人心難測，好多時候都係你睇我好我睇你好，一個人嘅外表唔一定同內心一樣，個樣開心內心係咪真係開心，根本好難判斷，生存在世每個人都會有自己嘅煩惱，有自己獨特嘅遭遇，encounter任何困難之後我就會覺得好大件事，但好有可能係一件芝麻小事，只不過我將件事放大咗，我所經歷過嘅嘢唔係冇人經歷過，或者我真係需要擴闊視野呢！

 今日part-time冇返，我要做埋check地址呢個步驟，但係我竟然忽略咗歡迎信的存貨數量，臨放工先知道唔夠存貨，攪到d sales同事聽日冇得出街，呢件事我唔多唔少都要負上部份責任，雖則d sales有職責去留意存貨多寡，如果發覺得早我仲可以起貨俾佢哋，無奈唔到放工都唔發覺，下次一定要防止呢種情況再出現。

尋日終於抵受唔住，好衝動咁去咗剪髮，剪完我細妹話唔認得我，可想而知剪走咗幾多頭髮，因此今日返工d同事見到都”嘩””嘩”聲，問我受咗d乜刺激，又問我點解咁捨得剪短，佢哋d反應好似有點兒過於誇張，但其實真係短咗好多，攪到成個男仔頭咁，不過睇落就清爽咗，冇之前咁頹廢feel，最攪笑就係d同事話真係好短wor，我只可答唔剪都剪咗，惟有下次再搵個第二間剪過囉。適逢月頭，再加上剛剛放了個weekend，d任務堆積咗三日，大家明顯地變得頗為忙碌，記得同事搵我食lunch前問我做完d report未，我話隨時行得，我唔係唔駛做report，只不過我做果d係冇set死個時間要我幾時完成，朝早做唔點可以留待晏晝，我唔似其他人做緊一d好serious嘅嘢，我要handle嘅嘢好flexible，幾時做都得，只要我最終能完成就ok，呢d可能就係我界定”重要與否”嘅其中一個point。

今日又出mk逛街，因為細妹想買個銀包，之前兜過太古同銅鑼灣都唔arm佢心水，出到咁遠佢唔鐘意我都要迫佢買番個，幸好都睇中一款合佢心意，不過除咗精心挑選銀包外，我哋之後純粹 window shopping，咁就無無聊聊消耗咗幾個鐘，最唔gur就係遇到一d勁缺乏基本服務態度嘅sales，自問我哋好有禮貌咁查詢價錢，個sales竟然可以勁唔妥我哋咁唔出聲就咁指住個牌跟住即刻走返入舖位，我哋又冇得罪佢，駛唔駛用d咁嘅態度serve我哋，細妹見狀就話唔買，我哋買唔買取決於我哋手中，點知我哋剛離開個sales立即走出來然後大大聲係我哋背後話我哋盲，本身我都習慣有d冇禮貌嘅sales，但係佢一句話我哋盲d火氣立刻湧上來，雖則我同細妹都勁嬲，但之後覺得無謂為咗佢嘅待遇而影響自己心情。

難得成個星期冇帶飯，換來嘅係大出血，我諗以後都會出現冇飯帶嘅情況，一來自己開始對相同嘅食送菜感到厭倦，二來阿媽對煮飯已經有半放棄狀態，佢話諗唔到煮d乜新菜式，以前阿哥唔返屋企就有藉口唔食飯，宜家就算阿哥回家食阿媽間唔中都叫我哋食外賣，而今日所出嘅血更加大，因為要預祝同事生日，話駛一年一次，公司嘅習慣係會去食貴嘢，不過都係平均攤分，唔計得咁多呢！而今朝心情勁唔點，雖然奇怪感覺已維持咗一段時間，但我真係忍受唔住，去到好想大喊一場嘅地步，在冇辦法之下選擇咗用MSN同同事傾吐，我知會打擾到同事，但我唔講出我嘅感受相信成日都會沒精打采，影響工作的quality，雖然我唔識正確表達自己嘅心理，但亂chat嘅一陣心情冇咁鬱悶，自己仍可專注做好自己的任務。

