每逢星期一慣性比較多嘢做，今日撞正出bill日子，再加上其他各種因素，以致我需要不斷做做做，今朝有兩個SZ同事返咗落嚟，無疑佢哋嘅出現的確會刺激寧靜嘅環境，不過佢哋你一言我一語唱雙簧嘅狀況令我有點兒煩擾，有一段時間我被影響到無法專心做我嘅duties呢！因為趕住tomorrow寄信，上星期未完成嘅task今日務必要finish，經我判斷過我available嘅時間後，一心諗住將累積咗三日嘅wrong address同SZ admin同事攤分，點知佢哋話因為要學新嘢所以冇時間幫我，佢哋手頭上多嘢做就可以接受，宜家同我講話為咗學新嘢抽少少時間都唔得，對於佢哋嘅解釋我覺得好憤怒，憤怒情緒亦affect咗我嘅工作進度。

原來冷靜時諗到嘅嘢真係會比較清晰，當一件事發生時，唔同嘅人會有唔同嘅感覺唔同嘅表達方式，例如每次有所埋怨時，其實撫心自問有冇察覺曾幾何時在自己身上出現過，只係角色嘅唔同，今次埋怨呢個人唔接受自己嘅好意，分分鐘上次係自己厭倦別人嘅一番好意……

上網無意中睇到關於職場上應有嘅技巧，一路嘅唔習慣感覺，難道因為我欠缺那些技巧？返工再一次高估自己嘅能力，lunch仲應承同事有時間處理，點知最後都無法完成，不斷計算如何將時間好好分配，點知卻忽略咗會出現突發事件嘅機會，到真真正正想做時，部腦又同我玩對抗，開乜都開唔到…一句簡單嘅查詢可能會展開彼此嘅溝通，一d建議可能會導致胡亂思考，一個好間接嘅方法可能會更加適合…唔係唔知道問題係乜，係唔夠恆心去作出改變，用諸多藉口去逃避...

自從pass咗部份duties畀SZ同事後，我要handle嘅嘢當然係少咗，繼而令我嘅時間變得鬆動，對於呢個action我有一定嘅感受，但令我驚訝嘅係其他人嘅感覺，屋企人會問我點解咁早返(平時又嫌我遲返，宜家又好似唔想我早返咁)，而同事見我頗為準時離開都會問我係咪去上堂，因為以前放工時間即刻離開嘅日子只限於我要上堂果日，其他人都察覺到我嘅轉變，試問我又點會毫無感覺呢？多咗時間亦即代表多咗空間畀我去思考亂諗嘢，尋日再一次因為一d小事突然間變臉，係我仍然未適應還是事實？我真係無法判斷。

經歷完上星期四嘅一役，之後幾日被自己嘅觀點框住自己，徹底將我嘅感覺現實化，假設其他人嘅想法…度過了平淡而有點兒乏味嘅weekend，進入了返工嘅日子，尋晚一刻嘅鬱悶感覺使我不禁致電他人，短短數句並沒有存在任何意思，之後心情總算再沒有那麼鬱悶，今朝得到同事善意嘅關心，原本我只想略略帶過，點知簡單嘅一句已經觸發我真正嘅感覺，忍唔住將部份壓抑自己嘅問題講咗出來，於是搞到我嘅情緒波動起來，沒有理會”花面貓”與否，只知道果一刻同事願意聆聽及作出分析，後來返回座位，立即驚覺原來自己一直被問題纏繞，我根本冇改變。

費盡心機去思考，正當希望有用途時，點知殺出一個措手不及，搞到臨時要轉軚，最後用諸多藉口令自己停滯不前，結果又再一次重複犯錯，明明係知道，但偏偏唔願踏出第一步，究竟我真正想achieve嘅係乜？若繼續維持，只會導致無法估計嘅後果。

呢幾日都好大意，前日錯手delete咗一個剛剛run完嘅report，搞到要rerun多次，尋晚計數計極都唔準確，今日派answer一睇先發覺我竟然抄錯數，而今日返工就遺忘做其中一個task，粗心大意不能忽視，所以一定要盡量避免。今日心情又再一次波動起來，簡單嘅幾句說話足以勾起我嘅思緒，事情總希望改變，而自己總希望進步，但突然嘅感覺令我質疑自己，唔知係咪迫得太緊嘅關係，有一段時間我覺得好辛苦呢！

返工有一種強烈嘅感覺…一路以來都好想改變，出咗社會做咗嘢咁耐，原來自己一直都冇變過，有時覺得自己正在轉變中，但原來只能維持一瞬間，突然檢討自己，換來嘅係一連串內疚，我憎恨自己點解唔識善用機會，機會不斷在我身邊出現，每次我總會利用不同嘅藉口去避開，我覺得對唔住畀機會我嘅人，我知道我嘅性格好有問題，唔係個個都接受到擁有變化多端情緒嘅我，但我衰到竟然忽略咗願意接納願意為我付出嘅事物，自己偏要作出一堆無謂嘅想法，成日走去胡思亂想，要轉變嘅地方有好多，宜家我個腦諗緊嘅係咪最主要呢？眼前嘅一切我根本冇用心仔細欣賞過，將來嘅嘢唔係毋需理會，但at this moment希望我能謹記我要做嘅係乜。

係咪乜都慣我事全部嘢都係我錯呢？一有唔滿意嘅地方就埋怨我，事實都未搞清楚，我嘅容忍係有限度，每次付出完換來誤會或冷言冷語，我唔係冷血係有感覺，一次又一次嘅責備令我心傷……