返工真係頗清閒，我竟然可以有個幾鐘時間冇嘢做，其實我已經專登放慢速度去做daily tasks，無奈點拖都拖唔長，的確現在我要handle嘅tasks數量唔多，如果冇突發事情係會有時間剩餘，不過我同樣明白點解上司唔肯pass其他任務俾我，因為由始至終我對每一件事情仍然好緊張，好多時候我會將錯誤完全放在自己身上。今日我encounter咗一件幾憤怒嘅事，話說有一個team head叫我prepare d packages，正常一盒只得5 packs，我已經問咗佢好多次係咪真係足夠，佢話一盒就enough，於是我幫佢prepare好，直至攞到佢面前我問多次係咪足夠，佢一睇先發覺得5 packs，跟住就叫我再prepare過，反正我有時間，我唔介意要額外整過，不過唔gur嘅係佢講到佢自己冇錯。

朝早處於沉悶唔開心狀態，想搵人聽我呻吓點知個同事忙到七彩，咁我惟有選擇不便打擾，一路做daily duties心情完全冇變好過，今日仲慘到攪亂駛d步驟，幸好我發現得早，但表現仍然比起以前差勁了不少，若然我的心情冇法抒發，深信之後要做嘅tasks都會冇咁順利，但慶幸嘅係去toilet途中讓我遇到另一位同事，本來冇心提起自己心情麻麻，出乎意料地同事純粹問我一條簡單不過嘅問題，講講吓就無端端扯到我鬱悶嘅心情，佢照常理問我點解，我慢慢地開始講出我encounter的問題，返埋位後同事好主動在MSN鼓勵我，於是展開咗傾訴，雖然各自手頭上明顯有嘢做緊，但同事不厭其煩聽我呻苦，chat咗一陣後我嘅心情舒緩了，得到嘅message就係我必須踏出第一步，好多事情唔係無法達成，問題係有冇願意去做，冇膽量冇信心無疑係一種障礙，障礙出現人往往用諸多藉口去抗拒，到頭來結果仍然冇法踏出第一步呢！

狀態唔好，又再次亂諗嘢，冇嘅時候渴望擁有，擁有嘅時間又會嫌呢樣嫌果樣，經常性尋求更好嘅嘢甚至完美，完全唔識珍惜現在擁有的，唔同時段會出現唔同狀況，明明係自己expected嘅，點解會覺得唔滿意？？好想阻止自己無謂嘅想法，但係好難克制自己走去同別人比較，一比較就會好容易突顯自己嘅冇能，唉！經過半年時間，返工膽怯的心情減少了不少，但仍然覺得自己難以和別人溝通，特別對住我上司，佢無疑係一個好上司，但我總覺得我地之間有幅牆阻礙彼此嘅溝通，個感覺好難受，始終大家係同一個department，點解唔可以有簡單嘅溝通？？係我太封閉自己嗎？？

呢兩個禮拜返工多咗”每週一問”呢個環節，逢星期一我都會比上司問對上個weekend做過d乜，呢d好似係自己嘅私事，但係我唔介意去分享，因為我知道佢嘅purpose都係想我試吓表達，係別人眼中我間公司好似怪怪地，別人可能問點解我d同事會care我冇心情從而抽時間去開解我，的確我自己都冇諗過會有呢種情況出現，但係對我嚟講係一件好事，因為我成日覺得冇人care我嘅存活，有時我仲會嚴重到諗就算消失咗都冇人會發覺，無可否認進入呢間公司係上天對我嘅一種恩賜，在我差點完全放棄時突然收到個offer，繼而得到上司同事們的種種關懷，在屋企沒有嘅嘢我可以在返工期間acquire到，雖然我未能有膽量去感激曾經幫過我嘅人，始終我說話能力仍然欠佳，但願我能不斷讓自己進步去答謝各位。

今日過得頗為充實，朝早走咗去飲早茶，跟住周圍逛逛，行吓超級市場商場等等，之後去咗圖書館還書借書，而夜晚就去咗一年一度舉行嘅書展，最辛苦莫過於在灣仔會展不同hall穿插，我同細妹足足行咗大概五個鐘，人又多書又難搵，其實書嘅價格同平時出面買嘅差唔多價錢，只不過便宜少少，都唔明點解要同人迫，不過見細妹興致勃勃就陪佢行吓，入到會場唔買嘢會浪費入場費，一買嘢又會破財，真係”攞錢買難受”，但係唔想去都去咗，惟有用樂觀嘅心情去睇成件事，去到體驗到香港人其實頗無公德心，睇完d書好多時會亂放，一個亂放另一個又會跟隨，結果導致其他遲來的人搵極都搵唔到；另外就係間書局even set up咗個顧客詢問處，走去查詢根本唔會有答案，因為d staff講嘅嘢我都知道，問同唔問完全冇分別，始終都要自己去搜尋，今趟旅程除咗買了心頭好的書籍，亦見識了不少。

