一句”乜你做嘢做得咁慢”干擾咗我嘅計劃，聽完之後我個心即刻亂駛，混亂到唔記得離開時有冇熄燈tim…今朝精神狀態極度惡劣，總是覺得好眼瞓，明明尋晚唔係遲瞓，究竟發生乜事？在欠缺精神嘅情況下，做嘢嘅速度明顯減慢，迷迷糊糊地做嘢，都唔知自己有冇count錯數做錯嘢。而晏晝就收到份大禮，三百多封嘅return mail，separate嘅時候完全feel到自己似一個郵差派信一樣，一疊又一疊嘅信彷彿永無止境般，d data入極都入唔完咁…

今日返學唔駛上堂因為要做assessment，完全expect唔到阿sir上星期講嘅係貼士，以為佢只不過畀d examples講解吓個模式，點知原來係exactly今日assess嘅題目，畀貼士畀到咁真係好誇張。尋日返工感覺有點兒奇怪，同事們嘅反應同平時好唔同，係我對周遭過於sensitive還是有不可告人嘅秘密？我好懷疑…

遲瞓第二朝會感到眼瞓，但瞓得多又會感到眼瞓，眼瞓究竟同睡眠時間長短有冇直接關係呢？今日有一段時間思想特別零亂，一瞬間腦海中充斥著無數嘅問題，一句簡單嘅回應句子，竟然引發出一連串連鎖式嘅觀點，在踐踏嘅同時要抑制住，天使同魔鬼戰鬥非常激烈…

想講又唔想講嘅感覺好矛盾，唔講個問題每日都影響我，講咗唔代表可以改變任何嘢，但起碼能夠讓人知曉，拖咗成日，臨放工前終於願意嘗試，非常間接嘅溝通方法，簡單嘅敘述，問題能否解決仍是一個問號，的確看似provide咗好實質嘅嘢，遲d會否如期實踐依然感到懷疑，不過整段對話令我心情舒緩咗，將我嘅處理手法套入另一個情況中，除咗使我感到共鳴，亦讓我明白每個人都會有機會演繹該手法，角色上嘅距離令我卻步，但原來有時候都想我表達多d，我諗嘅未必係事實，所以適當嘅溝通係必須。

重新嘅感覺今朝依稀存在，彷彿明白了好多，但環境因素令感覺消退，不同嘅表現行為令我覺得好陌生，別人唔係我身體內一條蟲，所以唔會知道我點諗，收埋收埋根本對件事冇幫助，唔踏出唔嘗試又點知有乜結果，問題其實冇想像中咁困難，別人唔係一隻怪獸唔會食咗我，事實係既友善又唔難相處，為何我總restrict自己去進步，偏要維持原狀，難道一覺得困難就選擇逃避？practice make perfect，唔practice又點會有perfect嘅出現，一路都唔坐言起行又點會習慣。

返學為嘅係學習知識，咁返工為嘅係乜呢？一次又一次嘅減少，每次都總會有所謂嘅道理，有減冇增嘅體驗好難受，我expect嘅根本唔係咁樣，我唔想每日都去計算……我覺得事情彷彿只證明一個事實，但我嘅諗法又是否正確？迷失中嘅我極度需要一盞導明燈，問題已經嚴重到影響我嘅情緒，嬉皮笑臉是否代表心情好呢？沉淪在自己框框中嘅我被一線曙光救助，突然之間對自己了解多咗，知而不行係一個要正視嘅傢伙，溝通嘅真正意思原來依然唔清楚，過於被動會引發更多問題，唔嘗試只會繼續原地踏步照舊唔習慣，凡事不是不能，只是肯不肯，要加倍努力呢！

兩日嘅截然不同形成一個大對比，尋日無數次嘅上上落落與今日嘅冇郁動；尋日工作嘅緊密與今日時間嘅寬鬆…尋日由於timing嘅問題，令我落完又要上，廁所突然噴水引起嘅水浸問題我係知道應該點做，欠缺臨危不亂及隨機應變能力嘅我最後感到束手無策只懂尋求上司嘅協助，之後又唔清楚有否文具嘅存貨，一切一切令我再次質疑自己嘅工作能力，晏晝就要print 一大log packages，仲要cut水果，cut水果已經有一段日子唔係我負責，一cut就利用咗不少時間呢！今日一個上午足以完成大部份任務嘅我感到非常沉悶，當然除咗小心翼翼處理好自身任務外，還可以思考如何可以表達得更多或做得更快，不過我比自己嘅心情影響了，沒有進一步研究嘅心態，幸運地想起要整chart，之前每次我只係copy d 數據再adjust日期，今日時間嘅充裕令我對每個 chart睇得比較仔細，點知比我發現原來一路以來data同chart嘅資料唔吻合，亦即代表數據同chart present嘅info完全唔同，奇怪為何仍未有人察覺嘅同時我在努力鑽研問題出自何處，經我千方百計將範圍再調整過後，個chart依然冇反應，搞到我頭都爆，擾攘咗一輪後，我只好重新建立，除咗知道chart嘅數據唔match，仲知道早前我change錯plan，接二連三知道自己出錯做錯嘢，驚覺自己其實好大意。

長期缺乏郁動嘅後遺症係肌肉痠痛，今日嘅我感到周身骨痛，難道尋日行山真係攞苦嚟辛？除咗身體上嘅痛楚，心境上同樣地相當差勁…完全知道自己胸襟有幾狹窄，件事過咗都有一段日子，點解直到今日我仍然介意，依然無法放開，芝麻小事一樁我都斤斤計較，我真係…唉…我根本知道係乜嘢問題，為何總會知而不行？一係就唔嘗試，一係就嘗試後立即想有結果，究竟我知唔知每件事情唔係只得兩極？

終於可以再次同同事行吓山吸吓新鮮空氣，陽光普照嘅天氣本來應該係好日子，不過”蟻”焗沒有風令我哋行起來有d辛苦，以致速度明顯放慢，另外因為我已經有一段長時間沒有進行嘅關係，所以感到頗疲累，返到屋企除咗休息其他嘢真係唔想做呢！沿途除咗傾訴外，我亦乘機問咗同事好多公司product上嘅問題，了解多咗減少咗一知半解，真係極度感謝！話咁快就到五月，標誌住將會好快度過另一個financial year，差唔多係時候要做performance appraisal，今年想改變形式，要我自己嚟評分，上司同我提及果時我記得我答得好爽快，不過”講就天下無敵，做就有心無力”，呢一刻我真係好苦惱應該點填好。