呢兩日返工d心情好似唔同咗，唔知變好定變壞呢？

尋日又為咗趕住去上堂而需要加速，現實往往同想像中有出入，一心諗住專注做自己嘅任務，但突發事情偏偏會出現，變相要做多咗一d冇預料嘅嘢，攪到有種控制唔到時間嘅感覺，最後只有擱置或尋求其他同事嘅協助。而夜晚上堂雖然首次覺得眼瞓，但今堂跟得上進度，可能因為教嘅嘢比之前少咗同比較容易，阿sir要求做嘅exercises都能迅速完成，錯咗嘅又明白點解會錯，相比起前幾堂渾渾噩噩，今堂真係好好多。而今日同樣地要做一d extra嘅duty，同事放假冇人有空檔處理而我又學過點做，我d時間好鬆動因此我非常樂意去幫手，話就話學過，但原來對有關步驟嘅認知頗為缺乏，到頭來問吓又做吓，都唔知係幫手定係煩住人？

尋日朝早同中同去咗跑步，晏晝同阿媽去咗行山，而今朝又同同事去咗行山，呢兩日都用咗唔少時間去強身健體，換來嘅係冇乜時間溫書，轉瞬間就過咗一個禮拜，d時間真係過得好快，都唔知點解可以攪到冇時間去make revision，平時又唔係真係好忙碌，總知d時間就係不斷流逝，睇嚟今晚要努力去做exercises同預習，唔係聽日又會聽到一頭霧水。尋日同中同一路跑步一路傾訴，一路聽佢呻先發覺自己encounter嘅都係微不足道嘅小事，係我眼中可能真係令我好煩惱，但係有可能我小事化大，要接觸要面對嘅原來仲有好多好多…….而今朝同事同我講嘅話題真係令我好驚，無可否認我真係好擔心。

每一次個server有任何唔妥差池嘅地方，都會攪到我頓時多咗嘢做，唔係deal with upload嘅問題，就係deal with數量頗多嘅error list，要我逐個account click入去check係頗為消耗時間，所以呢幾日都攪到幾遲先放工，日日返工都係不斷做做做，可能我做嘢速度慢所以d tasks好似做極都做唔完咁，結果今個禮拜d duties清唔駛，不過能夠完全處理好因server down咗而出現嘅手尾已經感到滿足，總知我會做到urgent就做先，唔urgent都會盡量盡快處理。

今日同尋日又好唔同，情緒左右了我嘅思想，今次唔係鬱悶到覺得自己冇用，只係唔多願意開口講嘢，平時已經好沉靜嘅我，今日更加沉靜，就算風趣幽默嘅同事同我講嘢，我都冇乜點response佢，我知道我講嘢極度缺乏技巧，唔係講得太直接就係講得太大聲，畀人嘅感覺就係冇禮貌，好多時候我都係口不對心，明明唔想用果種態度偏要出現果種態度，正因為朝早無意中講咗d好似得罪人嘅嘢，晏晝我prefer唔出聲，同時畀d時間去聆聽別人嘅說話方式與技巧。

尋晚我嘅心理狀況真係好差，件事可能冇想像中咁嚴重，但係唔知點解我會有果種感覺，前前後後同咗唔同嘅人傾訴，但我諗極都諗唔透，臨瞓前係MSN見到同事online，於是chat咗一陣，有好多嘅我係知道，問題在於我唔去改變，同事嘅直接我完全唔介意，反而佢嘅直接引領我去諗多d，原本同事係做緊正經嘢，我嘅打擾相信阻礙了同事，anyway，真感激同事嘅分析與開解。深夜嘅chatting加上晨咁早嘅起身，仲擔心自己返工會冇精神，但眼瞓嘅時段只是一瞬間，瞓得少反而仲精神，真奇怪？而今日嘅心態沒有了昨天嘅鬱悶，我會試吓去學習，始終公司每一個同事都有值得我去學習嘅地方，我亦會去睇多d諗多d，d duties唔係做完就算，究竟自己係咪做到最好盡咗力完成呢？呢幾日其中一個task嘅server down咗，攪到我一直做唔到，今日終於整番好，一次過處理五日嘅data唔係困難，困難嘅地方係要upload去另一個server畀其他人follow，個server嘅memory有限，五日嘅data我要upload成六七次先可以finish，由於upload 同download都需要時間，所以攪咗好耐，而我覺得唔可以再度延遲，所以prefer finish駛成個task先離開，結果要好晏先收工，不過能夠完全做好駛我覺得好有滿足感。 