討厭自己的感覺，臨放工前又有一種難以形容的感覺，真的令我好痛苦，是我胡思亂想，還是事實就是這樣？

肌肉酸痛仍然繼續，最嚴重莫過於昨夜睡覺時，只不過郁一郁就會勁痛，今朝雖然冇咁酸痛，但換來的是勁眼瞓，全日都超級冇精神，不斷打呵欠，整個人彷彿很攰似的，有好幾次還差點兒睡著呢！眼瞓再加上右手的痛楚，做嘢速度變得慢咗，平時朝早可以完成嘅嘢要拖到晏晝才能finish，慶幸晏晝酸痛嘅感覺減輕了不少，做嘢起碼唔駛(就)(住)(就)(住)。而今日lunch又再次出去食，原本我叫咗個紐西蘭肉眼扖意粉，最後竟然變咗雞扖豬扖肉眼扖芝士魚柳意粉，一餐飯可以有咁多唔同嘅餸菜，真的十分豐富。

今日放工後公司搞咗個leisure activity，就係在港島東體育館book咗場打羽毛球，難得遇上久違了嘅打羽毛球運動，我當然會踴躍參與，雖然之前希望有同事陪伴，但係諗諗吓有冇都無所謂，因為自己實在太耐冇做運動，原本星期六晚得到其中一位同事答覆話會去，點知佢臨時爽約，今日話去唔到因為約咗friend食飯，我知道佢其實唔係好想去，如果係諗住去都會推掉朋友嘅約會，一個人唔去影響唔大，但係出現咗勁worse嘅情況，就係全公司d同事都唔去，搞手係我上司，佢當然會去打，於是乎book咗兩個鐘嘅場只有我同上司兩個人打，兩個人打兩個鐘實在太攰，加上我d技術極惡劣，個羽毛球呢次係左邊下一次可以係右邊出現，要我上司行嚟行去接我打出嘅波，最終我哋打咗一個鐘多d就離開咗，每次搞活動都冇人抽空參與，真不禁想像如何抑制自己的憤怒，呢件事我已經對同事有少少心灰意冷嘅感覺，但係我上司可以睇到好開冇發過脾氣，臨走前我問佢如果我都唔去佢會點樣，佢竟然話咪返屋企囉，佢d態度我真係要學習吓。

晏晝出咗太古逛街，之後回家進行執屋行動，如果要執駛所有嘢，我相信需要半個月時間，所以專注執書，但係原來唔可以focus on一樣嘢嚟做，執執吓自自然然會涉及到好多其他嘢，所以執咗一陣已經有d想放棄，最後執就好似冇執過，只係擺得整齊咗少少，全個過程用咗四個幾鐘，亦因為我哋開始嘅時間太晏，搞到好夜都仍然未執好，辛辛苦苦將d嘢擺整齊沖完涼諗住用吓電腦relax吓，點知部腦又突然hang咗，令我有點兒激氣tim。

再次無帶飯，今日同事終於放棄叫外賣出去食，本身可以同佢哋一齊食，但細妹今日想同我一齊食lunch，於是約咗佢食飯時間筲箕灣等，原本可以好正常咁分開食，但係比我發覺不嬲一齊食飯果條team全team拉隊出去食，以往佢哋都會預埋我，但今次唔到lunch time都唔問我有冇帶飯，或者因為出於妒忌，所以我有d嬲佢哋無叫我無預我呢！有free time嘅日子，但教嘢嘅同事好忙，無暇抽空去指導我，攪到我要放慢手腳，一路以為佢哋無計劃無程序教我新知識，夜晚上MSN問咗個阿head先發現自己想法錯誤，可能因為剛剛開始會覺得比較混亂，但原來在他腦中已有全盤計劃同埋已知會了他的teammate。昨天公司多了一部試用形式嘅咖啡機，上司尋日已經教了我怎用，因為萬一同事唔識用除咗問佢都可以問我，今日我終於可以practice沖咖啡，沖嘅模式雖則錯咗，但我從錯誤中又學到其他知識，另外清洗完我又擺錯咗d位置，係就係錯漏百出，但係唔試唔學又點會知道正確使用方法呢，真高興上司肯俾機會我試用。