一朝起身見天色陰沈，十分擔憂有下雨嘅機會，為行山與否思考咗一段時間，最後都決定照行，仲諗住陰天冇乜陽光唔駛帶帽，亦以為陰天可以唔駛飲太多水所以帶少咗水，點知晏晝有少少陽光出現，同時今日嘅天氣冇乜風有d悶熱，因此我嘅預算完全錯誤，不過幸好同事帶備了多一頂帽子可以借我戴，而我帶去嘅水都剛好足夠，今次我哋同樣由鰂魚涌嘅柏架山道出發，途經大潭水塘直到陽明山莊，然後再上布力徑再轉落灣仔峽道直到灣仔為終點，由於昨日有強烈意識想取回飯盒隔，尋日同事話願意陪我去取回，佢建議過中環搭船去尖沙咀再行去旺角攞，呢個suggestion完全fulfill我唔想出太多車費嘅原則，因此行到落灣仔後行咗去中環搭天星小輪，過到tsim sha tsui用咗大概半個鐘先行到去昨天煮甜品嘅地方，攞完飯盒隔之後又再一次行回頭路到尖沙咀搭天星小輪去中環才轉乘巴士回家，由於這個搭車方法令同事省回不少交通費，雖則呢個方法對我影響唔大，但今次係我麻煩同事陪我ar ma，由於來來回回需要一定嘅時間，加上路程都有一定的長度，總括嚟講今日行咗好遠路程，同事和我同樣feel到自己雙腳勁攰呢！

今朝同細妹去完public library之後就出咗Causeway Bay行咗陣街，其實冇乜必要出去，但係我真係唔想stay在屋企食lunch，惟有出去行吓當係散吓心，點知出到去又遇著驟雨，而晏晝就出咗旺角學整甜品”香芒雪花卷與日式草餅”，整個過程都頗為簡單易做，因為d材料已經專人調配好，我要做嘅只有加水同攪拌，不過可能因為太耐冇下廚嘅關係，做果d步驟都覺得有點兒生疏，最後捲果個step越做越覺得自己唔點，所以製成品並不美觀，最糟糕嘅係我攞出飯盒個間隔放在旁邊竟然唔記得攞走，直到搭車差唔多返到屋企先發覺，打去查詢原來佢哋都有執到，對於自己嘅大意我感到極度唔開心及自責，的確個間隔並沒有遺失，但又要我長途跋涉去旺角攞又好似好麻煩，如果我唔大頭蝦就唔駛攪成咁啦，唉！！

黑色星期五，冇乜特別事情發生，惟一黑仔嘅係公司有部份network drives唔work，而我嘅任務只涉及少許，因此對我影響不大，最辛苦莫過於班IT同事呢！今朝返工冇駛昨日唔開心嘅感覺，攪到同事都忍唔住話我心情好番好多，朝早就為自己嘅應有任務而埋頭苦幹，晏晝因為冇帶飯緣故於是同同事出咗去飲茶，飲完茶返到office一坐下又再一次收到紅色炸彈，今次呢位同事真係唔係好熟，所以收到果一刻我都幾徬徨幾驚訝，平時我已經唔識講嘢，收到呢d嘢我更加唔知點應對，宜家都唔知點做好，而到四點幾又被上司誠邀一齊去會議室聽新product嘅簡介會，由始至終我都唔知點解我要聽，因為launch新product mainly對客戶服務部有直接關係，聽果堆人唔係客戶服務部嘅同事就係其他部門d高層，我完全feel到自己好似局外人一樣，不過聽完至少對新product有所了解，去聽嘅個幾鐘時間都唔係白廢，最終由於reserve咗個幾鐘時間聽簡介會而攪到d duties擱置而需要遲d放工，但我是心甘情願的。

一個常用嘅program尋日晏晝突然壞咗，雖然IT同事盡力維修，但因為要用另一條新link連接，SZ centre d同事一時未能用到，但部份任務又有點兒趕住做，於是SZ admin同事尋求我的協助，我繼而需要輔助 SZ admin同事完成部份duties，個步驟其實好簡單，我純粹將個file upload去program讓program自己create d record，總而言之一d難度都冇，開始用新link connect個program以為一切回復正常，誰知當我真真正正不斷用個program時，才發現program嘅speed好慢，又成日show out個error page，攪到我要continue用右手去 right-click “Refresh”，而error page呢樣嘢最終令我好忟好煩躁。

昨天臨放工前上司叫我update一個file for IT同事做record，由於時間無多，查詢完得知唔urgent所以今朝先click開嚟update，一睇竟然發覺d項目分得極度仔細，我要不斷review自己做嘅嘢而勉強去update呢！而今日精神狀況極度惡劣，唔知係咪尋晚去咗上堂嘅關係，整日都feel到自己勁眼瞓，以前飲d水都會精神少少，但今次真係冇嘢令我提起精神，後來同事建議我飲咖啡，”咖啡可以提神”呢句我聽過好多次，但我從未試過，在苦無對策之下就破例沖咗杯咖啡飲，飲完過咗一陣成個人有返駛精神，但係我太遲沖嚟飲，攪到放工時候仲鬼死咁精神。

同細妹&同事一齊join咗Sunny教會搞嘅BBQ活動，目的地係清水灣郊野公園，由於搵唔到爐又未夠時間待別人交爐，因此首先去了一條樹木研習徑玩check-point，我哋沿路都各有各閒談，原本係要執汽球，由於我哋嘅位置比較後，所以最後一個波都冇執到，因為要計分數，冇波即係冇分，但輾轉間玩埋其他d games之後竟然係我哋果組最高分，真係出乎意料之外。玩完幾個games終於等到可以燒烤，初時我同細妹share嚟食，後來同事都無分彼此大家燒完d食物一齊share食，真的不亦樂乎，在眾多食物當中，我proud of嘅係燒雞翼，而我細妹就係义燒。

一年一度嘅中秋節，我一路都唔明點解紅假往往set咗係翌日，以前每個中秋節都係要返學，今年第一年返工度過中秋節，感覺好似好唔同，以前唔會收到月餅但今年公司每人派咗一個，一個對我嚟講已經好滿足，而最開心嘅就係可以早放兩個鐘，可能因為阿爸阿媽做嘅工作係服務性行業，從未見過佢哋早放嘅關係，所以當我得知都頗為開心，係就係返到屋企冇節目，但係第一次享受呢d待遇，唔開心先怪呢！