呢兩日心情總算平伏了不少，down嘅情緒的確令我好痛苦，因此我希望我能克制自己冇mood嘅心情，我知道要克服存在一定的難度，但係呢兩日無疑過得舒服好多，雖則當中仍包含住不少問題，但我不能操之過急，正所謂「慢工出細貨」，我知道凡事不能太心急，心急係會導致惡劣的後果，因為我已經有所體驗，好似以前做咗一d好冇用途嘅嘢，現在回望過去才發覺自己決定前從來冇考慮清楚，做乜學乜都係半桶水，希望以後我能吸收以往的問題去作出適當的改善。

 返工生涯仍然照舊tackle之前要處理嘅任務，沉悶嘅感覺間唔中亦會出現，始終每日都做緊相同嘅嘢，但係有邊個唔係咁樣？暫時未有新嘢學，但係可能因為我未夠料去tackle更多tasks上司才不敢放手，不過我明白目前要解決嘅唔係少嘢做嘅問題，而係一d人際溝通待人接物處事方法嘅基本問題，至少需要把自己要做嘅任務做到最好，減少出錯的百分比，其實我有好多嘢需要去學習認識。

心情極差的一天，一早就成個人突然冇駛mood，其實冇發生過任何事，只係自己無端端心情低落起來，最敗就係我d心情一眼就比同事看穿，想掩飾都掩飾不了，無論同事點問我，我都堅持話”冇事”，因為我知道問題出於自己，我唔想任何人為我操心，果種感覺令我好辛苦，個腦根本冇諗任何嘢，但一冇mood就完全唔想講嘢，就算有人講笑話我都會無動於衷，我好驚呢d係病態，究竟係咪應該睇吓心理醫生？

鬱悶心情又再一次出現，雖則我知道公司有好多同事關心我，特別係我上司，佢今日好明顯乜都撩我講，孤獨嘅感覺減少了，但沉悶嘅感覺仍然存在，好想抑制自己無謂嘅諗法，不過事實上係好困難，依然覺得自己比同年紀嘅幼稚，照舊感受到自己嘅無能，再次對所做嘅一切感到厭倦，唉…

上星期嘅一時衝動攪到我揀錯咗一d嘢，幸好我發現得早，可以今日cancel有關事宜，不過唔知有冇任何損失，但起碼唔駛米已成炊先嚟後悔，亦知道心急係會累事嘅，因此以後都需要自我警惕。今日出咗銅鑼灣攞smart id，既然出咗車錢冇理由攞一攞就走人，所以之後同細妹逛街，其實都只是漫無目的地行吓，隨便在街上走走無疑好過待在家中，但係仍然覺得虛耗光陰，因此係時間要慢慢計劃將來同為自己定下目標。

呢個星期返工嘅時間終於完結咗，呢五日對我嚟講既難忘又沉重，我冇諗過返工嘅down樣會比同事察覺，冇諗過五日之中有兩日比人叫咗入房傾計，冇諗過自己嘅問題原來咁嚴重，冇諗過隨意嘅一句說話會引致別人嘅種種疑慮……所經歷嘅一切讓我感受到同事們對我嘅關心，無論我幾唔願意表達佢哋都竭而不捨鼓勵我試下講，就算我講得好少佢哋都唔會放棄去追問，我一路講一路喊佢哋完全冇制止，傾談間無意將同事或上司嘅身份轉變為朋友，最終我嘅心情舒緩咗，亦開始慢慢嘗試擴闊自己嘅思緒。

 過咗之前兩個禮拜冇part-time繁忙嘅日子，一心諗住今個禮拜可以輕鬆應付自己嘅任務，點知世事嘅嘢好難預料，突發性嘅傾談消耗咗返工唔少時間，因此每晚都要stay在office完成埋手頭上urgent嘅工作先可以finish working，平時我唔會係最後離開果個，但呢幾日真係忙得不可開交，皆因同事及上司利用咗正常工作時間去了解我嘅問題，對於遲放工我完全冇埋怨，反而覺得係應份嘅，因為得到認識學習到嘅比失去的多出幾十倍。