所以又feel唔到！！好緊張呀，會唔會有餘震呢？？

聽Kaku講，原來以前o既寮長响冇做寮長之後冇耐就病逝了，人真係好化學，大家要珍惜眼前人！希望舊寮母可以開開心心生活落去。

好慘呀！！！本來我同Mai一齊演小紅帽呢個角色，一人演一半唔洗背咁多對白！！點知文同學連續幾次冇出席練習，

我地怕正式演果日佢會甩底唔返學，所以決定飛起佢，改返Mai演小藍帽，我演小紅帽，攪到我地又要背好多對白＝＝＂

之前練習淨係跟稿讀，今日練習要做埋動做，演埋戲。由於d動作太白痴，個個都忍唔住大笑，下星期五正式表演，好緊張＞＜

食完下午茶諗住訓晏覺，點知高同學打黎，一收線又到Kaku打黎，講左半粒鐘一收線又到強強打黎，之後又傾左半個鐘。

終於連續講左一個多小時電話，其實都係講埋d無聊野，攪到我6點幾先訓晏覺，你地還返d午睡時間俾我呀！！

訓到8:30pm高同學打黎問我食飯未，一唔一齊？！我話幾分鐘後响食堂等，但收線後我又繼續再訓過，哈哈哈∼∼

過左15分鐘佢見我仲未落去，估到我又訓返，所以再打多次俾我。點解佢會咁醒目知我又訓返？！因為我有前科law，哈∼

而家真係好鍾意星期四，因為下午係日本料理堂，超輕鬆又有野食　而且返多一日學就有得放假，一諗到放假就充滿力量！！

今日煮大阪燒，對我黎講冇乜難度，因為平時我都有整黎食，哈哈∼

　切緊蔥粒∼　 　五個人o既份量∼

　豬肉大阪燒∼

　另外仲整左個叫＜洋食燒＞，初時冇人知道係乜東東！！

　原來係好似＜薄餐＞咁，上面係腸仔，蔥，蝦乾

我同Connie都覺得呢個＜洋食燒＞好難食！！佢地話冇醬油就冇味，所以幫我落左好多，結果好鹹！！好彩唔係整左好大個啫∼∼

我覺得床下底個木櫃筒有陣木味，攪到d衫有陣怪味，所以放學去百元店買野吸味，俾錢o既時候，排我前面果個人同我打招呼，

我呆左一呆，心諗：＜邊位？！＞，睇清楚d原來係寮母，平時佢著住圍裙戴住頭巾，一轉左look即刻唔認得佢，哈哈