尋晚11點幾就訓覺，今日未夠7:00AM就起身，過緊d唔正常o既生活！！（對於我黎講係超級唔正常）

由於有太多helper，所以唔洗我做登記，叫左我去office打電話同入資料。午餐同Hilda Mama & 佢d同事去飲茶，

我由10點幾已經開始肚餓，餓到1:00PM先有得食lunch，好慘呀＞＜　下午又繼續入資料，做到5:30PM同Mama一齊收工。

貼左膠布，著左絲襪，對腳終於冇咁痛啦！！仲有三日就可以擺脫高跟鞋，YEAH！！　好眼訓呀，早抖啦∼

６月１１日，星期六

上星期响bossini買左條褲，由於太長所以放底俾佢改，明明係個職員幫我度褲長要改到36吋，點知隔日收到電話，

話條褲到左工場後師傅一度，條褲本身就長36吋　攪到我今日又要去多次試褲，原來係個職員度錯，太唔小心啦∼

行完街返到屋企冇幾耐即時落大雨，好彩咋！！！因為我冇帶遮出街，哈哈∼

６月１２日，星期日

今日照舊同姨媽飲茶，不過多左兩位貴賓，就係∼∼∼∼∼所長＆阿邊個邊個

飲完茶佢地就趕去五姨媽屋企開枱，仲要開兩枱tim，＜嘩∼真係唔簡單呀！＞（哈哈∼花家姐o既金句∼）

因為唔輪到我打麻雀，所以我同四姨媽，嫦姨媽去探婆婆，做個乖孫∼

不過五姨媽個孫就唔乖啦，竟然咬四姨媽　雖然係隻細狗仔，但就巴巴閉，寵壞晒！一於唔好要佢！！！！

６月１３日，星期一

救命呀！！我對腳超痛！！今個星期一至五去中大幫手，工作好簡單，不過難倒我o既係要著高跟鞋＞＜

今日著左６小時，對腳已經攰到死死下，腳指公仲損晒，黎緊仲有四日，點算呀？？？

６月８日，星期三

同Hilda Mama去學整蛋糕，總括黎講我鍾意食蛋糕多過整蛋糕，哈哈哈∼

由於响餐廳廚房到整，用o既全部都係專業用具，用機器打芝士同忌廉，唔洗用手打，所以整個過程超輕鬆！

而且最好係有人幫我地善後，唔洗自己洗碗∼　呢樣好重要嫁！你知啦，整蛋糕要用好多用具嫁ma∼

總共整左兩款：

　Hilda Mama整o既芝士蛋糕

不過呢款芝士蛋糕比較麻煩，要放入焗爐焗十幾分鐘，之後再雪凍。屋企冇焗爐咪整唔到......

　Hilda Mama整o既Tiramisu

由於個盒太細，裝太滿會＜必＞晒出黎好肉酸，所以我同Hilda Mama都唔敢整太滿......

６月９日，星期四

蛋糕雪左一晚，終於可以食啦！！

　先食左我整o既∼

Tiramisu o既手指餅浸太多酒，所以過濕，而個盒又細所以唔敢裝咁多芝士，結果唔夠芝士味，同平時食o既味道唔同∼

芝士蛋糕就好好味，如果加d藍莓會仲好味！唯一美中不足係消化餅餅底整得唔夠碎，入面有d一粒粒∼

６月１０日，星期五

大家有冇去姑姐個blog到睇呀？Hilda Mama買左蛋糕請姑姐食，果兩款蛋糕就係响我地學整蛋糕o既餐廳到買嫁啦！！

而姑姐食o既Tiramisu，好大可能就係當日David大廚示範俾我地睇時做o既！因為佢話整好後大約雪一兩日先會賣。

姑姐請放心，我地睇住David整，整個過程好乾淨好衛生，佢冇掛住講野噴晒d口水落去，哈哈∼