今朝換証時間比預期長咗好多，尋晚仲諗緊如何打發多餘嘅時間，到頭來我走去返工阿婆仍然未處理好佢嘅申請，冇辦法啦，鬼叫我哋冇帶齊d証件，而且今日申請換証的老人出奇地多，輪候時間繼而延長了不少。由於我只請了half day，晏晝係需要返工，仲以為 SZ admin同事會做咗幾個tasks，原來佢哋係唔識run out d data，結果都係我自己做返駛，不過唔緊要，做咗咁耐我已經耳熟能詳，唔駛兩個鐘我已經run out d data俾同事繼續 follow，雖則係少咗半日，但我完全feel唔到時間嘅緊迫，係又係好似有好多嘢未完成，但係d tasks根本唔urgent要我迅速處理，因此毋需太遲放工，亦引證平時我要做嘅嘢根本唔算多。

今日嘅我又feel到自己好冇用，連好簡單開口講嘢都欠缺膽量，唉！話說最近到老人換智能身分證，於是我阿婆都需要換領，一開始我已經同阿媽講如果想我帶路就book星期六，咁我就唔駛專登請annual，點知佢話星期六d日子唔好，最好係九月十九號，在預約時我事先聲明唔會同佢去，點知星期日佢問我有冇請假，原來佢由頭到尾冇聽我講”唔會放假”，的確我可以選擇唔放假，但問題係我究竟過唔過到自己個關，我知道阿媽係完全唔識路，even我同佢去咗幾次，我真係唔放心佢帶住阿婆盲撞，最終都選擇咗去request annual leave，點解我會feel到自己冇用，原因就係我唔夠膽開口問上司，我好怕阻礙佢做嘢，我好驚自己表達錯誤，其實開口問上司批准與否可以好簡單，但我將成件事變得複雜同視為嚴重，最後只能用MSN去request，用MSN無疑係一個好 indirect 嘅方法，但係我連click “send” 呢個step都要駛咗好多時間搵出我嘅勇氣才做到，係就係request咗，不過我覺得自己好廢law。

繼上星期日去咗行山，今日又同同事去行山，今次同上次嘅目的地都係太平山頂，差別在於我們在不同位置作起點及終點，今次起點是薄扶林水塘而終點是中環，去咗兩次peak所有nature walks 都行過駛，乜路都俾我哋試過駛，雖然今日比較曬，但冇阻礙我哋嘅興致，一路行一路有傾有講，仲可以遠離煩囂嘅環境，呢種感覺都幾舒暢，唔知下次可以行邊度，好想試吓行駛成條港島徑tim。

今日嘅返工時間好清閒，半晝其實可以做駛d tasks，為咗唔想虛度晏晝嘅時間，做做吓開始放慢嚟做，不過點放慢都唔可以拖得太耐，原本諗住晏晝要過檔學嘢可以攝時間，點知同事無暇教導我，慶幸嘅係食完lunch有個係深圳做嘢嘅call centre AM打電話嚟問我有冇時間協助佢建立幾張PowerPoint嘅slides，我見自己d時間咁空閒於是答應幫佢嘗試，幫佢做果時我要做到好鬼祟，因為我唔知道可否讓我上司知道，初時仲以為在power point create chart 好簡單容易，誰知一handle先發覺自己才疏學淺，惟有依賴”help”呢個function，辛辛苦苦用盡自己知道嘅方法去完成，但得出嘅結果同AM所做出嘅相類似，我不禁問自己做咗d乜出來，但呢件突發事件的確消耗了我不少時間。

每次我上司行開咗或者放假嘅時候，我都會感到自己嘅無能，彷彿任何事情都幫唔到手一樣，我根本唔係一個得力助手，同事問嘢我多數答唔清楚唔知道，我唔敢亂下決定，因此每次我都話要問吓上司先，做admin應該乜都知曉，但我並非如此，好多事情上司慣性自己做妥，凡牽涉到金錢嘅佢都會一手包辦，或者因為我嘅職責有限，但幫唔到忙嘅感覺越加強烈，好似今日office漏水，適逢上司出咗去，同事叫我打電話俾管理處，我明知同管理處冇關係，office內部漏水當然係自己公司負責，一時之間我根本唔識如何處理，最慘就係同事將件事睇得好嚴重，我冇膽去作出任何應變措施，於是惟有話要諮詢上司意見，我覺得咁minor嘅嘢都要問上司，實在替上司增添了不少麻煩。

