一日之內連踩三場，好耐未試過咁充實，但太充實係會搞到好攰呢！朝早難得地要返工，久違了嘅星期六返工，思緒立即回復至上年 七月一日 前，雖然我係可以hea住咁過，不過又冇乜點hea過，究竟我做過d乜？一返到office feel到勁焗，查看之下發覺同事冇開冷氣，但佢哋好似feel唔到咁，原來同事唔知道平時會熄冷氣。晏晝就要返學，今日上堂嘅精神麻麻地，臨放break前阿sir行埋嚟問我”are you ok?”，係我奇怪點解佢咁問我時，同我一齊上堂嘅中同已經解釋了原因，原來我個樣呆呆地，搞到阿sir以為我唔明白佢講乜。上完堂緊接住同幾個幾年冇聯絡嘅中同食飯，席間從中同嘅對話知道佢哋嘅友誼keep得好好，彼此對對方嘅了解好深，我彷彿在她們當中格格不入，友誼係要彼此維繫。三場嘅時間排得好緊急，中間只有一個鐘頭空間，不過三場都唔同地點，搭車都用咗d時間。

呢兩日接二連三遇到擺明扼人嘅人，尋日放工去到地鐵站入錢準備增值時，有一個男人行埋嚟攤開手板問我攞錢，話唔夠錢搭車去荃灣，係我refuse完一個第二個男人又走過嚟問我，另外，今日途經銅鑼灣比個女人截停話我身材適合幫佢哋公司試衫，之後仲立即叫我跟佢上office，估唔到以前警訊嘅片段會出現自己身上，出街真係要小心比人扼。

今日我嘅心情唔係咁好，尋晚屋企人嘅一番說話令我情緒有點兒起伏不定，我只可以話我係一個好介意嘅人，如果可以諗開d，相信今日我唔會煩惱，盡量迫使自己不能在公司表露無遺，但真的這樣容易控制嗎？多咗一日假，要處理嘅daily duties多咗，適逢今日要出bill，堆積在我桌上嘅sales record要盡快輸入info，幸好已經功多藝熟，唔駛半個鐘我經已update完，星期三做appraisal用咗兩個幾鐘，有少許任務被我hold起，所以今日枕住有嘢做，好想一次過完成所有任務，奈何時間係有限制，每個task都需要時間去慢慢accomplish，唔係瞬間就會突然完成。

溫書進度極度緩慢，一心諗住趁佛誕呢個假期好好把握時間，點知都係hea住咁過，睇咗一陣電視就係時候出去旺角同Sunny補祝生日，加上Jovis同佢男友，一行人去咗食Delifrance，食吓又傾吓，轉眼間原來坐咗兩個幾鐘，多謝你哋畀我 (look) card，仲有下次我都係唔點嘢食，Jovis你唔食得羊肉又唔出聲，其實你應該ban咗我個建議，回家後突然心血來潮攞咗份paper出嚟做。

星期一就通知我今日將會做appraisal，尋日放工仲要提一提我叫我諗吓有乜想講，係我心目中，做appraisal彷如讀書時期派成績表一樣，心情難免變得緊張，結果…尋晚瞓得唔好，瞓吓又醒吓，搞到今朝帶住欠缺精神嘅身軀返工，幸運地精神回復得好快，成朝都無感到眼瞓，要我思考嘅係如何用縮短咗嘅時間去完成我手頭上嘅任務，有一刻我心急到忘記attach file就send out email，真大意呢！最出乎意料嘅係我緊張心情不知為何舒緩了不少，心情反而變得處之泰然，覺得唔係一件大事，又唔係比人審判，咁驚都唔知做乜，驚訝自己嘅心態轉變…晏晝就係做appraisal嘅時刻，今年嘅rating明顯比上年進步，就算沒有進級都能夠維持原狀，同我填寫嘅出入唔大，而我整個過程並不是啞口無言，我終於能夠嘗試表達自己，上司講嘅嘢其實係近半年都聽過接收過，好多嘢靠嘅只有自己，不能改變別人只可改變自己去配合，而recommendation係要我諗多d同埋同多d人溝通，雖然我逐漸改變中，但始終仍未到達一定嘅程度，所以要加倍努力學習。

夜晚上堂攞咗准考證，考試日期竟然係 六月五日 ，我宜家上嘅最後一堂係 六月六日 ，亦即代表我要在未教駛書嘅情況下應考，仲有就係距離考試日期只有差唔多十日嘅時間，我嘅溫書速度暫時仍然緩慢中，時間實在太緊迫，希望唔會cover 未教嘅內容，而我亦要加把勁做多d題目。

