Happy New Year

零六年已經過去，自己一路以來嘅執著希望在新嘅一年可以慢慢放低，大家要一齊努力呀！

我唔要呀！點解我會變成咁ga？究竟我發生乜事？情緒，真係一個好嚴重嘅問題。

久違了嘅行山活動今日終於可以再次成行，原來同事晏晝約咗friend食飯，再加上遲咗開始，所以時間比較急促，全程都好少休息，今日講乜都引用「當局者迷，旁觀者清」呢句，唔知呢句真實性有幾高呢？ 

可能尋晚出街出得太夜嘅關係，今朝起身feel到有少少喉嚨痛，返到office就開始咳嗽，喉嚨極度唔舒服，雖然係病病地，不過今朝我夠膽開口同主動協助嘅表現真係出乎意料之外，平時嘅我就算真係有嘢想講，我總會諗東諗西遲遲都講唔出，又會擔心阻礙別人嘅時間而唔出聲，而幫忙更加少之有少，往往別人做駛後我先後悔冇出手協助，一路以來畀好多所謂嘅原則困鎖住，唔踏出鬱埋鬱埋其實會好辛苦，所以今朝講完用實質行動做完之後好舒暢，雖然可能有機會遇上別人心情唔好或者唔知別人想法，做咗可能會冇response或責備嘅後果，但係唔做又點知有乜結果，而今日我得到嘅結果對我嚟講係positive嘅。 

今日返工嘅feeling同尋日好唔同，忙碌嘅感覺一掃而空，換來嘅只有舒暢，時間唔再緊迫，我可以輕輕鬆鬆完成手頭上嘅任務，不過最意想不到嘅係一刻嘅解放後立即有一刻嘅苦惱，又再一次encounter大起大落，究竟我係咪有病？？而夜晚就同大專嘅同學gathering，在Causeway Bay食完個dinner就搭電車去皇后像廣場，而我已經是第三次踏足「聖誕歡樂小鎮」呢！

P.S. 多謝Jovis送嘅生日禮物，Dennis嘅年曆以及感謝阿叢嘅分析

轉眼間原來已經一年了，一年前帶着戰戰兢兢的心情踏入公司、第一日的突擊提問、一星期密集式的教導學習、一星期後的首個體驗、三個月試用期完結、做performance appraisal的日子、返工時間的調整、上司同事的開解……一切一切深藏在我腦海中，不以為然已度過了一年，時間的流逝速度真的很快，還以為只過了半年的時間呢！我這個情緒波動的人都能夠得到同事接納與關懷，真感謝上天的賜予，意想不到的結果令我生命出現一線曙光，我應該好好珍惜及從中學習，務求令自己不斷改變。

今朝為咗等中學同學所謂嘅禮物搞到差點兒遲到，返到去又有點兒兇神惡殺向同事查詢，之後又為咗一個箭嘴而費盡心機，五日嘅daily duties要一日清駛，再加上撞正出bill時間，一整日都不斷做做做，以往朝早做完嘅task今日要放工前先prepare好send出去，由於今日係我負責鎖門，因此做幾耐做到幾晏對我嚟講冇影響，我知道我一心急就會混亂，所以盡量避免自己去思考時間緊迫嘅問題。

四日假期話咁快就完結，呢四日都唔知做咗d乜，或者可以用”hea”嚟形容，d時間好似過得特別快，唔講仲以為放緊第二日假，時間流逝嘅速度比想像中快好多，係時候收拾心情返工啦！

聖誕節快樂！

平安夜就stay在家中度過，而今日竟然無聊到再去多次「聖誕歡樂小鎮」，無辦法啦，阿媽埋怨23號冇睇駛d表演項目，加上尋晚睇電視見到其他人好開心，為咗滿足佢惟有去多次，去到嘅目的只係睇駛d表演，但今晚嘅表演全部都係演奏或唱歌，少咗另類嘅氣氛，企咗三個鐘企到雙腳都感到酸痛呢！

尋晚睇睇吓不知不覺已是深夜時分，搭完車返到屋企沖完涼搞到成兩點幾先瞓，唔知係咪呢排太攰嘅關係，今朝我一點先願意起身，瞓咗差唔多十二個鐘，連我自己都覺得好誇張，由於瞓得太耐嘅關係，今日嘅時間短咗好多，睇咗一陣電視話咁快就已經到達夜晚，好耐都未試過瞓咁耐嘅我，對於尋晚嘅昏睡感到好滿足。