今朝好唐突向同事查詢，攪到同事以為做錯d乜，係咁問我佢以後應該點做，後來我諗諗吓先發覺其實唔一定要佢inform我，我將一路以來嘅步驟轉變吓，咁就可以省卻好多不必要嘅麻煩，但最敗我已經開咗口問同事，同事為咗深入了解，問完IT同事再諗有乜解決方法，其實件事好簡單，我只係想同事每次做完通知我等我有心理準備，結果攪到同事要額外抽時間去研究，真討厭自己嘅衝動。呢兩日我都高估咗自己嘅能力，成日以為d嘢好快可以做好，但做做吓先發覺唔可以好似想像中咁快做妥，可能我又係時候要諗得仔細d，睇吓有冇稍為快捷嘅方法去做好每個tasks。 

呢兩日嘅我擁有住一種好奇怪嘅感覺，奇怪到我真係唔知點形容好，總知令我好唔舒服，點算好呀？ 

今個weekend兩日嘅天氣都係陰陰沉沉，攪到d跑步行山活動都要臨時取消，成日待在家中極度唔自在，想溫書又溫唔入腦咁，記得近期教嘅又忘記以前教嘅，真懷疑我係咪根本唔適宜讀account，d人話level one好容易，但係我覺得有丁點兒難度，平時上堂阿sir講嘅我又唔係好明，經常性要自我惡補，唉，又係時候要諗報唔報level two 同埋報邊間tim。尋日cancel咗跑步，我見已經起咗身，於是陪阿媽去行公園，行行吓阿媽同我呻佢嘅嘢，果一刻我先發覺原來每個人都有自己嘅煩惱，呻嘅時候又要搵一個願意聆聽而且懂得明白嘅人，我唔知自己係咪一個好嘅聆聽者，不過我希望你哋呻完會舒緩咗。

今朝仲好好(地)嘅我，晏晝自從收咗個電話就變得好鬱悶，我唔明點解乜都慣我事，我唔想做中間人傳遞信息，你哋究竟可唔可以問返當事人，做中間人一d都唔好受，有乜唔妥就搵我嚟鬧搵我嚟出氣，我嘅忍耐係有限度，我唔想再承受唔同程度嘅責任，我唔係超人呀！情緒一下子變得好低落，盡量抑壓唔畀佢影響工作嘅我，到放工時終於爆發，同事為了安撫我而沒有理會正在等候佢嘅朋友，真係極度感謝，其實我唔講係想收埋收埋唔想其他人為我操心，因為當其他人理會我時我會覺得唔好意思，同事講嘅每一句都有佢嘅意義，重要嘅係我要靠自己去解決。

成日都諗東諗西，諗吓呢樣又諗吓果樣，諗嘢唔係唔好，問題係每件事都諗得好表面，就算諗得深入嘅，又會忽略咗一d最基本簡單嘅matters，如果同事唔提起，相信我已經徹底忘記我需要deal with果樣嘢，每次諗嘅都係一d天方夜譚嘅嘢，根本未到果一步前一步已經過唔到，諗返轉頭，宜家得到嘅可能係一種僥倖係一種幸運，我哋唔係唔駛諗嘢，而係要諗得全面周詳d。

任務始終都係自己handle比較好，上星期因為一時嘅失誤攪到要同事幫我follow部份任務，當然我唔可以pass咗畀同事就唔再理會，至少我需要mark返d record同埋抽樣check 吓有冇問題，由於昨日突發性電腦出現問題，要等到今日先check到d data，唔check齋睇就唔覺有問題，到真正想check嘅時候就完全唔知從何入手，亦因為我做嘢速度慢嘅關係，攪到冇乜時間仔細咁check，check咗一陣就feel到極度混亂，最後選擇離開留待明天繼續。

今日返工好似乜都冇做過咁，因為server無端端down咗，攪到上唔到網，由於好多tasks都需要靠上網才能完成，同事們開始變得極度清閒，個個都藉機攤抖唔做嘢，而我d daily duties都要被擱置，但我冇令自己有一刻空閒，因為我知道唔係樣樣tasks都必須靠上網，我review咗一次我要handle嘅任務後發覺部份只涉及用excel，於是處理果堆任務先，同事行過都叫我唔好做住，不過我真係做唔到扮冇嘢做，我做咗嘢未必有人留意，甚至做完人哋唔當係一回事，但至少做完能夠通過自己嘅關口，令自己無愧於心。

