新年對我嚟講冇乜特別，人越大就越唔想出去親戚家拜年，出去拜年嘅感覺就好似專登問人攞利是咁，另一方面，對親戚們又唔係好熟，有時都唔知應該點叫，而親戚問嘅都係”近況如何”一類的問題，我就最怕答呢d問題，所以今年拜年就可免則免，不過有時亦會因為阿媽唔識路，我都仍然樂意帶佢去(其實我可以唔理佢識唔識路)，唔去拜年變相等於留在家中，但係stay在屋企又冇嘢好做，俾部電腦我用都唔知應該做乜好，好悶呀……

大年初一，在此恭祝大家身體健康、心想事成。

今年冇咗年三十晚，相對嚟講即係少咗一日打掃，之前日日都要返工，夜晚回家後根本唔想再郁動，所以可以話冇一日執過屋，今日仲諗住冇乜嘢要執，但係原來事實並非我所想，一堆一堆嘅任務等緊我去做，起身之後就一直忙到夜晚，想搵幾個字時間休息吓都冇，當中我發了幾次脾氣，冇它gei，當自己忙到一頭煙之際仲見到有d人幫都唔幫手，佢唔執屋企d嘢就算啦，就連自己一路用嘅電腦枱都唔執，有時我都唔明點解執嘢就係要女性做，由朝做到晚，我真佩服我細妹可以唔發任何脾氣，學佢話齋，既然佢係咪都唔做，幾忟都冇佢辦法，罵完佢都係要自己做，不如快d自己做，不過我就係衰在控制唔到自己ar ma，之後做完又會俾人話呢樣做得唔好果樣做得唔好，我真係想同佢哋講，咁唔滿意你就自己做啦，人哋做咗不但得唔到應有的讚賞，還要聽你哋嘅冷言冷語，灰……

今日心情唔知點解突然中途變得好靚，返工前半日就心不在焉，做樣樣嘢都唔順利咁，平時做得好快果個task今日速度慢咗成倍，對自己感到失望之際上司叫我食lunch先，我相信呢段時間俾我執番d鬥志回來，今日lunch好豐富呀！同事門叫咗pizza hut外賣，the food tastes very good。而晏晝又再次需要check地址，今日個中原網站run得好快，由於佢咁聽教聽話，所以就算地址數量多我仍然好enjoy果個過程，明天就開始一連放四日假，年初四就要繼續開工lu，公司除了掛滿駛新年裝飾，今日仲整埋個(全)(盒)，陣象仲嚴重過屋企咁，新年氣氛好濃厚呢！

呢幾日都過得唔係好開心，唔知係咪因為自己嘅心理問題，要搵樣嘢令我開心真係好難，返工的確provide咗一個地方俾我嘅精神寄託，但係當空閒無聊時就會感到好孤獨，想問上司有冇其他嘢俾我做又唔敢問，當我下定決心準備問果時上司又忙緊其他嘢，其實我係咪唔應該諗咁多呢？我就係衰在成日猜測別人嘅心理，可能根本唔係我諗咁差，但係一鑽牛角尖就會越諗越糟糕，唉……今日放咗工就同細妹去SOGO買嘢，想買果樣嘢就鬼死咁貴，最後亦因為域拖話佢在21樓wrapping，所以就走去21樓打算探班兼睇吓有冇收獲，上到去見到域拖同另一個part-time一齊wrap禮物，見佢哋有傾有講咁都feel到佢幾開心，之後逛咗幾十萬個圈先勉強搵到樣賀年食品，於是我有藉口走去wrapping果counter同域拖傾計，但係亦因為佢要落更衣室攞non-jupas d form俾我，我惟有同另一個part-time傾吓計，呢個part-time我好似好面善，一問之下原來又係讀CSM，同時亦係我負責果個tutorial其中一位，我話我係佢師姐亦係佢mentor，佢反過嚟話我做咁少嘢ga，佢都唔知有我呢個mentor存在，我都唔知好嬲定好笑，無疑果一刻我感到幾挫敗，不過算了吧，我都覺得我自己做mentor果時好似乜都冇做過咁，各位T04嘅mentees，請容許我在這裡說聲SORRY。

P.S. 呢幾日返工狀態唔好，特別晏晝果段時間，冇嘢做我又唔夠膽問"你"攞嘢做，對唔住呀！

其實近期對自己嘅份內事都已經開始慢慢熟悉，我細妹尋晚問我點解唔溫書，還記得一入呢間公司做嘢時，每晚我都會做revision，生怕自己會做錯嘢又或者唔識做，不過功多藝熟，做做吓都已經記得駛d步驟，更何況宜家再冇教我新嘢，所以都唔駛再make revision，我唔知係我做到太快定我嘅份內事太少，好多時候半日已經比我做駛所有嘢，剩下果半日我都唔知應該點過？我應該問上司有冇嘢俾我做定係自己睇吓d report呢？往往我會選擇後者，因為我上司成日都好似好忙好懶唔想做嘢呢？其實我係咪應該採取主動，但我又驚會煩到我上司，oh…好矛盾呀！有冇人打救我呀？

