年初時段，我都唔想，但最後係忍唔住，我知道新年應該有所禁忌，但…我真係抑制唔住。

祝各位一帆風順、龍馬精神、從心所欲！

為咗晏晝可以安心去行街，朝早起身後立即開始執屋，執完一輪後先品嘗狗年最後一個豐富早餐，之後就同細妹千里迢迢去葵芳打算添新衣過年，點知…行完駛成個商場只得一件衫合心水，原本我都睇中其中一件，但礙於個sales嘅態度極度惡劣，我只好選擇放棄購買，原本心情被那個sales嘅態度影響，不過另一間店舖一個熱情款待嘅sales真係嚇親我哋，我隻手掃到邊件衫佢都會作出形容，之後仲suggest咗件衫畀我哋，見揀咗一段時間依然冇乜收穫，只好折回屋企附近繼續搜尋，返到屋企就continue未做完嘅手尾。

提早放四點，踏正四點同事迅速執嘢走人，因為今日我負責鎖門，初時我仲擔心同事會遲走，原來我嘅估計錯誤，要遲走嘅唔係同事反而係自己，一路做做到差唔多六點先走，只係比平時早走半個多鐘嘅我，初時都仲可以好專心做嘢，點知越做越心煩越來越忟越來越唔想再做，坐係個位度真係好想發癩，如果d tasks唔urgent我都唔會做住，就係為咗唔想延遲進度所以要做埋先，提早放我都想提早準時走，無奈d tasks未finish，仲要衰到越諗越發覺好多嘢未做好。

事情嘅發生總會有其原因，其實凡事諗多d，就會發現周遭佈滿了好多學習嘅地方，讀書生涯只顧死讀書，宜家出到社會做嘢，要面對嘅真係有好多，同一個唔arm key嘅同事應該如何合作？如何得到同事嘅信任？一大堆問題需要自己慢慢摸索研究，經歷係需要日積月累，冇經歷過就唔會知道有果樣嘢存在，每一次我上司放假，我都會有另類嘅體驗，一個又一個嘅體驗令我質疑自己嘅能力，一個人應該怎樣去判斷自己嘅功過呢？？？

放咗兩日假，今日要返工竟然有d緊張，結果搞到破天荒頗早返到office，雖然依稀要處理五日嘅數據，但熟能生巧令我應付自如，用咗半晝就已經順利完成，明顯地我上司幫我完成咗唔少任務，所以我d時間唔係好緊迫，宜家放完假要follow嘅手尾已經買少見少，沒有了以前忙碌嘅感覺，在我覺得應付自如時，為何總是出現另類嘅想法？旁觀者係咪真係知道當局者嘅實況？我嘅情況係咪真係你哋咁諗，連我自己都懷疑呢…

臨近新年，日日都執屋，完全冇時間做自己嘢，放咗兩日假好似冇放過一樣，要執嘅地方執極都唔完咁，間屋又唔係大，how come？

呢個星期對我嚟講算係難熬，頭幾日受到疾病嘅纏繞，之後幾日受到思想嘅纏繞，頑強嘅病菌已令我苦不堪言，但估唔到思想上嘅混亂嚴重令我忐忑不安…今日情況稍為好轉，因為突然嘅捷足先登，搞到我嘅計劃一下子亂了，而我亦需要正視及解決問題，所以只好擱置其他我認為嘅部分煩惱，盡量探究可行的做法。同我食過飯嘅人都知道我係一個遲遲決定唔到嘅人，今日我再一次到最後一刻先決定，你同我講okay冇問題，但我深知三心兩意係一個頗為serious嘅問題，但願下次我會有所改善。

好煩惱呀！一個又一個嘅建議，對我嚟講究竟係好事定壞事？事出必有因，係咪我做嘢有問題呢？為何我覺得冇必要但你哋覺得需要，其實你哋眼中嘅事實是否正確無誤？

因病情沒有太大轉變，尋晚要再睇多次醫生，今次開嘅藥同上次有少少唔同，對住d藥我竟然有種厭倦嘅感覺，我終於明白點解自己要幾經掙扎先願意睇醫生，生病一d都唔好受，好似呢幾日咁，我完完全全feel到好辛苦，唔食藥又唔得，食咗藥又覺得個肚好full，因此要盡可能避免自己生病。”病”削弱我不少精神，但阻止唔到我思考，返工有返工嘅煩惱、屋企有屋企嘅煩惱、自己有自己嘅煩惱，近期情緒唔係好穩定，一句”口是心非”代表咗好多好多，飄忽不定嘅心理嚴重影響我嘅思想，我會因為一件小事而埋怨，我會因為別人嘅不同做法而質疑自己，為何我總喜歡”計較”？