十一日假期完結了，呢個悠長假期我只好用”懶散”嚟形容自己，比起平時嘅我，真係懶惰咗好多，之前驚時間太多唔知如何打發，結果係......每日瞓到十一二點，食完lunch之後嘅時間就瞬間即逝，無無聊聊就白白度過咗一日，放咗咁耐假，對於返工我有點兒擔心，尋日用電腦打算highlight一堆嘢，點知我竟然忘記做法，我不斷反問應該按什麼鍵，最後要細妹協助才能成功，”熟能生巧”會越做越快，但一擱置就會忘記，呢樣係我嘅缺點，尋日上堂阿sir問我哋對於讀書嘅課程記憶仲有幾多，講真果句，一成都唔知有冇，每次考試完結就會將知識畀回老師……講開又講，尋日係第一堂，對住一個native English tutor我真係完全驚覺我聆聽能力嘅薄弱，除咗唔識講，原來”聽”都係一個我需要tackle嘅問題。

唔知大家今日有冇特別遭遇呢？唔駛返工嘅日子令我每朝都極遲起床，今日又瞓到十一點啦，瞓到幾點根本冇分別，我都係完全休息狀態，乜都唔想做，簡直就係浪費時間，阿爸終於要返工，不過可以做嘅嘢唔多，睇下VCD都唔得，我真係悶到發霉，去咗圖書館還書，之後係馬路見到一幕幾搞笑嘅場面，有個市民截住一個警察，隱約聽到佢查詢執到一百蚊嘅做法，最令我驚訝嘅係個警察話趕時間同埋個市民根本冇執到錢，跟住去銀行，足足要我排咗成個幾鐘，都唔知點解速度會咁慢，六個counter佔咗三個counter處理優越理財，有錢真係大晒。 

早知就唔放假，三日阿爸都休息，真係激死我啦！佢今日仲要話我放假都唔出聲，話乜嘢可以遲d先拜山，佢自己放假都冇同我哋講，又唔係一樣，已經冇乜計劃嘅我一心諗住stay在屋企煲碟，阿爸休息變相令我冇都做唔到，盡多嘅限制導致我只可食完又瞓，過得實在太無聊，雖然有好多嘢等住我去處理，不過我好懶惰，乜都唔想做，沒有了做嘢嘅衝勁，放得太耐假我真係好唔習慣。 

辛辛苦苦衡量駛所有人嘅口味，然後煮咗幾碟餸，換嚟嘅係大家嘅唔喜歡，碟碟都食剩大半碟，都唔知煮得咁辛苦為乜？旁觀者嘅我都睇唔順眼，唉…

放annual首日，適逢細妹要補習，因此待細妹補完習就一齊在銅鑼灣行街，每次行銅鑼灣都會變飲食團，今次當然不例外，第一站去咗Krispy Kreme，點知有個鬼佬突然話請食doughnuts，用兩個doughnuts嘅價錢食咗四個doughnuts，真係抵到爛，之後就去咗SOGO食八爪魚球，尾站就係食咗IKEY嘅爆谷，返到屋企仍然繼續食，食到肥駛啦！

四日大陸之旅終於完結，為咗祭祖掃墓，不惜千里迢迢回鄉，可能因為有好幾年冇返去嘅關係，今次畀我嘅感覺真係好唔習慣，加上人成長咗，睇到嘅事實越加仔細，有d嘢別人做到好明顯，不同嘅待遇見識到人嘅虛偽……

第一日因為阿媽執行李搞到比預期遲咗少少出門口，過完關剛好十一點二十五分，知道有一班十一點四十分嘅車，距離開車時間仲有十五分鐘，但行去車站路程都要十五分鐘，同阿媽提醒時間後我哋立即加緊腳步，去到售票處幸運地畀我哋買到僅有嘅車票，上咗車就立即開車，否則我哋需要在車站等待個幾鐘，是次大巴行程十分暢順，在中途停車去廁所及入油豐富了我嘅體驗。

話咁快就過咗三日，緊接著嘅係十一日嘅假期，都唔知如何打發時間？曾幾何時為咗其中一個task而苦惱，礙於指示有點兒模糊，搞到我唔知應該點做好，經過查詢後，我終於知道我嘅做法，宜家對於果個task再沒有任何苦惱了。今朝嘅我又突然爆發，每次一提及我就會無法壓抑，我知道對我影響好大，唔講唔代表我冇事，不過我應該選擇適當時機去宣洩。一早計畫好今日放工前要清駛自己手頭上嘅任務，比起平時遲咗少少離開，因為趕住去上堂自己有d心急，點知三部lifts都落到地下遲遲唔肯上嚟，落到樓下又遇着紅燈，仲要眼望住一架空嘅小巴離去，我頓時反問駛唔駛咁黑仔，不過最終都唔係遲咗好多。

之前為咗備戰，每日只好埋首於past paper當中，一個別人覺得無謂同冇用嘅考試，而我偏偏選擇循序漸進嘅方式，一路覺得嘅理論 ”連basic嘅嘢都唔清唔楚，又點應付稍為艱深”，雖然我唔知正確與否，不過今日份卷就真係out of expectation，沒有出現預計會出嘅內容，反而涉及一d真係需要有好嘅foundation先識答嘅題目，result如何我不敢揣測，只希望同我努力付出嘅成正比。

為咗考試知道需要早走，唔知係咪因為心急嘅關係，平時做開嘅其中一個file突然開唔到，搞到我有點兒憤怒，返工時間已經被我無情地縮短，部電腦竟然唔合作，之後更覺得力不從心，難道係我對考試太掛心？始終都要做，所以只好逼使自己，但明顯地沒有平時那麼流暢。突然嘅烏天黑地影響了我，晏晝無端端覺得周身唔舒服，嚇壞了自己呢！

為咗填補今個月超額嘅開支，下個月我決定要閉關，大家千祈唔好搵我，要我出關除非大家願意請客。

今日放annual，同細妹去完筲箕灣再去九龍灣，放假仍然去返平時返工返學嘅地方，都唔知好嬲定好笑。今日見到嘅影像令我好驚訝，朝早十一點幾周街佈滿著住校服嘅學生，乜宜家d學校放咁早ga mei？晏晝四點幾就見到一d明顯要返工嘅人放工回家，乜宜家d公司放工時間咁早ga mei？放假理應清閒嘅我夜晚依然要返學，行咗成日唔多唔少都有d攰，搞到前半堂在欠缺精神嘅狀態下度過。