７月５日，星期二

奇蹟呀！！　平時打完羽毛球之後都會痛到落唔到床，今次竟然冇周身骨痛，可能係我運動好左，嘻嘻 ^O^

晚餐終於食到Hilda Mama煮o既餸！仲飲左蕃茄薯仔紅蘿蔔南瓜湯，好味道　太耐冇食住家飯啦∼∼

７月６日，星期三

一家四口去食下午茶，除左Ponchi Papa之外，我地全部都食出前一丁，其實我諗佢好想食嫁，不過要戒口所以冇得食，係咪呢？？

不過算啦，間餐廳煮o既出前一丁都唔好食，自己煮仲好味過佢！！夜晚同嫦姨媽，五姨媽一齊去樂富食飯，

間餐館叫＜天福軒＞，我初時仲聽錯以為係叫＜蝙蝠軒＞，哈哈　最近我地都迷上玩一個 iphone遊戲，要鬥高分！！

７月７日，星期四

今年仲响日本讀書o既同學仔真係慘！每逢戶外活動都係落雨天 之前行山同運動日都落雨，今次研修旅行又係咁！！

諗返起上年個研修旅行，完全係一個呃錢旅行，兩日一夜去得兩個景點，不過只要一大班人一齊就已經好開心∼

有時我都會夢見日本o既同學仔，有一次仲夢見自己返左去王寺宿舍，不過寮長寮母已經轉左人，d房又唔同晒樣。

銘銘約打羽毛球，仲book埋場帶埋球拍，係咪好應該讚下佢先？！ \ ^O^ /　點知臨到體育館佢先話個驚人消息我地知......

原來呢個體育館冇冷氣嫁＠＠""　我同KK即時一齊大叫＜下！！唔係ma！！＞　唔怪之得咁容易book場啦∼

最後我地都照去打波，不過講明下次要book有冷氣o既場。斷斷續續打左兩小時，出左好多汗，真係臭到暈

　男子組打緊波，女子組影靚相

　我拎住o既係羽毛，唔知邊個技術咁差打到d波甩毛！（應該唔係我掛）

　好彩都有證據證明我有打過波，嘻嘻 ^_^"

打完波上左銘銘屋企，我同KK毫不客氣，响佢間豪宅沖返個靚涼！打左陣機後就去食下午茶，衰開有條路，去左間黑店！

　唔好誤會，未食過嫁！一舊豬柳＋一堆薯條＝HKD$24（KK o既，俾著係我一定退貨！）

有Ponchi Papa响到真係唔同d！！如果得我同帥軒兩個，我地晚餐緊係打電話叫外賣，絕對唔會行落街。

不過Ponchi Papa一响到呢，我地就冇得唔願郁。仲搭車去到黃大仙中心食晚餐tim，對我地黎講好遠嫁啦！！

之前見到吉野家有日式咖喱飯，好想食呀，好掛住日本d咖喱　點知去到發現冇左，嗚嗚冇得食............

試左海鮮火窩，個湯底好鹹，牛肉又一般，大家樂仲好味過佢！不過打邊爐始終都係响屋企打最好！