今朝部fax機receive唔到fax，但同事叫我幫手接收fax，見部機唔work諗住嘗試整好佢，我以為冇墨走去換墨，點知換完都係唔work，最後都係要上司出手，原來係memory嘅問題，我嘅c，都唔知浪費咗幾多之前墨盒嘅墨水tim。由於要顧及堆fax，搞到拖長咗其中一個task utilize 嘅時間，不過之後都唔駛刻意加速，一路都用好constant嘅speed去finish d duties。今日依然有一段沉思嘅時間，對於自己嘅能力真的無法評級，我唔想自己係一部機器，基本嘅溝通、自我嘅鞭策、做事嘅態度…每樣嘢都係一個學問。

勁搞笑，返咗學三堂，三次都係搭巴士去，但三次都係唔同嘅巴士站落車，我呢個搭慣地鐵嘅人果然係唔習慣搭巴士。好多嘢已經儲存係我記憶中，我唔係一部電腦，唔要嘅嘢就click “delete”刪去，我真係好想變得豁達，但…我仍然會好介意…

今日我嘅精神狀態極度惡劣，返工途中嚴重眼瞓，有好多次真的打起瞌睡呢！在半睡半醒嘅情況下做嘢，出錯嘅機會相對地提升了，有一段打瞌睡嘅時間適逢輸入data時，每次我扎醒都要重複又重複檢查有冇入錯數據，唉…今日嘅狀態實在差勁。每個星期要handle嘅嘢都會呈現descending order，星期一要處理嘅任務多d，之後幾日份量越來越少，因此今日要做嘅嘢少之又少，原本自己預測returned mail嘅數量有大概十封，我嘅prediction並沒有錯誤，不過最令我震驚嘅係只有兩封，真係out of expectation呢！

今朝又瘋狂咳嗽，返到office仍然感到極度唔舒服，痕癢嘅喉嚨加上想咳又咳唔出，真係令我好辛苦，照舊堅持唔睇醫生嘅我，捱咗三個幾鐘之後終於屈服，睇完醫生諗住食完lunch先食藥，點知同事催促我要即刻服用，仲為我遞上乾糧，之後更幫我計算埋下次食藥時間，真的非常感謝！而我…整個過程做咗一個好被動嘅角色。雖然利用咗大概半個鐘嘅時間去睇醫生，但我返工嘅時間仍然頗為鬆動，一有空閒時間我就開始胡思亂想，今日無端端又諗起煩惱嘅嘢…為何我眼中只會見到別人嘅能幹，對於自己依然無法肯定，一相比之下總覺得自己差勁… 

好辛苦呀！返工就超級喉嚨痕癢，返到屋企就勁咳嗽，病徵若隱若現，我真係比d病菌玩死。今日做做吓其中一個task突然諗起會否做錯揀錯，點知…過咗唔夠半個鐘，同事真係同我講我做錯咗，每次做完我都會check多次，雖然尋日病病地，但我已經刻意放慢嚟做，估唔到真係會出錯，以後一定要加倍小心先得。呢兩日我察覺到我嘅說話技巧真係好有問題，正所謂禍從口出，係咪沉默是金會比較好呢？我知道太直接會產生誤會，無奈每次我都抑壓唔住衝口而出……今日又突然沉思起來，感覺依稀存在，係我諗得太多嗎？

口乾、頭重、喉嚨痛直到今日喉嚨痕癢引起咳嗽，由始至終都唔知自己有冇病過，莫名其妙！星期六日照舊hea住咁過，睇咗一陣電視話咁快就到達深夜時分，時間只會不斷流逝，我哋做到嘅只有學會珍惜及善用。尋日阿爸嘅一番說話雖然令我唔好受，但令我彷彿明白咗一d嘢，呢d嘢係我應該正視但原來一直忽略咗嘅，做人嘅學問真係完全唔簡單，一路以來我只識問點解點解點解，一連串問號經常滿佈在我腦海中，其實最簡單嘅技巧我都未能掌握…勤力畀心機做到最好原來係唔足夠，每樣嘢都包括唔同嘅元素，就算呢樣做得好，只要另一樣做得唔好或差勁，provide出來嘅態度或感覺就會唔同，今日無論返工抑或在屋企，都因為缺乏了某種技巧而犯了不少錯誤，我要努力逐一克服各類技巧嘅難關。

今日嘅我好唔舒服，成日都覺得口乾，身體內部總覺得有d問題，但病症完全唔明顯，直至返到屋企，頭重重嘅感覺令我極度辛苦，呢幾日天氣都keep住穩定，溫度沒有大起大落，冇理由會無端端(攝)到，真奇怪！除咗身體上嘅唔舒服，心情同樣地覺得唔舒服，整日嘅情緒維持於中下水平，見到一d令我氣憤嘅行為…以前讀書升上唔同level都會係一個新開始，不過所謂嘅新開始原來唔係最艱辛，其實出到社會大學先至係一個新開始，好多嘢需要重頭學過，以前教導嘅理論可能已經不再適用，將根深柢固嘅認知改變，唔係想像中咁容易，捨棄舊有而接受嶄新嘅道理，所需嘅時間要幾耐？到呢一刻都依然覺得唔習慣嘅我，今日鑽咗入一個好深嘅牛角尖當中，嚴重到想放棄駛一路以來keep住嘅原則，唉…

當同事將一pack又一pack 嘅returned mail放在我身旁，我不禁驚訝數量之多，今日又唔係黑色星期五，做乜突然會有咁多mail？粗略估計應該有百幾二百封，只係cut開個封口都利用咗我唔少時間，幾經辛苦update完睇返個總數，原來有三百幾封，真係嚇咗我一跳。Whole day keep住有嘢做嘅感覺真好，除咗朝早畀Dreamweaver玩咗陣，之後一路嘅流程都好順暢，臨放工前諗完print張嘢fax埋出去，點知部printer又蝦我，even從新開機都唔work，最後惟有選擇擱置。

尋日終於順利處理好可以玩殘我嘅任務，繼而容許我開始deal with其他duties，時間再沒有了緊迫嘅感覺呢！今日最主要嘅任務係update資料，四號嘅registration forms仍然on my hand，一疊又一疊嘅forms交到我手上，初時我真係嚇咗一跳，做落其實都唔係好多，專注就會得心應手，速度自然變得快速起來。今晚上完堂搭巴士時竟然冤家路窄，比我見到一個我唔想見到嘅人，一幕又一幕影像立即出現在我腦海中…

放完假後第一日返工，又出現busy嘅情況，首先come across嘅係一百七十幾封email，check email嘅時間都用咗唔少，要從中sort out useless同useful，稍一唔小心都會delete錯誤呢！今朝一開始時我真係六神無主咁，d tasks唔係自己做，總有種要double check嘅感覺，眼前一大堆任務，究竟我應該做邊樣嘢先呢？之後腦海不斷盤算著每個tasks嘅先後次序，當打算做task A又要抑制自己唔好諗task B，因為我做嘢要好專心，少少分心會好容易做錯。今次remain嘅task只有一樣，但係呢個task d data係要cumulative，之前我放假所有日子嘅數據完全欠缺，即代表我必須update以前才可做近期的，放咗十一日假要update十二日嘅record，個task真係可以玩殘我，如果我update唔駛，跟住幾日d data只會停滯不前，我都想hold起聽日先做，今日我已經send 唔到個report出去，再拖只會繼續冇report可send out，其他任務可以暫且拖延，但剩下來呢個task根本唔可以擱置。