尋晚同事嘅致電告訴星期日嘅例行行山活動要cancel，頓時有點兒失望，前幾日仲話驚落雨行唔到，正當我諗住落雨都照行時，同事突然話要取消，今日於是同阿媽and細妹去咗哥連臣角道行山，我哋行完一段平路之後首先要上五百級石階，決定一路行去大浪灣之後要落一千多級石階，去到大浪灣吹住清涼嘅海風真係好舒服，抖咗一陣再行返轉頭，亦標誌住我哋需要上一千多級石階才可落五百級，落石階當然比上石階容易得多，上固然係比較消耗體力，問題係我哋在沒有足夠儲水嘅情況下去行，真係好似攞苦嚟辛，最後呻吓行吓終於行完呢！

今日返工返咗十二個鐘，已經感到相當疲累嘅我放咗工返到屋企仲要受氣，呢一刻嘅我真係好唔開心，做乜要發我脾氣？做乜係度講埋講埋以前嘅嘢？做乜要猜測公司嘅好壞？做乜要判斷我嘅能力？我只想擁有一個寧靜嘅環境，點解冇人懂得遷就我？一句”佢自願”足以燃點我嘅怒火，如果可以做駛d任務，有邊個想遲放工，搞到咁晏咁夜我都唔想，但係現實要求我這樣子，我都冇辦法改變，辛辛苦苦返完工又要接受屋企人嘅埋怨怨言，唉……

呢兩個禮拜嘅我都畀同一個task玩謝咗，每一次deal with都會攪出問題，今日都唔例外，d files 嘅size頗大而server 嘅儲存量有限，要我cut開cut開嚟upload再等人download，所消耗嘅時間真係好多，一個鐘先可以整一個zip file，試問total十幾個zip files要幾耐先整完，初時我冇諗過要整咁耐，因此一路都冇出聲話做唔點，差唔多放工我先驚覺問題嘅嚴重性，於是立即向上司匯報，上司提出相對嘅應變措施，而我就盡力去配合上司嘅意見。

問題看似解決了，但原來隱藏咗另一個問題，我時刻都做緊嘢，但時間不斷地流逝，而我嘅duties好似做極都做唔完咁，直到真正放工時我手頭上仲有幾樣嘢需要follow，當上司問我仲有乜未做時，我好直接咁答仲有好多嘢未做，跟住當然深入了解有乜tasks未accomplish，有部份上司叫我留待下星期才做，有部份上司請求SZ同事嘅協助，而我冇可能pass駛畀其他人而斷然離開，既然係我嘅份內事，就算數量多我都應該好好完成，麻煩到其他同事我覺得唔好意思，但如果要我一手包辦，我真係唔知要做到幾點，樣樣嘢都頗為urgent，唔做又唔可以，不過最令我無奈嘅係中途出現咗唔少阻滯。

今朝因為我諗嘢諗得唔夠仔細，突然面對一個沒有預料嘅局面，在驚慌嘅情況下攪到新同事要行上行落，過後才驚覺知道太心急，其實可以唔麻煩新同事行嚟行去，但我知道果一刻已經太遲；另外同事要求我教導其中一個task嘅步驟，我好簡單講解完就返埋位，仲以為同事已明瞭做法，原來我沒有顧及同事嘅 level 而疏忽教導一d基本嘅嘢，每次都要過後或經人提醒先知道自己做錯，真希望下次能夠做好d，諗嘢諗得深入d，每樣嘢都concern多d。上星期server down咗仲諗住搞完d手尾，點知尋日收到客人嘅complaint，相關部門要了解發生咗乜事，雖然唔係好慣我事，不過都要幫手check check d data，最令人無奈嘅係做完一堆嘢我依然覺得好似冇做過嘢咁，我忍唔住問同事有乜作用，而同事亦好詳盡解釋畀我知，真係感激同事嘅耐心分析。