唔開心嘅心情其實維持咗一大段日子，冇人問我就會收收埋埋，當有人願意同我傾談，我便會不以為然將自己嘅問題暴露出來，表達果刻完全冇諗過”嚴重性”呢個問題，好多嘢都係隨心所欲，但係別人可能得到另一番了解，繼而作出適應嘅行動去拯救跌入深淵嘅我，今日返工又再一次出現呢種情況，同事就帶咗我入房研討問題，初時我仍然不大願意說出我以往的經歷，漸漸地給同事說服說了出來，佢講咗d相似嘅例子再作出仔細分析，及後我嘅上司同另一位team head都入咗房，對住上司我當然立即感到恐懼，不過同事替我舒緩沉重的氣氛，慢慢地開始嘗試表達自己嘅感覺，佢哋明顯好關心我，所以不斷同我分析同擴闊我條思路，我將一d埋藏在心裡的感覺講咗出來，的確令自己舒緩咗，而我亦應該好好消化同事們為我利用返工時間而作出的關懷說話及道理。

尋日冇精神但心情ok，今日有精神但冇心情，真係無奈…呢幾日我feel到好多同事關心我，regard of佢哋是否知道我嘅問題，相信佢哋都係出自真心，佢哋的確係一班好同事呢！呢幾日都 focus on talking 自己嘅問題，其實講多無謂，最重要係去實行，要作出改變就會遇到阻擾，好似上星期遺留咗一堆任務咁，我每日除咗需要做好自己本份外，亦同時需要將堆remain嘅任務處理好，日日都覺得自己會有時間剩餘，點知原來自己做得好慢，對於自己嘅 time management 好唔滿意，對自己唔滿意嘅地方仲有好多好多呢！

自己所形成嘅問題始終要自己去解決，問題係如果要我一個人獨自去解決往往好容易會放棄，我唔講出來係唔想別人為我操心，但鬱埋鬱埋又會令自己好辛苦，唔想講但又不經意透露咗少少出來，宜家嘅地步係同事包括我上司都會從旁不斷對我提供協助，佢哋飾演嘅係輔助角色，在我背後提醒支持我，好似今日佢哋刻意同我講嘢，而我上司又專登俾機會我去教其他同事excel d function，雖然整個過程我根本冇乜點教過，全程如果冇上司嘅指導我都會唔明白點解唔work，但係佢哋對我所做嘅一切目的都係想我返工開心d，唔好覺得自己冇用等等，我知道各位嘅苦心，亦明白”講就天下無敵，做就有心冇力”呢個障礙嘅存在，但願我能夠take action rather than just understanding。

前幾日因為心情太差，隨意上MSN搵咗個剛剛離開咗公司嘅同事聊天，當中有提及自己嘅問題，同事亦有開解我，不過照舊道理我係明白，但實行就覺得有難度，點知我上司又剛好跟這位同事聯絡，而這位同事出於好心將我部份情況轉述給上司聽，結果今日多咗part傾談時間，感到唐突嘅我在傾談過程中仍然十問九唔應，但我的確感受到同事們對我嘅關心，同時我深知問題出處是自己，無論別人作出任何行徑去協助我改善，我知道最後決定改變與否的是自己。

成日係度講講講，其實你哋知道嘅有幾多？？你哋根本唔知我最需要解決嘅係乜，你哋根本唔知我發生緊乜事，好多嘢抑壓在我心裡，活着真的很痛苦。

尋日先講完要作出嘗試，今日未試就放棄咗，唔係我唔想去做，係我d心情好波動，冇mood唔開心又再一次充斥在我身上，每次唔開心我都唔想講任何嘢，我prefer一個人沉靜地度過，even晏晝同同事出去食lunch，我都選擇唔出聲，全程簡直可以用”獨斷獨行”嚟形容，我知今次狀況比以前嚴重咗，沉靜到我自己都覺得不能接受，那又如何？我根本冇法令自己去說話。

 另外今日體驗到一樣嘢，話說早前有同事建議搞d function比全公司同事gather吓，有人提出建議當然有人去作出planning同execute，好啦！搵駛所有資料同相關機構傾好駛，辛辛苦苦prepare好所有嘢，係時候去計算人數時先發覺原來好少人有興趣，好多人唔去嘅原因係”你唔去呀！咁我都唔去lu”，無疑呢個係正常反應，但係有冇人concern搞手嘅感覺呢？去唔去只需講一句，但搞手在背後做咗勁多嘢而得到嘅結果係”胎死腹中”，個feeling又如何呢？所以有時唔係唔想搞gathering，搞完冇人願意抽少少時間involve，真係搞嚟都多餘。

如果一整日返工都唔講嘢，個感覺頗為難受，不過問題唔係冇人同我講，只係我唔願意講，開口說話表達自己感覺對我嚟講係一件難事，我明白我必須作出改善，現階段仍處於嘗試狀態，但我會努力去改變自己，始終出到社會做嘢一定要主動d，沉默係不能接受，溝通係雙向的，希望我能慢慢實踐我知道嘅道理。

一心諗住改善我嘅沉默，點知一早就比上司問到口啞啞，佢問嘅嘢其實只要觀察力強d都會知道，可惜嘅係我冇留意到，我仲嚴重到答非所問，於是又陷入思考狀態，其後又唔識transfer個 telephone call俾同事，另外有d嘢明明可以做得simple d，但係我又收收埋埋，唔識尋求協助，換來的只有消耗自己更多嘅時間。而今日又再一次感受到”一腳踢”嘅滋味，d tasks真係可以做極都做唔完，原來個part-time平時幫咗我好多，如果佢今次唔去旅行，我都唔知原來要tackle嘅濕碎嘢真係唔少，相信呢個星期都冇乜機會比我歇息停下來。

今日頗為忙碌，part-time去咗旅行未返，原本佢handle嘅duties由我去完成，要tackle嘅任務比想像中多，d tasks好似做極都做唔完，自己惟有根據其重要性去做，不過 time management仍然處理得超差，d放工時間都頗為懸殊，由今日起我嘅返工時間會縮短半日而每日增加半小時，對於呢個安排我唔敢講係好定壞，我只知道我要從新適應d時間，我好擔心會有極多時間冇嘢做，當然呢個星期唔可以用嚟衡量，因為我需要處理埋part-time嘅事宜，更何況不同時段會有不同效果，一到月頭明顯會比較多嘢做，一嚟要create新嘅file，二嚟有d monthly duties要做，除此之外，星期一係會比較多嘢做，而今日就混合咗呢兩大條件，不過我幾enjoy忙碌嘅過程，cos我個腦會專注做嘢而唔會亂諗嘢。

尋晚諗住睇world cup八強賽事，冇咗阿哥係度download咗嘅cctv又再一次hang hang地，睇吓又停吓，點解每一次係我download嘅都會出現hang hang地嘅情況？”不如意事十常八九”呢句成日都會聽到，但係當一個人經常性遇到不如意事係咪真係可以睇得咁開？當果件不如意事夾雜住周遭嘅埋怨，人只會繼續質疑自己嘅命運，人總會經歷高低潮，但係要由谷底企返起身的確好困難，不斷讓我遇到不同程度嘅不如意事，當中嘅過程令我好辛苦，究竟要幾時先可以令我冇咁辛苦？我自己都唔想將世界睇得咁灰，但係好多事實令我有果種”灰”嘅感覺，呢一刻嘅我好痛苦呢！