一個突然出現嘅情緒低落，其影響力之大難以預料，是否有因才有果，當事人自己應該最清楚。到達前嘅期待，到達時嘅體會，到達後嘅平凡，過咗去一切已經變得唔重要，任何嘢已經可以不再發生。為咗方便而順手地作出移動，過後忘記放回原位而出錯，認真大意呢！郁動完有責任好好謹記，遺忘容易引起錯誤。衝口而出嘅一句，收回極度認真嘅回應，完全知道講得過度誇張，even敷衍嘅說話都唔應該不負責任般。

話咁快又一年，大咗一歲同時又老咗tim，今年終於如願以償，可以去Ocean Park玩，腦海中完全冇Ocean Park嘅印象，因為上一次去應該係三四歲嘅時候，多得細妹嘅陪伴，生日去Ocean Park可以免費，如果去Disneyland就會有唔同嘅員工同你講”生日快樂”同卡通人物自動走埋嚟同你影相，我相信去Disneyland會比較感受到生日嘅氣氛，反而去Ocean Park得到嘅只有免入場費優惠，因此當我置身其中，只會感覺到提早慶祝Christmas，完成忘記了原來係生日日子，趁人少迫細妹玩咗比較刺激嘅跳樓機，得到嘅係一剎那嘅離心力，可能Ocean Park focus嘅係觀賞，機動遊戲刺激程度不及環球嘉年華，最深刻莫過於”冰雕王國”，因為著咗羽絨仍然感到寒冷，仲有機會化成為愛斯基摩人。

星期三嘅反思---終於頂唔住，當初嘅堅持完全地告吹，遲早都會去到該地步，只係遲與早之分別，一開始為何要選擇堅持呢？今日終於到達一年一度嘅盛事，不惜一切消除堅持唔多唔少都因為呢個盛事，由一開始策劃，直至真真正正地發生，當中嘅籌備工作多不勝數，從未估計過增加一個項目可以徹底地耗盡大部份時間，也許大家只會興高采烈地享受，從未知道搞手所付出嘅有幾多，也許得到體會才會明白實況…付出同收穫會不成正比，惟有學會知足常樂，斤斤計較不能改變事實，所得嘅體會實在獲益良多。

非常感激可以去處理，雖然只係一整體嘅少部份，但已感到慶幸，也許在別人眼中是微不足道，不過正如各花有各眼一樣，些微嘅新接觸新嘗試增添了色彩，得到了唔同嘅第一次，覺得頗為愉快呢！

自從知道生日果日可以免費入場後，每年都會希望果日有人同我去海洋公園玩餐飽，不過…還是發白日夢吧！ 

這星期充實得感到有點兒累透，被唔同種類瑣碎事打斷，duties只可在斷斷續續環境中完成；遇上唔少棘手問題，要尋求解決利用咗唔少時間；provide新嘅嘗試，心存感激之際同時珍惜每個機會，過程中學會了不少呢！體驗出在與不在嘅心理轉變，為何總是那樣子，不是兇猛野獸，是什麼原因驅使出來？沒有原因，是否太多餘呢？ 

轉數唔快，變相要他人重複又重複解釋同一意思三四次…呢一刻覺得明白清楚知道，但再諗一諗，原來依然一頭霧水，如果真的了解，是能夠作出轉述及解釋。減輕他人工作量嘅同時會增加另一人嘅工作量，當然作出決定之前會有所衡量，點知…攬咗上身結果係冇時間處理，錯誤經已造成，還要塑造理由去掩飾過失，果然係死都拗返生。希望深入去了解，覺得當中存在問題，不過只要他人不在乎，覺得沒有問題，”了解”還可以繼續嗎？

為咗可以享受一連三日，而選擇星期五去放假，但每次星期一返工總會覺得有點兒混亂，要慢慢pick up先可以變得流暢，是太stressful嗎？埋頭苦幹將事情完成，在指定時間交出功課，就無形中覺得已經做得好好，但其實當中會有所忽略，只係一個整體嘅一部份，了解嘅程度非常有限，在一知半解情況下重複又重複，毫無突破之餘亦沒有尋求改變，原來洞悉嘅太少了。

唔同環境會出現唔同反應…為何在家中總是那麼無法抑壓？脾氣實在太暴躁，果一刻能夠做到欲言又止，負作用就會相對地減少，要出聲唔願開口，唔駛出聲偏去開口，真的需要學習好好控制…