一停止胡亂思考就會乜都唔再諗，所有事情只有兩極，想take個balance實在太困難，究竟”冇嘢係冇可能”真實性有幾高呢？呢個禮拜依然被唔同嘅問題困擾，幸好得到同事嘅分析，問題並沒有解決，同事嘅角色係引導我唔好鑽入牛角尖，自己一苦惱就會煩到其他人，但當別人苦惱時我又可以做到乜呢？唔知點解，呢兩個禮拜返工都枕住日日超級眼瞓，有嘢做同冇嘢做都顯得極度冇精神，好幾次閉上眼睛差d真係瞓著tim，突然扎起身嘅情況間唔中都會出現，究竟我為何這樣眼瞓？我要精精神神咁返工呀！

反反覆覆諗完又諗，每一次都無法得到實質具體嘅結論，成日亂思考，搞到越諗越遠，最後竟然遺忘了最基本嘅問題，為何會忽略了每件事都需要循序漸進嘅道理？覺得困難就選擇逃避、用藉口去作出不正當嘅解釋、見到前面有障礙完全不理會，最簡單嘅根本沒有正視，反而跳開諗深一層嘅問題，呢d完完全全係錯誤嘅做法，呢一刻充滿機會去更改轉變時都變唔到，將來冇可能突然立即轉變，為何不能珍惜擁有嘅機會？

經常性猜疑自己係咪有問題呢？突然嘅改變我竟然覺得有點兒虛偽，感覺彷彿就像戴上假面具一樣，脫離了真實性，態度表現出來之後會反問點解會咁做，係我太在乎嗎？返工抱住輕鬆嘅心態做嘢的確會事半功倍，將一切煩惱擱置而專心埋頭苦幹係一件好事，沒有苦思無謂嘅嘢感覺明顯地變得比較舒服，維持咗數日比較稍為好嘅心情，今日又再度陷入沉思中，只係一樁短短嘅軼事足以令我有另類嘅feeling，習慣身處矛盾極端之間，究竟如何能夠解脫？

呢兩個禮拜嘅”星期日檔案”都係講”九型人格”，為咗了解自己，曾幾何時我借咗本講”九型人格”嘅書自己研究，睇咗一陣就發覺好難明白所以放棄再睇，今次再一次係電視上聽到，立即引起我莫大興趣，我真係好想知道自己嘅性格，好想知道自己屬於邊種類型，一路以來我真係唔知自己係一個點樣嘅人，其實要了解自己真係一件難事。

由今日開始，我要handle嘅嘢少咗，時間立即變得極為鬆動，係好事定壞事我真係唔知道，不過我改變唔到任何嘢，惟有盡量令自己欣然接受，由於時間嘅許可，我終於可以嘗試update job tasks嘅file，堆descriptions極其仔細，我完全唔知從何入手，過程亦發覺自己英文能力差咗好多，一個簡單嘅形容詞我都要諗好耐先諗到，夜晚為咗趕去金鐘attend一個test，今日難得地超級準時放工，一踏正我就即刻離開，去金鐘話近唔近話遠唔遠，點趕都遲咗少少，慶幸機構都遲開始，不過就算時間有幾充裕，要我寫兩篇已經有一段時間冇乜接觸嘅英文文章真係令我苦惱，用咗唔少時間思考嘅我結果唔知寫咗d乜出來，我好擔心個結果呢！

前幾日要早起身返工冇特別眼瞓，呢兩日時間回復正常反而感到極眼瞓，搞到返工勁冇精神，做嘢時朦朦朧朧，感覺就像依賴慣性去完成任務，無論用乜方法想令自己精神都於事無補，自己又唔係辛苦過度，都唔明精神點解會咁差勁？呢幾日返工再沒有陷入沉思狀態，心情頓時變得好平靜，工作效率相對提升了不少。

無法預測嘅情況搞到要麻煩好多人，結果令我有機會體驗以往嘅事跡，其實斷斷續續試過幾次，但今次只涉及一個人，變相想偷懶都唔得，過程讓我感受到平時嘅辛苦，原來做落先知道真係會消耗體力，我亦驚訝自己在中學時期可以捱下去。

沒有準備足夠嘅copy，於是突然有衝動稍為更改一路以來嘅做法，只係做少一個程序，原來會導致次序上嘅分別，轉變一下做法其實會產生唔同嘅感覺，將自己抽離就會發覺果個step嘅用途，所以今日做嘅時候我做得好小心。

朝早嘅時間對我嚟講係最好用嘅，每一次只要我遲起身，我就會覺得時間唔夠駛，乜都做唔到咁，如果果日我要做到嘢，下次都係早d起身比較著數呢！今日無無聊聊度過咗一個不知所謂嘅晏晝，夜晚就出咗去同久違嘅中同食飯，唔知係咪大家嘅level唔同，佢哋個個都讀緊degree，所以話題多數圍繞讀書生涯發生嘅事蹟，我嘅角色好似局外人一樣，我冇試過佢哋講嘅exchange programme，佢哋可以在在學期間嘗試出國嘅滋味，聽佢哋講就會知道exchange係一件好好玩嘅事情，成個過程我只係做一個聆聽者，佢哋仲話final year完去趟旅行先開始佢哋嘅返工生涯，我身在其中其實覺得好慚愧，大家一齊完成中六中七課程，果時我唔係最差果個，但係…佢哋個個都可以讀degree，而我…唉…突然覺得自己係最差勁…

返工返到唔記得宜家係新年期間，今個新年果然欠缺氣氛呢！今日情緒再一次波動起來，無謂嘅猜測估計判斷搞到我有種奇怪嘅感覺，一路以來我唔係冇思考能力，問題係我只局限自己諗埋一邊，一件事情嘅發生一定有其原因，而我每每會朝向壞處而思考，事情可能極為普通，但我偏偏將佢複雜化…沒有提醒相信我唔會有覺悟，當頭棒喝雖然會令我好難受，但我亦從中對自己多咗了解，唔願意去做其實係我自私、我只focus on自己而沒有逆地而處企係別人角度去思考、覺得冇可能係因為驚失敗、諗唔到唔係真實而係自己逃避……

放咗幾日假，今日開工啦，初一到初三都好少出去拜年，唔知係咪大咗嘅關係，每個節日對我嚟講都冇乜特別感覺，細個就話可以開開心心逗”利是”，大咗個問人攞”利是”都變得唔好意思，返工雖然要做五日嘅daily duties，但做熟咗變得越來越得心應手，要用嘅時間越來越短，已經沒有了迫切嘅感覺，唔選擇放annual其中一個原因都係想攞同事嘅”利是”，點知d”利是”竟然會自動送上門，上年因為入咗去一陣所以收”利是”時印象都有點兒模糊，今年同d同事熟咗，感覺好似唔同咗，收嘅數量同上年對比其實相差唔大，但今年接嘅時候開心d，不過原來派”利是”都有好多講究，同輩結咗婚就唔駛派，嫁咗又話唔駛派，其實派”利是”果個人開心還是接”利是”果個人比較開心呢？全日最攪笑就係有個同事MSN我催我同佢拜年攞”利是”，而今日工作上都大致順利。