思想混亂係我今朝嘅狀況，腦袋不斷思考一連串嘅問題，有種好唔實在嘅感覺…其實有冇學習空間真係見仁見智，每個人需要學習嘅嘢都唔同，其他人根本無法判斷，最清楚嘅始終都係自己，不過…唉…好矛盾。想進步必要勇於嘗試，希望聽日我唔再係啞巴，提早通知一定有其原因，要我準備一下，其實有乜應該準備？

選擇沉默是否正確？我感到好confuse，唔出聲至少唔會得到駁嘴嘅罪名，但問題只會越加嚴重，唔想做第一個同時又想突破，好矛盾呀！上星期五經我費煞思量填寫嘅appraisal form，我到今日都仍然質疑自己fill in嘅rating，email都send咗出去，根本冇更改嘅餘地，都唔知自己煩乜。今日同上星期嘅感覺好唔同，少許嘅分別我已經變成咁樣，知道問題所在地嘅我務必要努力改善，改變最主要靠自己，其他人純粹係輔助角色，機會不斷在身邊擦過，是否懂得珍惜就要睇我自己。讀書時知道有唔明就應該舉手發問，出到社會做嘢有唔明都應該開口發問，唔明又唔問，結果只會有更多不了解嘅地方……

見有八五折，今朝同細妹去三聯諗住買書，點知有部分盤點中，有部分已經攞咗去咗新舖，剩餘嘅數量唔多，睇睇吓睇到有d 文件夾，我只係轉一轉個tray，個staff立即衝出來轉回原位，繼而用不善嘅眼光望住我，都唔明customer service點解可以咁差勁，之後諗住用AE card 繳款，點知又唔收 AE card，連三聯呢d大店舖都唔收，我真係佩服AE card嘅廣泛性，之後當然覺得勁憤怒，細妹為咗平息就話請我食嘢，之後用佢學生身份去許留山買咗兩杯迷你芒橯，好yummy呢！跟住去買出名嘅雞蛋仔，由於之前我試食過，覺得冇乜特別，咪同細妹講唔知佢鐘意與否，我試過就覺得麻麻地，點知前面個男人用不善嘅眼光望住我，短短幾個鐘被兩個人(掘)住，我好驚畀人打呀！

因為信件唔夠特定數量，為咗可以一log過寄出，朝早專登額外提早print埋d welcome letter，最終僥倖地畀我砌夠數，之後dream weaver又發生隔日出現嘅問題，even IT同事將dream weaver重新安裝，問題仍未能解決，問題真係隔日出現，好恐怖呀！今日返工非常首尾呼應，開始同結束做嘢都係同IT同事嘅對話，越加覺得有d嘢我唔係做唔到，只係我用乜心態去對待。

怒髮衝冠同六神無主係我今朝嘅神態，因為唔知醒八點三十五分先起床，為咗唔想遲到，刷牙洗臉換衫甚至行去搭車我都以極速accomplish，行路嘅速度彷如fast-forward一樣，幾經辛苦最終都可以在九點前一分鐘log-in，雖然喘駛氣但高興沒有遲到，遲咗起身當然冇時間食早餐，初時我諗住唔食，但同事知道後立即要求我一定要食，其中一個同事同我講”你講過早餐對你好重要ga”，一句我曾經講過嘅說話，我個心竟然混亂到忘記了，之後都好聽話落咗去買飽食，發覺原來我係唔愛錫自己。返工做嘢都幾順暢，呢幾日無論係地址抑或return mail都有一定嘅數量，所以都需要利用不少時間完成，今日又壞多支光管，因為上司放假所以我要負責拆掉下來，最敗就係冇存貨，拆完又冇新一支去support光度，我惟有建議由另一處抽取。

估唔到一句說話令我介意到影響自己嘅情緒，越想忘記嘅同時，佢偏要刻骨銘心，力量彼此抗衡著…刻意將事情包裝修飾完才演繹，但最後還是知道我嘅中心，不得不驚訝擁有的能力，在乎一個唔清楚我狀況嘅人嘅說話，究竟係咪值得呢？其實明知同事多數係開玩笑性質，但自己偏偏用假設去遮掩鐵一般嘅事實，點解要令自己咁辛苦呢？今日返工精神狀態好咗，至少眼瞓出現次數減少了不少，呢兩日都有壞光管嘅出現，好少有呢！