五日假期話咁快就過咗四日，時間真係過得好快，星期五係去完澳門後嘅休息日，尋日就要返學，不過中途淋咗陣雨搞到極度頭痛，差點兒就病倒，今日同細妹出咗旺角逛街，幾日假期整體嚟講彷彿乜都冇做過…今日逛街總算有所收穫，唔駛白白浪費車費，行行吓細妹話我嚇襯人，我問佢發生乜事，佢話我d語氣出咗問題，諗落曾經何時我d行為語氣都令人產生誤會而被人提點過，每次做或講果一刻根本睇唔出有問題，往往需要別人轉述先知道有問題，呢d就係”講者無心，聽者有意”。

即日來回嘅澳門之旅終於完結，全程都係飲飲食食，計落一日之內食咗十幾餐，對我嚟講都算誇張，因為平時我唔會食好多嘢，雖則我哋運用少食多餐原理，不過都會出現飽肚嘅一刻。一路以來我覺得澳門係一個頗為特別嘅地方，不過去過之後感覺完全改觀，我一踏出港澳碼頭，已經覺得澳門好似大陸，行逛完大陸feel嘅感覺越加強烈，最令我深刻嘅係指示牌唔充足，搞到我哋成日行錯路。

無論去程抑或回程，走去乘搭噴射飛航嘅時間比預期嘅早，原來上噴射飛航時間可以flexible，於是我哋可以搭前幾班嘅噴射飛航而唔駛等待預定時間嘅，初初計劃今次行程嘅時間相當緊密，所以一開始已經remind行程必須on schedule，點知…有d地方冇開門做生意，有d路程比預料嘅短，我哋唔止冇on schedule，反而時間提前駛，於是中途睇住本天書加插了不少額外嘅活動。

澳門佔地面積唔算大，本天書嘅地圖因為冇scale嘅關係，顯示一大段距離搭的士可以一分鐘就到，其實只要摸清楚個方向步行根本冇問題，當然隔岸嘅一定要乘搭汽車，我哋只去咗新口岸、新馬路、荷蘭園、氹仔同路環，每個地方我哋只會逗留一陣，因為品嚐完應該品嚐嘅就會離開，有d嘢食味道好普通，但有d食完真係會垂涎三尺、想再食多次呢！今趟旅程美中不足嘅都係天氣問題。

礙於尋晚遲瞓，今朝嘅我不斷打呵欠，冇乜精神只會導致速度減慢，成朝做咗嘅duties唔多，結果堆積起來，要用晏晝嘅時間一次過完成駛，呢d就係放假前嘅代價，呢個情況會令我不其然諗起我嘅自私，最終彷彿影響好多人呢！今日心情同尋日完全唔同，擁有正面心態嘅我有種脫胎換骨嘅感覺，好多時候需要嘅可能係自我鼓勵，就算有人灌輸正確觀念，只要選擇咗唔聽就乜都唔會改變，”當局者迷，旁觀者清”，其實抽身去思考同一個問題分分鐘出現另類嘅想法，另外仔細觀察身邊發生嘅人和事同樣地有機會見到自己嘅影子，有冇出現機會睇你點睇。今日晏晝因為有d心急，搞到自己損手爛腳，最無奈有一處傷口同割脈自殺位置差唔多，個個同事見到都問我發生乜事。

尋日我只可用”罪孽深重”嚟形容自己，一件簡單到無法再簡單嘅小事，我竟然可以用嚟困擾自己大半日，一早如果我選擇開口查詢，根本唔駛煩擾自己一段長時間，一提及同事已經知道我嘅問題，簡短地講解咗來龍去脈，我立即恍然大悟，我有所質疑引證咗我嘅唔信任，我嘅心態完全錯誤，之後一輪正經到似訓斥嘅對話，令我越加感到自己犯下大錯，我嘅膽怯是否一種藉口？”解釋即係掩飾”呢句講得非常正確，解釋嘅時候係用藉口去掩蓋一切，用一堆又一堆藉口封閉自己，但願體驗過後明白自己嘅問題，繼而勇於面對不再逃避。

由於屋企部電腦壞咗嘅關係，搞到好幾日冇update呢個blog，上星期五返工終於有機會去研究唔同嘅report，睇吓點樣generate出來，同時亦應該珍惜機會去 think of alternative methods，要用多d腦筋呢！lunch出咗去食日本嘢，食到好滿足，好耐冇試過食到咁放咁開心，而夜晚就同大專同學食dinner，揀咗好耐最後始終選擇酒樓，大家吹吓水食吓小菜，臨走前仲食多個糖水tim。星期六就出咗北角報名，因為我決定讀埋level 3，讀完level 2 就放棄好似半途而廢咁，我唔可以驚困難就give up，要在微薄嘅收入抽出一筆錢讀書，對我係會辛苦d，不過希望對將來有所幫助，一定要努力加油。

