幫唔幫到手我唔知道，每日我可以做嘅只有做好本份，你哋要我做乜我惟有盡量嘗試完成，個final product好與壞我唔知道，我係時候應該學習吓何謂”敬業樂業”，除此之外，我希望你哋唔好成日愁眉苦臉，我只求身邊嘅人開心快樂，如果要我犧牲才能令你們快樂，我唔介意去做一件犧牲品…

點解？點解你要話我冇禮貌，我真係唔明，明明無論聽電話或者講電話，第一個字當然係”喂”，我講咗”喂”呢個字個電話斷咗線，都冇機會俾我講另一個字，你偏要話我對阿哥冇禮貌，我知你重男輕女，我知道我改變唔到你嘅傳統想法，但我希望你俾番少少自尊我，唔好次次hurt到我咁盡，你驚阿哥唔鐘意聽你電話就叫我代你查詢，好啦我諗住幫你查詢，幫你打去問不但得唔到任何感謝，反而遭受你嘅責罵，我真懷疑點解我要咁做？

今日冇帶飯，所以晏晝同同事出咗去食飯，食呢餐飯比我察覺到其實我冇話題原來係正常，因為d同事係在同一條team做嘢，有時佢哋plan咗d活動，佢哋會藉着食飯時間繼續去商討，我呢個局外人知道的當然係好少好少，因此好多時候都唔知佢哋講緊d乜，唔同team大家唔知對方嘅duties，彼此亦同時好少交流接觸，結果係我對佢哋所計劃的知道不多，但往往佢哋會邀請我呢個無知嘅人參加，有時我會覺得佢哋唔駛刻意預埋我，感覺像是為他們增加多了一個負擔似的，見到佢哋有講有笑，真懷疑我有冇阻礙他們？？

經過尋日行路回家一役，我雙腳已經受不了而開始酸痛，最可悲係行平路才會感到”痛”，這就証明我脫離了做運動已經好一段日子，好想去行山、打波、踩單車呢！返工又要成日坐係度對住部電腦，經常性”坐”會增加hip圍，而對得多電腦又會加深近視，有冇方法去預防呢d後遺症？？？

不知為何，總覺得這星期過得特別慢，每天都覺得明天就是星期五，奈何每日都只可去幻想…做熟咗工作任務自然會做得快，我已經再唔係不斷要求別人俾嘢我做，因為我深知其實我做嘅tasks d程序係簡單而冇難度，試問只要run相關data再放入已設立嘅file有難度嗎？我相信呢一刻我要做嘅除了必須預防一些無謂錯誤外，還要自發性去學習，我相信假若我能夠用自己嘅能力去create一個useful嘅file，一定會得到滿足感，所以我要睇多d相關書籍，然後將知識去作出貢獻。

之前成日都話想試下放咗工行返屋企，奈何每次都冇勇氣去嘗試，而今日終於選擇咗去做，看似短短的距離其實都要至少半個鐘才能完成，雖然需要上落斜坡，不過感覺係舒服嘅，除咗可以當作散步，亦同時provide空間讓我靜靜去思考，半個鐘我究竟有冇諗到一d實質嘅嘢？我嘅答案係”冇”，始終有d嘢係冇辦法改變，要受嘅氣已經受咗，我惟一可以做的只有默默承受……

其實我係咪根本唔屬於任何一個空間呢？無論在何地何處，我都好像被人忽視，我所知道的並不多，往往我知道咗一部份之後就會同相關資訊斷裂，我嘅存在係比你哋去出氣去發洩，出錯統統是我嘅問題，我唔知走去問你哋，你哋會反過來話我麻煩，我唔會令你哋滿意even我俾駛心機去做，唉！

呢兩日返工嘅心情介乎開心與唔開心之間，每次當我諗負面嘅嘢時，我都迫自己諗得正面d，情形就像天使與魔鬼在對抗…返工我就可以嘗試諗正面嘅嘢，但在屋企我仍然做唔到，係公司同屋企我完全係兩個人，都唔知點解會變成咁樣？

這星期的心情惡劣，唔係諗呢樣就諗果樣…一個人可以由樂觀變悲觀，我相信由悲觀轉樂觀都有可能性，無疑好變壞比壞變好容易，不過凡事也可能，只要堅持去改變，無論要經過幾多時間，始終都會改變到。由於唔開心嘅關係，今個星期同咗好多人傾談，在此感謝各位的聆聽，你哋講過嘅希望我會記住，以後可以用嚟警惕自己，宜家我已經諗通咗少少，所以大家唔駛太擔心我，我會努力去作出改變…

唔知點解，明明做果樣嘢係正確嘅，但係冇人會賞識冇人會欣賞，d人有時仲會覺得我所做嘅係多餘，唉！往往我就係在乎你哋對我嘅睇法同態度，每次我好俾心機去完全某件事，得到嘅係你哋嘅唔認同，但係我知道我冇做錯，我冇後悔幫手完成，反而你哋嘅反應令我好難受，跟住我就會好唔開心好upset…除此之外，我希望你哋唔好俾”希望”我，如果冇可能發生嘅，麻煩你哋唔好同我講，因為你哋講過嘅嘢我都會記住，講完之後又唔重提，反而攪到我日日心掛掛，一次又一次嘅希望帶給我一次又一次嘅失望，我都唔知應該點看待？

好激氣呀！臨收工前發覺有張咭不翼而飛，明明朝早入data時仲係度，點解pack信時會唔見咗ga？我諗過駛所有嘅可能性，同時好努力咁搵過我座位附近，但係結果都係搵唔到，唉！我又做錯嘢啦！呢段period我又judge自己嘅能力，我又再一次問自己係咪真係適合做呢個位？開始對份工作感到沉悶嘅我，發覺自己根本冇徹底去了解背後嘅意義，只懂follow以前一貫嘅做法，完全冇用心去諗過其他嘅可能性，成日話好沉悶，但係自己對果d tasks嘅認識原來係好淺薄，不斷渴望有新tasks嘅時候，其實有冇思考過自己才疏學淺，連一d好濕碎嘅嘢都handle唔到呢？

唔知大家今晚有冇睇「高朋滿座」，故事講述阿咩冇乜知心朋友，放假時又要孤獨一人冇人陪，但慶幸最後因為佢有維修電腦嘅知識而結識到好多人，睇住佢彷彿見到自己一樣，惟一唔同就係我冇獨特嘅專長，我唔可以學佢咁有個happy ending…每次一放假，我都只是stay在家中，孤獨嘅感覺好強烈，彷彿世界上只有我一人活著，別人根本不會在意有否我嘅存在，難道我真係冇朋友？點解人哋放假可以開開心心？點解人哋識到好多朋友而自己沒有呢？好多問題充斥在我腦中，孤獨作戰並不好受，但現實就要我孤獨。

除此之外，我又覺得自己冇樣叻，之前返工可以take over自己嘅tasks，但係宜家唔知點解做乜做極都唔完，自己嘅工作量已經比其他人(包括新人)少，日日我都會plan住點先可以消耗d時間，但原來d tasks可以累積又累積，係咪我做得慢呢？抑或我根本冇足夠能力去應付呢？越來越發覺我唔係一個平凡人，平凡人對於樣樣嘢雖然唔精通，但有一定的認識，但我好似乜都唔點，冇專長冇IQ冇EQ，每樣嘢我都缺乏，其實我生存與否真的重要嗎？？？