奇怪嘅感覺再次出現，個個同事為工作而忙碌，而我…好似冇乜嘢做咁，我睇唔到我嘅生存價值，我識嘅嘢又唔多，我覺得我係最冇用嘅一個……

另外，唔知係咪因為同事們一齊做嘢做咗一段日子，佢哋間唔中有傾有講，而我就好像不能融入其中……

竟然忘記了早前跟中同嘅約定，再加上今朝開電話冇留意有message，結果變成我爽約，真係唔好意思tim，一直都只記得今日朝早要reserve出來同細妹一齊食早餐，真係大意呢！食完breakfast就走咗去行山，短短嘅路程明顯地我覺得唔夠喉，不過最重要係能夠吸收大自然空氣，一切嘅煩惱可以暫時擱置，今趟行山旅程好特別，全程環境不是十分寧靜，因為間唔中我細妹會發出尖叫聲，另外影吓影吓竟然影咗百多幅相片呢！

而夜晚就需要出席同事嘅婚宴，諗咗極耐著乜衫，到頭來都係太斯文，見到其他人著得那麼casual，有d後悔自己嘅衣著，不過我都係想尊重吓個場合jie，最無奈嘅係同事們向我投射出怪異嘅目光，講返餐飯，其實都幾悶，始終用同事身份去出席，相識嘅人少之又少，而同事們又會一堆堆傾計，攪到有d局外人嘅感覺，想睇電視一來坐嘅位背對住電視，二來電視機玻璃反光，anyway，見到同事同老婆嘅甜蜜樣子，真係替他們感到高興。

一次過清駛上星期遺留落嚟同今個星期d任務，頓時有一種滿足感，沒有了後顧之憂，真的令人舒暢。

你嘅感覺我同樣地擁有，鬱埋鬱埋始終會爆發，每個人都會有自己嘅問題，唔同嘅環境會provide出唔同嘅感覺，每個人都會有壓力，你講嘅一切難道我感受唔到嗎？自己嘅問題又越來越多，我質疑自己係咪一路以來都做錯，或者我應該揀選另一個角色去生存，可能我唔會咁辛苦……

尋日嘅錯失已成事實，冇嘢可以彌補我嘅過錯，呢一刻我覺得內疚，我知道我做錯咗，每次都係過後才後悔，為何我不能一開始就做好？今日返工d時間過得好快，做咗少少嘢就過咗成個鐘，每次多咗一日公眾假期就會發覺d時間極度唔夠用，d duties一樣跟住一樣，上星期遺留落嚟嘅嘢都仍然冇時間讓我處理，加上今日part-time又冇返，果頭要check地址，呢頭又要input相關資料去run report，可能因為我手腳慢嘅關係，攪到做少少嘢都要用咗我極多時間，每樣tasks我都想做得好d，點知結果冇想像中咁理想，話說我想轉變吓其中一個report send出去嘅format，用咗好多時間好小心去整好個present方法，send完出去我都冇察覺有問題，轉頭我上司只係望咗一眼就問我係咪改咗個format，繼而佢發現有部分數字重疊咗睇唔到，驟眼真係冇細心留意有否出錯，因為我整果時手頭上仲有幾樣任務等緊我去做，快手快腳冇check清楚就send out，點知因為d 間距問題攪到有(瘕)(疵)，心急真係會好容易大意。