６月２４日，星期五

買左XBOX 360咁耐，都未開黎玩。趁帥軒考完試，一於開黎玩下先∼

　估唔估到佢地兩個玩緊咩野運動？

　準備好未呀？？開始比賽啦∼

　帥軒玩跳遠

　我玩跳遠

　玩左好多項運動，流左好多汗，攰死我∼

田徑項目：100米跑步，跨欄，標槍，擲鐵餅，跳遠　　　　　　其他運動：保齡球，拳擊，乒乓波，沙灘排球

我諗大家平時都好少做運動，一於黎玩遊戲兼做運動啦！！歡迎予約時間，哈哈∼∼

夜晚晉晉表弟急call我同帥軒打麻雀，本來話打四圈，後來因為帥軒一家羸三家我地要贏返d錢，所以再打多四圈，

結果打到朝早６點幾，我地三個都係做輸家＞＜　玩XBOX用太多體力，打麻雀用太多腦力，要好好訓返覺∼

６月２５日，星期六

難得April唔洗返工，又有野要俾我，所以就約左食下午茶。運動過度攪到周身骨痛，好似俾人打左一身咁，

仲要企响地鐵站等左April 30分鐘，真係等到腳仔軟！！食完野搭巴士入屯門，周身痛到行唔到樓梯要坐下層，哈哈∼

晚餐响三姨媽屋企食pizza，唔記得間野叫乜名，但好味過pizza hut！突然醒起，好似冇同過鍾氏家族食pizza，唔知有冇記錯呢！

６月２６日，星期日

夏天咁熱，最好緊係食生果∼　唔知大家鍾唔鍾意食荔枝呢？今日叔公响大陸帶左d荔枝返黎俾我地食，

並唔係糯米糍或者桂味，而係＜妃子笑＞，大家有冇聽過？？Hilda Mama同Ponchi Papa話响大陸食過，仲超大粒tim！

平時大家食荔枝緊係揀d外表紅色o既，但呢隻＜妃子笑＞就唔一樣，要揀d青BB o既！大家去買生果記住留意下∼

６月２７日，星期一

點解間房執極都執唔完？！今日又攤開晒d野，又將d野換位，唔通真係要租個迷你倉＝O＝

６月２０日，星期一

唱K三劍俠又出動啦！！所謂o既三劍俠咪就係我，KK同銘銘law　今次我地o既目的地係－－粉嶺！！

我地俾銘銘呃左入粉嶺，又話可以唱好耐，點知又係勁快cut＞＜　响上水流浪左一陣後去左銘銘屋企參觀∼

新入伙裝修都勁過人！！大門唔係用鎖匙開，係拍卡嫁＠O＠""　而且成間屋o既間隔都改過晒，又開放式廚房，正呀！！

我諗銘銘唔介意經常招呼我地去玩o既，哈哈　之後去左KK屋企整蛋糕，我都買左材料整個父親節蛋糕俾Ponchi Papa∼

　今次整藍莓芝士味，唯一失敗係餅底唔夠脆！

６月２１日，星期二

夜晚１１點幾，Celine突然响MSN叫我，話想約我食飯。我真係嚇左一跳，Celine明明响台灣，點解會約我食飯嫁呢？！

當時只係諗會唔會係一個騙局　後來佢話因為展覽黎左香港，仲話埋俾我知住邊間酒店，咁我就相信係Celine啦，哈哈∼

之後我仲約埋Kaku，我地三個响日本認識，真係冇諗過响日本以外o既地方見面，感覺好奇怪呀！

６月２２日，星期三

同Celine約會o既地點係呢到＞＞（專門食點心o既點喜來）http://www.openrice.com/restaurant/sr2.htm?shopid=40526

我同Kaku都話未試過晚餐食點心，不過Celine話想食點心，所以我地兩個陪佢食！食物水準OK，大家不妨試下∼

　Celine影o既無聊相，笑死我

食完飯再帶Celine去尖沙咀睇夜景，之後再坐船返過灣仔，仲去埋金紫荊廣場影張相先送佢返酒店。

　除左船，原來Celine都未搭過雙層巴士，早知同佢搭巴士遊彌敦道啦∼

６月２３日，星期四

普通的一天，沒什麼特別！

６月１５日，星期三

繼續响中大幫手，因為晏晝有interview所以冇得同Hilda Mama出去食lunch，不過我地下午有忙裡偷閒見個面，

嘻嘻，我地走去食下午茶，食左件朱古力蛋糕，cafe o既cake我覺得芝士蛋糕最好味

Hilda Mama要OT所以冇煮飯，佢去＜唐記包點＞買左d蒸飯返黎食，幾好味wor，大家有冇試過呀？？

６月１６日，星期四

雖然我入資料只需要入分數，唔洗入評語，但係有時我都會睇下d評語，特別係好高分／好低分果d，

睇下人地究竟點解面試可以拎咁高／低分。有男interviewer寫女生條裙太短，所以千祈唔好諗住著短裙仔色誘d interviewer，哈哈∼

而且講好多野，攪到有佢講冇人講o既都可能得好低分，interview真係好難呀！諗起見工要interview就頭痛∼∼＞＜

６月１７日，星期五

最後一日返工，我好快手入晒d資料，所以３點幾就可以提早收工。夜晚去沙田食飯，咁啱撞到盧生一家，

由於太耐冇見面，所以叫侍應安排我地坐埋一齊傾下計，當日o既小妹妹映而，已經係中五生，唔認老都唔得啦！！！

　炭燒牛比較好味∼

　d蟹腳都好粗！！

呢餐都好貴，每個餐都要三百幾四百蚊！不過我地冇爭埋單，因為盧生响神不知鬼不覺o既情況下已經埋左單，

後來我地回想返，盧生應該係响我地落左order後話去洗手果時埋單，野食都未黎，我地邊諗到會咁快埋左單呢！

６月１８日，星期六

父親節食飯，又係老地方＜老人家＞，不過今次有新野食，就係鮑魚仔啦，YEAH∼∼你地果隻大唔大隻呢？？

食完飯同所長，阿邊個邊個去＜松記＞食糖水，姑姐姑媽你地又唔黎，好好味呀！！

　一人一碗唔洗爭！綿綿冰感覺好得意∼

６月１９日，星期日

四姨媽四姨丈一家夜晚去食自助餐，$500一位，所以佢地都話要留肚食多d，點知下午黎到我地屋企不停食，

魚肉燒賣啦，蝦片啦，辣魷魚啦，汽水啦∼　唔知佢地夜晚仲食唔食得落呢，哈哈∼