好記得上年一知道冇大學收我時，我個心好唔舒服，自己根本唔知應該點做，因為以前我好堅持要攞咗個degree先出來做嘢，但事與願違，就算幾勤力都冇我expect嘅結果出現，既然冇得選擇，於是我惟有choose打工呢條路，呢條路我行得好辛苦，「失敗」「灰心」在短短幾個月已經比我經歷駛，亦因為我知道就算想讀個degree都要等到2006年9月，所以受到挫敗的我仍要繼續搵嘢做，慶幸年尾比我接到好消息，亦即是現在的工作，每一個新人都要渡過三個月試用期，屋企人只覺得現況嘅我工作尚未穩定，我承認要過咗三個月先算有份穩定的工作，因為未夠三個月隨時會有比人開除的機會，但呢一刻另一問題已經開始煩擾我，就係讀書嘅問題，究竟我應唔應該報non-jupas？？？我只覺得自己欠缺讀書的材料，而將來會出現好多未知之數，我應該點選擇呢？Jovis講得好arm，點choose其實最終都要自己唔好後悔，對於以往自己所choose嘅我都感到後悔，而今次我仍怕自己會揀錯路，who can help me？

今日嘅我由好嬲變到好開心，我d情緒真係起伏不定，話說朝早仍然一貫地做我應該做嘅任務，點知就突然勁咳嗽，攪到自己周身都唔舒服，之後亦因為個part-time冇返，於是我要做埋佢嘅任務---check地址，check地址係就係一件悶事，不過其實沉悶與否就要睇自己有冇嘢做，好似尋日咁得閒嘅我當然想做埋啦，要我check我冇埋怨，令我憤怒嘅係個中原地圖網站今日唔知發乜神經，唔係話busy就話有error，總知就係check極都check唔到，除咗可以用中原check就冇其他辦法，我惟有瘋狂enter我要check嘅資料，奈何佢嘅速度實在太慢，數量極少嘅地址都用咗我大半日時間，一路做我就一路嬲個網站hang hang地，你哋話係咪激死我。

而夜晚就去咗酒樓食團年飯，去得酒樓食咁隆重當然唔係同屋企人，而係公司攪嘅團年飯，六點就收工嘅我要等到成八點半先開始，中段時間都唔知做乜好，我嘅上司叫我出去逛逛，自己一個人又有乜好去處，更何況我又最怕孤獨，無無聊聊咁跟住班同事到達酒樓，原來佢哋打算打麻雀，我又唔係好識打咪坐埋一邊睇佢哋打，點知後來個manager嚟咗，佢見悶就叫我同另外一個同事一齊玩吓，食幾多番我都唔識，但係manager叫到唔通唔理佢，所以之後就玩玩吓咁打咗幾舖，結果咪輸錢，當然我哋係用籌碼玩，後來終於等到入席，面對咁多陌生的面孔我顯然有點兒驚慌，幸好我坐果圍都有幾個相識，之後就不斷介紹d team leader俾我認識，不過其他部門果d都唔介紹自己gei，幸好我上司又同我一圍，我先冇咁afraid，d嘢食都幾好味，不過我又冇乜胃口，所以食咗好少嘢，不過成晚最令我開心嘅係每圍都有一次table prize，冇乜抽獎運嘅我竟然俾抽中，唔知係咪從此我嘅命運就會因為呢間公司而改變呢？

今日做嘢嘅速度有點兒過快，結果攪到自己成個晏晝冇嘢做，天生辛苦命嘅我只要稍微停下來就會感到眼瞓，因此晏晝就攪到自己差點兒睡著了，真失敗呢！係就係冇乜嘢做，不過我都有睇吓公司d report，唔知係咪因為唔清楚d data由何處而出，越睇就越攰，唉…而尋日就唔係好滿意自己嘅表現，發覺自己不懂得去作出變通，只懂follow以前一貫的做法，觀察能力又唔高，有d嘢錯咗我都留意唔到。

真係好奇怪，還記得一開始係為咗練打字而寫網上日記，現在打字速度仍然未算快，但係就日日都想寫日記，或者係因為我說話表達能力太過差勁，所以比較喜歡將感受寫低，有時我會問自己寫作能力係咪好d，不過睇過我d日記嘅你哋都知唔係啦，不過至少我覺得”寫”容易過”講”，好多人話科技嘅發達其實帶來不便，我都幾認同ga，有咗電腦人與人嘅溝通會相對減少，有email、icq、msn傳遞資訊總好過用電話，打電話俾人分分鐘人哋唔得閒，又或者屋企人唔俾傾電話，電腦就provide咗一種另類嘅platform，我好似越講越遠tim，嘻嘻…