話咁快又過咗一個禮拜，呢兩個禮拜嘅我會比較忙，因為個part-time請咗假去旅行，原本佢handle嘅check地址同入信都會由我去完成，所以冇之前咁清閒，不過handle埋果堆嘢都唔會令我好遲放工，只不過比以前遲幾個字，當佢返咗嚟，真不敢想像到時我如何打發自己多餘嘅時間，呢一刻都係唔好諗咁多，因為越諗越煩惱呢！今日lunch同個同事傾談，言談間我提及冇嘢會令我開心，佢話其實每一日冇嘢令我傷心已經值得開心，佢仲叫我唔好咁執著、諗嘢唔好諗得太灰，佢講嘅嘢其實有好多人同我講過，問題係我接受完相關信息後不到一秒就會放棄實踐，道理無疑有好多好多，主要係我是否能夠堅持去學習。

轉瞬間係呢間公司已經做咗半年，還記得開始嘅時候好怕自己唔掂，因此放工返到屋企就即刻做revision，跟住因為每日都需要重覆地做相同嘅tasks，漸漸地所有步驟已經記駛入腦，本notebook已經唔駛再攞出來睇。未過probation就日日擔心比公司開除，過咗半年，對於自己能夠過probation仍然感到意外，覺得一切都好僥倖、好fu look，自己對於自己嘅performance一直都係唔滿意，我覺得有好多地方可以去改善，無奈我唔知點先可以做得更好？？除此之外，我唔知自己有冇選擇錯誤，呢一刻我有d想放棄，對我嚟講，呢份工實在過於清閒，要做嘅嘢唔多，做果d嘢重要性又唔大，每一日我都要計吓點先可以消耗d時間，同時亦開始對自己嘅duties感到厭倦，始終做嘅都係濕碎嘢。

 過咗半年，我仲有好多嘢唔清楚唔知道，每次同事問我嘢，”唔知道”彷彿成為我嘅口頭襌，我唔鐘意咁樣嘅我，我會覺得自己好冇用，但係我又可以如何得到有關知識呢？？唔多出聲嘅我當然冇辦法將同事變成朋友，上次去CEO唱k farewell，我才發現自己冇任何一位同事嘅手提電話號碼，就算我出銅鑼灣先，都唔知點搵佢哋，於是跟大隊去，感覺就像孤獨一人，公司發生乜事我又唔知，係我唔夠投入抑或其他因素導致呢個問題，我唔知道…不過d同事好nice，有時都會撩我講嘢ga。

冇mood嘅心情又再度出現，今次嚴重到 last for一整日，心情極度惡劣，點解我經常性會咁樣ga？心情一down我就會變得更加沉默，連開口講嘢都唔願意，雖則平時嘅我都係唔鐘意speaking，但今日嘅狀況自己都睇唔順眼，唉…好想為自己定下一d目標，咁我就會為咗目標而去奮鬥，而唔係好似宜家甘浪費時間，我唔想生活過得太苦悶，但同時我亦唔知道如何在生活中找出樂趣…

好想upgrade自己擁有嘅知識，唔知有冇人可以俾d 進修嘅information我參考？？

今日有件頗大工程嘅突發事項要做，攪到我要暫時擱置部份daily duties，原本應該由我上司去做，但係佢要忙其他嘢，所以pass咗俾我follow，開始接受呢個任務時我以為好簡單容易，但一open果file先發覺其嚴重性，最無奈就係想要data果個阿head今朝先俾我地去check但係想lunch前要d record，之前幾千隻account都俾成日時間我地，今次成三萬幾隻account只能用半天時間，呢個request似乎有點兒苛刻，不過惟有盡量達到佢嘅要求，點知我一做就encounter無數嘅障礙，最終都不能準時交貨，要做到晏晝四點先做完，雖則我都覺得自己做得太慢，但鬼叫我中途冇concern account嘅數量。

尋日知道自己一路以來都miss咗enter一d資料，不過負責相關資料嘅阿head已經差遣咗另一位同事去follow，雖然一開始佢冇同我交待清楚，但係我認為唔多唔少我都有責任去幫手跟進，所以問同事是否需要幫忙，那位同事最終都給了部份讓我update呢！而夜晚就同一大班同事去咗CWB Neway CEO唱k farewell 一個即將離開嘅同事，唱k呢d節目顯然同我格格不入，所以我話去果時都引起同事之間的驚訝，不過我著重嘅係purpose而唔係地方，始終果個即將離開嘅同事都協助我解決不少難題，去到當然係冇開金口唱過任何歌，但係我又不止於全場冇出聲，因為有個差唔多年紀而比我更加遲入嚟嘅同事一路同我閒談，其實呢個同事比我醒目好多，做嘢講嘢嘅技巧比我成熟好多，好多事情佢會lead住我去思考，明顯地佢叻過我好多，所以有時我都幾羨慕佢。

清閒嘅日子真係唔好受…之前幾個禮拜放工d時間好唔穩定，攪到覺得自己d time management做得唔好，正想諗辦法去令自己做嘢做快d，但發現原來要做嘅嘢唔多，用正常速度做都仲有時間剩餘，之前嘅唔穩定係因為有突發事情要處理，時間對我嚟講實在過於充裕，d剩餘嘅時間唔可以話冇嘢做，其實有好多report值得我去鑽研，但當每一次我想去嘗試了解時，自己總覺得自己欠缺能力，亦因為諗極都諗唔到，繼而有點兒眼瞓嘅感覺，同時亦知道自己對電腦程式嘅認識唔多，完全冇嘢值得自己去proud of自己。

好眼瞓，今日嘅我超級眼瞓，返工不斷打呵欠，極度冇精神，體能難道開始衰退？？呢個禮拜只不過過咗兩日，但我又再一次feel到自己d時間好充裕，好唔鐘意呢種感覺，知道朋友們為工作而奮鬥努力，自己相對嚟講真係清閒，我真係唔知自己有冇揀錯，眼見一d我認為好叻嘅同事陸續離去，選擇留下又是否正確？每日返工要做嘅嘢既簡單又好似毫無重要性，但係我知道自己想要嘅嘢仲未學習到，唉…好矛盾呢！

每日都只不過重複又重複做相同嘅嘢，自己好似一部機器咁，呢d生活真係好苦悶，難道人嘅一生就是這樣虛度而過？？以前讀書時會為考試而勤奮，果時嘅目標雖然短線但尚算清晰，但宜家自己好似冇駛目標、冇駛方向，我覺得自己好迷失，對於將來仍然感到困惑，出到社會大學理應變得成熟，但自己比以前更加幼稚無知，有時好想做某樣嘢，無奈種種因素去限制住，想行前一少步都覺得困難，好冇用呢！

今日返工照舊平平凡凡地度過，做好份內事之後就離開office收工，但我發覺自己每每將每一個任務所需利用嘅時間下錯判斷，明明冇可能一氣呵成完成但自己偏偏以為可以應付自如，自己嘅time management技巧真係好差。而晏晝就陪細妹去九龍塘探路，自從grad咗後都好少再踏足九龍塘嘅我，今日再重返舊地有一種懷念嘅感覺…之後興致勃勃走咗去觀塘apm逛，我全程都係window shopping，攪到細妹都話”唔係ar ma，咁就算睇完？”