今日嘅我好大頭蝦，用咗咁耐電腦，連最基本嘅back-up我都冇做，唉！話說尋日有個duty未完全finish，我擔心部腦會突然壞咗冇駛local drive d files，好仔細咁attached 咗send 去自己email，點知今日好順手咁由email 直接open 個file，其實我有諗過會否directly save去個drive，因此我有嘗試開local drive save果個file，我見開唔到就以為會automatically save 住我做嘅嘢，再加上我見佢容許我save，於是好專心咁盡量搵出d記憶做好個task，當我做完正打算send俾相關同事，close咗個file再開返打算check多次有否出錯時，才毅然發覺之前我做嘅一切完全冇儲存到，頓時立即feel到大鑊，惟有努力嘗試在其他drive找出完成的file，點知搵極都搵唔到，最後尋求上司的協助，佢同樣地好努力替我尋找，不幸地仍然找不到，於是我只好由頭做多次，之前辛辛苦苦做嘅一切突然消失，at that moment真想大哭一場，亦覺得自己好大意好唔小心好冇用，同事又急住要d data，咁我只好開(turbo)用極速做多次，最後不知不覺間用咗一個鐘就攪點，亦驗證做得多只會越做越快。

今日過得頗為充實，因為一朝早就同同事去咗行山，我哋由蒲飛路巴士總站行上山頂，條路完全唔艱辛，用咗一個鐘就到達山頂，慶幸今日天氣冇任何唔穩定，雖然唔係天朗氣清，但陰天就剛好適宜行山，一路以來都唔知原來可以行上山頂，以前學校每次越野賽跑都係搭巴士上去，山頂顯然唔係第一次踏足，但今日上到去嘅感覺好舒服，企係觀景臺吹住涼風望住香港嘅風景，簡直係一種享受，我擁有嘅煩惱可以暫時一掃而空，行咗一陣山頂廣場再行咗陣凌霄閣，亦順路參觀埋新開果間 Burger King，跟住就行另一條路下山，下山嘅目的地則是置富花園，落到去食埋個lunch就各自回家，全個過程同事同我都有傾有講，從中我知道嘅好多不同事蹟呢！

今個星期返咗五日工只有一日帶咗飯，呢d境況真係可悲，我唔係介意同其他同事出去食，只係自己食得唔多，好似浪費d食物咁，更何況出去食極都係果幾間，開始感到沉悶，不過出去食嘅好處係可以俾機會我同同事多溝通。毫無疑問今日lunch都係出去食，因為又要farewell同事，同事一加入就會有歡迎飯，同事一辭職就會有告別飯，今次呢個同事入咗嚟只不過一個月鬆d，因為一d私人問題所以要resign，一個月時間其實好短，但亦因為呢一個月經常性冇飯帶，同呢個同事都傾得 一兩句，所以佢走我都有d唔捨得，一來佢年紀同我差唔多，二來佢之前都係SOGO做過sales，唔似得其他同事做咗幾年講嘅都係以前發生嘅事蹟。

 近期每日都唔可以準時放工，攪到今日call centre嘅同事問我點解成日開OT，其實我都察覺到呢個問題，我要做嘅duties話多唔係多，係咪我做嘢嘅速度慢咗？星期三四遲放就因為要學嘢，咁其他日子究竟我點arrange自己嘅時間呢？每一日我都要度吓如何消耗返工嘅時間，實際上我根本可以唔去思考，有時真係會有空閒，但有時又覺得有好多嘢未完成，好混亂呀，點解會變成這樣子？？

朝早一到達地鐵站口個天就下起傾盆大雨，幸好今朝我比預期早咗少少出門口，容許我企在地鐵站口避一陣雨，不過我sense到場雨冇咁快停，自己又唔想俾藉口自己遲到，簡略地留意周遭環境後，竟然俾我搵到一條有遮蓋嘅路，雖然不能夠完全遮掩，至少唔會令我變成落湯雞，相對起上次，今次我真係醒目好多，同時亦質問自己為何上次不懂得探索另一條路呢？而返工都係平平凡凡，每日都堅守要做好份內事，面對高層依然感到恐懼，對於語言上嘅溝通仍然好缺乏，一定要加把勁！