今日返工上司又畀我嘗試報錶，自從做完appraisal，大家彷彿了解多咗，我唔介意做任何瑣碎事，因為我相信每件事情總有空間讓我好好學習。不過我嘅情緒又出問題，after lunch又波動起來，今次嘅牛角尖鑽得好深，將以前放低咗嘅思想重拾，情緒不但影響我嘅心情，而且減低了我工作效率…

星期一remain嘅duties比預期嘅少，所以今日可以慢慢一樣一樣處理，return mail 呢個duties唔係想像中咁急切，不過避免累積，亦避免其他同事有誤會，所以需要盡快完成，雖然放咗端午節呢日法定假期，但沒有一點兒忙碌嘅感覺。而夜晚就上LCCI level 2嘅最後一堂，最後一堂係派卷嘅日子，對於個校內試成績寄望唔高，雖然我知道應該比public exam嘅好，但估唔到我可以攞到八十幾分，被評估為”distinction”，如果呢個係public exam嘅成績，我一定會更加開心，之後放學又畀我搭咗一部新型巴士，上斜坡上得好快，d seating有d似機場巴士，最勁就係每個窗口都有一塊伸縮簾。

每一次放假，總會令我有所體會，今日嘅我有點兒激氣，由一開始就需要我去處理，曾幾何事我不斷行逛不斷作出比較，到最後因為擔心真偽問題所以決定選擇大公司，間唔中就會叫我搜查吓價格嘅變動，雖然明知最後都會照舊選擇，不過我仍然甘願去搜尋，到最近呢次，發現價格升幅比想像中多，我已經專登致電詢問，點知舞完我一大輪，今日又話都係唔好轉變，徹底將尋日告訴我嘅一切改變，究竟想我點做？

返一日又放假，好唔鐘意呢個安排，休息對我嚟講唔係一件好事，以我嘅情況，我寧願選擇返工…一早就遇到fax機jam紙，彷彿係忙碌嘅序幕，之後換光管、數據嘅出錯、dream weaver隔日出現嘅問題、額外嘅tolling report、洗咖啡機、派遞服務查詢、prepare packages、order物品等，突然間好多嘢需要我處理，最憎就係出現時候永遠撞正我比較多嘢做果日，無論我如何加速，時間流逝嘅速度比想像中快，今日擱置嘅任務比平時多，濕碎嘅嘢真係會消耗唔少時間。

連續第三日感到苦悶，我真係好擔心自己會有病，對住自己悶悶不樂嘅情緒，真係感到非常棘手，情緒嘅低落不但令我煩惱，而且仲會影響我嘅工作效率，用”明知故犯”嚟形容真係十分貼切，一種無法詮釋嘅感覺，明知維持會有負作用，但偏偏不能抗衡，結果就拖長駛每個任務嘅所需時間，搞到自己做嘢做得好慢咁，真麻煩！慶幸要tackle嘅duties唔算多，even做慢咗都唔會有大影響，今日返工provide咗好大空間讓我獨自苦惱同思考，不過暫時一切已是過去式，臨放工前我想要嘅自己終於回巢，果一刻有種重生feel。

為何今日仍然有悶悶不樂嘅感覺，沒有特別事情發生，係我過於胡思亂想嗎？好想真正表達自己，無奈用咗另類嘅方式，搞到忽略了原有意思，其實事實並非如此，唉…點解會口不對心？見到別人有權有勢，覺得自己技不如人，但我有冇諗過別人在背後付出幾多，加上唔同職位有唔同職責，但做好本份是否已經足夠呢？今日因為心急而闖禍，搞到冇咗差唔多半個鐘lunch time，只係換條光管，我又唔係未換過，但今次竟然入錯位(click)住，不斷仔細轉動都移唔出，最後同事轉一轉就移出來了，由於我不能擱置又唔想放棄，所以消耗咗我不少時間，下次要記住唔好心急呢！

今日嘅我極度冇mood，同之前幾日對比簡直判若兩人，任何事情都不能令我提起勁來，喜怒形於色嘅我一早已經比上司發現我唔妥，無奈嘅係我搵唔到根源，無法做到對症下藥，even不斷提醒自己情緒嘅禍害，但依然改變唔到，維持咗一整日，我真係要嗌”救命”，過程令我好痛苦…今日放學時候剛好下起雨來，好有衝動企係路中心淋雨以減卻冇mood嘅情緒，我好清楚知道自己有問題，除咗上司同事留意到，就連我細妹亦察覺到，究竟我發生乜事？