想當年...我讀YMCA o既時候，由於星期三只係上午有堂，所以下午我同同學成日去寶勒巷唱K，幾乎每個星期都去一次。

就係咁，我地同寶勒巷o既職員好熟，特別係經理家浩，我地去親唱K都有優待嫁！！例如由中午唱到8:00PM都唔cut∼

生日去仲送魚生拼盤∼不過今日我同KK，銘銘去唱K，一個我地識o既職員都撞唔到，冇晒d優待，話兩點cut就真係兩點

佢地仲話家浩冇做好耐，咁以後唱K咪冇優待　好彩KK有家浩電話，我地打電話俾佢，不過過左幾個鐘佢先覆電話。

原來佢唔係冇做，只係去左第二間分店啫！下次唱K轉場去尖東港晶∼∼

想當年...果到仲係地盤，而家已變成大型商場－K11

４月３０日，星期六

日本發生左幅射事件後，好多人都話唔敢食日本野。我地一家完全唔怕，照去食壽司！！

　人地都公佈左唔係樣樣食物都係日本黎，洗乜驚啫∼

　明明係蝦天婦羅，但睇落似炸魷魚鬚！！

食完野Hilda Mama同Ponchi Papa去訂戒指，一年一對戒指真厲害　至於個款係點，大家一齊期待下啦∼∼ ^^

　嘻嘻，食哈根達斯雪糕∼∼

　好好味呀！

真係日頭唔好講人，Hilda Mama話搵日約KK同大隻Mike食飯，轉個頭就撞到佢地，好邪呀∼＠O＠

夜晚同細表哥一家食飯，之後去左佢地新屋參觀。澄澄話帶條底褲仔就可以去佢屋企訓一晚，我地話已經買左，

佢好開心咁安排我地訓邊，仲話佢訓梳化，俾張床我同帥軒訓。玩完一輪，我地趁佢去沖涼時偷偷地走人，

唔知澄澄沖完涼出黎見我地走晒會有咩野反應呢？！俾著我肯定好唔開心，哈哈哈∼我地四個好衰呀！！

５月１日，星期日

今日又突然間面青青標冷汗作嘔，回想返原因應該有兩個！！（一）空肚食消炎藥　（二）大熱天時著住長袖外套行樓梯，結果焗親

後來聞下藥油，食左粒話梅就冇乜事。食晚飯時都冇乜胃口，不過就好有胃口食飯後甜品！和哥哥由菲律賓帶返黎o既芒果雪糕∼

　個個都話要籃球咁大個雪糕球∼

　呢兩個美少女食得好開心∼

５月２日，星期一

本來今日伊靖同兆靖黎我屋企玩，不過好多姨媽都話唔得閒，大表哥話等下次多d人得閒先再約，因為個個都想見伊靖同兆靖。

冇得同BB玩，又照舊去飲茶，飲完茶返黎打麻雀。我同嫦姨媽，Javy，晉晉表弟對戰，夜晚再去打邊爐，過左悠閒o既一天。

５月３日，星期二

高同學响街跌左銀包呀！！入面有２萬YEN現金，唔見錢事小，最弊連台灣身份證，車牌，銀行卡等等都唔見埋，

今次真係有排煩，我都替佢擔心兼肉痛，希望有人執到交俾警察啦！不過佢依舊處之泰然，當作小事一則，激死∼

同澄澄講電話，佢問我地星期六仲乜走晒，仲話自己好嬲！！哈哈∼我話要趕返屋企餵魚，如果唔係d魚會餓死，

講講下轉移左話提佢就冇嬲啦∼　下次都係唔好再話去佢到訓，再呃多佢一次，佢肯定以後唔同我地玩，哈哈∼∼

５月４日，星期三

帥軒尋晚又搶左我d公仔攬住訓覺，出門口前仲幫d公仔come被，驚死佢地冷親咁！大熱天時，熱到佢地出晒汗∼

　係咪好可愛呢？！

４月２７日，星期三

今日係Hilda Mama舊曆生日，下晝我同Ponchi Papa，帥軒去左買蛋糕！晚餐我專登唔食咁飽，留返個肚食蛋糕ma

今次呢個係石板街蛋糕，幾好味，大家有冇試過呢？

４月２８日，星期四

執左幾日房，終於輪到執海運返黎o既野！係咪好奇怪點解箱野到左咁耐，點解等到今日先開始執呢？！

如果淨係搵個位放d野當然好簡單！但我發現間房超大塵，我走左咁耐舖塵都好正常，但我唔明點解櫃筒會佈滿晒污漬

總之全間房都要進行大清潔，順便掉左好多好似冇乜用，但又keep左好多年o既野！！有好多野真係唔捨得掉∼

例如以前同學送o既聖誕卡，話晒都係回憶黎嫁ma，大家話係咪應該好好保留？！就係咁，所以咪儲埋勁多舊野law ＝O＝

４月２９日，星期五

本來想入粉嶺搵＜頭王比利＞剪頭髮，好彩入去前打電話通知佢一聲啫，原來佢今日放假，唯有下星期再搵佢啦∼

唔知大家會唔會電視汁撈飯嫁呢？！雖然我平時坐開果個位係背住電視，但我一樣會打側坐睇電視，不過今日好慘，

因為播威廉凱特個世紀婚禮，攪到我冇得煲電視劇！　好彩最近睇開o既＜洪武三十二＞同＜點解阿sir係阿sir＞繼續有得播，

睇埋＜正識第一＞都未捨得去沖涼，一於食埋帥軒買返黎o既糖水先沖！！帥軒好蠢呀！！Hilda Mama叫佢買芒果西米露，

都唔知佢係蠢定冇記性啦！竟然打電話問Hilda Mama西米露要凍定熱。乜有熱o既芒果西米露嫁咩？！