都未夠6:00am就已經醒左，原因係咳到醒，真係咳到想嘔！！　即刻拎包枇杷膏食，食完舒服好多繼續訓覺∼∼

今日上堂繼續傾天才表演小紅帽故事。本來狼呢個色由一個好討厭o既人做，我地諗到小紅帽同老婆婆要俾佢食已經想死，

點知尋日呢個人响FACEBOOK到寫＜裸體站在０度的陽台上，好爽！＞，即時覺得佢係變態o既，所以強烈要求換角！

最後呢個人被我地安排去做獵人，我地仲改左個故事，令到大家同佢唔洗咁多交流∼∼　如果佢住响我隔離房，我實報警！！！！

打開信箱超驚喜！！！收到李宅寄黎o既新年禮物！！！嘻嘻∼∼多謝

　承你（地）貴言，一定會學業進步∼∼

　仲有超得意o既鴨仔揮春，貼响邊到好呢？

不過∼∼∼∼∼　竟然又寫錯我個名！！＞＜＂

李宅o既人，快ｄ搵人認左佢，然後罰抄一百次交俾我！！！

仲有，我係住８１６室，點解會少左兩隻字嫁？！好彩寮長知道我叫咩名啫，哈哈∼∼

１月２８日，星期五

嘻嘻，今日係運動大會，唔洗上堂真係開心！！上次運動大會玩擂球，今次運動大會玩排球，兩樣我地班都唔識玩o既！

　場地：位於難波o既大阪府立體育會館

　由於Joy,Yumi,Sara都有事黎唔到，攪到我地人手＜猛猛緊＞

　學校都知大家唔識玩，所以每隊唔係６個人，係９個人∼

　２Ｅ班毫無策略，其實都係亂打！！哈哈∼

第一場真係亂打，所以輸左！第二場我地有d策略，因為規則係順住號碼開波，我地將識得開波o既排响前d o既號碼∼

結果文同學開波連拎７分！唔識開波o既旭同學突然鬼上身球球開得勁靚，最終第二場我地拎到三十幾分，贏左 ^^

同上一次擂球比賽一樣，輸一場贏一場，我地班係需要熱下身，輸左之後一齊研究策略，咁就會變得厲害，哈∼

　打完比賽個個先好有興趣，如果大家早d發掘呢個興趣，我地可能會贏！！

排球我唔識打，所以走左去做計分！我地班個主審真係超唔掂，俾d指示勁亂！攪到我同Ruby有時都唔知邊一邊得分∼

而且又判錯，兩邊o既球員都走埋去同佢嘈，不過冇辦法，老師話主審大晒＝＝＂　我諗勁多人想打佢！！！！

初初仲離譜，Ａ方開波開出界，應該Ｂ方得分嫁ma，佢話唔係，應該兩方都冇分！後來我地問隔離場個主審，

佢話每一球都應該有一方得分，嘩！！好彩問下人地啫，如果唔係一路判錯肯定俾人打都似∼∼

　慶祝１０個月

真係好怕見到＜期間限定＞四個字，攪到超想買黎食！鬍鬚爸爸o既朱古力puff，冇呃大家，真係勁好味

１月２９日，星期六

下個星期就係農曆新年，仲記得上年新年响家華哥哥舖頭返工，前年新年响海洋公園返工，時間洗唔洗過得咁快呀？！＝＝＂

我响日本冇得同大家一齊食團年飯，不過∼∼∼今晚我同幾個台灣人一齊打邊爐，佢地話當食團年飯wor！！！

　我地6:00pm先去超市買野，豬肉同雞肉丸都半價，勁抵∼

　５個人食，平均每人３６６YEN，平到笑∼

Rocker屋企人由台灣寄過黎o既台式蘿白糕，如果入面多d料我會覺得好味好多！！弊∼∼突然好想飲茶tim＞＜

　年糕，脹起左好得意呀！！

　當然唔少得飲返一杯啦！！　新年快樂

１月３０日，星期日

見到姑姐話＜一日一蘋果，醫生遠離我＞，雖然唔知係咪真o既，不過真係要試下，因為我又唔舒服啦！今次係咳呀！

話說我幾時開始咳o既呢？！就係星期五開始，不過星期五係我黎左日本１０個月，真係好想食puff慶祝一下，所以唔理咁多，

咳死都要食！！結果果晚太辛苦，１２點幾就走左去訓覺，一訓就訓到第二日o既１２點幾，訓左１２小時＠＠＂

之後星期六夜晚大家慶祝新年，咁開心又飲左罐冰凍啤酒＝＝＂响超市見到五隻雞中翼連翼尖半價，只需101YEN

咁抵又忍唔住買左，本來有諗過整鹵水雞翼嫁，但我諗住支鹵水汁留返KK同大隻Mike黎先用，所以最後醃左d雞翼，

今日午餐同晚餐都食煎雞翼，咁熱氣邊有可能唔咳到甩肺丫！！　大家有冇d咩野秘方可以治咳呀？？

１月２４日，星期一

原來唔止人夾人緣，連物件都要講緣！就好似高同學部相機咁，同我真係超唔夾，我次次用親都會出意外，你都咪話唔邪！！

上次去京都嵐山睇紅葉，佢部相機張記憶卡＜卡＞住左响我部電腦入面，攪左成個月，最終都係要Ponchi Papa出馬先攪得掂∼

上次去USJ我又跌左佢部相機落地，雖然鏡頭同螢幕都冇事，不過d＜角落頭＞花晒　都唔明點解部相機會跌落地嫁，

明明有條相機繩連住嫁ma！最恐怖係......跌落地時條相機繩唔係連住部機，不過條繩完整無缺冇爛到嫁，諗起都覺得奇怪！！

其實我同部手機都唔係好夾，今日我放左部手機响櫃筒，拎書出黎時部手機飛左落地下，連電池果個位o既蓋都飛埋出黎，

一時間忍唔住大叫＜OOO∼∼SHT！＞，全班連久保老師都聽到，因為當時上緊堂＝＝＂　哈哈∼

１月２５日，星期二

我地而家教緊課書係講以前o既相，所以永井老師叫我地帶張以前o既相返去，除左做匯報仲會貼出黎俾大家睇！！

　大家細個都好得意呀！！

　林同學o既企鵝裝型爆！　 　Sara(左)咁大個仲食手指！

　Joy＝真人版小丸子！　 　點睇都唔似Sophia！

　旭同學同姚同學都好攪笑∼

　至於我呢，當然好可愛啦，哈哈∼

１月２６日，星期三

下個星期又要去小學交流，今次題目係自己國家o既小學，究竟而家o既小學生睇乜野卡通？玩乜野遊戲？讀乜野科目？

一路討論一路諗返起小學果時d白痴野！例如：打左小息完o既鐘之後全部人都唔准郁要定型，郁親就要罰，超攪笑∼∼

　放學有人激嬲我，算佢醒目，識得買返個朱古力包俾我，原諒你啦！！

　相片入面o既兔仔麵包好得意，但真實o既包好醜樣嫁！！

１月２７日，星期四

 又到左一星期一次o既料理堂，不過今個星期冇得落手落腳整，只係講解堂！！

下個星期會整：壽司卷，清湯，砂糖豆（呢三樣好似唔係好吸引咁＞＜），大家期待下我會整成點∼

隔離班就好啦，佢地係整親子丼同牛肉飯，好想轉過去隔離班呀！！

今日要測驗同演講發表，放學真係好想買野食獎勵自己，最後冇買到！因為聽日係２８號，慶祝埋黎左日本１０個月先買！！