一個無理取鬧令自己辛苦，點解當初會決定咁做？唔係控制唔到就要斷然放棄，nothing is impossible，唔努力嘗試講乜都冇用…如果能夠解決A問題，其他問題自然會迎刃而解，不過要好好解決A問題談何容易，習慣咗既有嘅行為，要改變唔係瞬間嘅事，更何況唔係每個人都樂意轉變。想講又唔出聲，到頭來後悔當初冇出聲，究竟為咩？一次出錯可以接受，但重複犯錯唔可以容忍，次次到最後先醒悟，咁樣真係冇進步過呢！

刻意搵d新穎嘅嘢研究以求轉換心情，但原來一d都唔work，前日已經知道心神恍惚，尋日先驚覺自己嘅失魂落魄，我竟然遺漏做其中一個task，情況係嚴重到近乎忘記，如果上司沒有提醒，我根本冇諗過要做，我真大意呢！因為呢個大頭蝦，引致我去思考自己近期嘅狀況，發覺無論係精神抑或工作上，情況彷彿正在變差一樣，我要好好改善呢！已經在lunch time sleep咗一陣嘅我，夜晚上堂時依然覺得好眼瞓，搞到半堂時間一路打瞌睡一路聆聽，當然入到腦嘅係少之有少，呢個情況真係要盡量避免，因為聽唔少咗就會好容易唔明白。今日精神狀態出奇地理想，返工少咗感到眼瞓，要handle嘅duties唔算多，我亦乘機試試新系統，不過要utilize得好先要專研一條formula出來。我好容易將自己嘅standard套在其他人身上，一遇見任何同我有出入嘅情況，我會不其然質問點解會出現，每個人都有自己一套standard，我能夠做到嘅可能只有睇開d，唔好成日斤斤計較。

尋日朝早一眼就比同事睇出有煩惱，我嘅掩飾能力實在差勁…件事既然迫到埋身我就唔可以置之不理，不過我清楚知道可以做嘅有限…返到公司心情迅速舒緩咗唔少，對住唔同嘅人會有唔同嘅感覺，更何況我應該專注我嘅工作，當正在埋頭苦幹時，突然察覺自己要改善嘅空間仍然好大，例如我唔識主動提出協助，另外亦覺得自己做嘢速度慢咗，只係多咗少少info，冇理由會耽誤出奇地多嘅時間，完全係一大疑問。尋晚因為見近在咫尺決心提問，得到係預期中嘅答案，點知..講講吓越講越遠，仲扯上好多往事，最終我又再一次忍唔住失控地嘗試表達睇法，由於沒有在平心靜氣情況下進行所謂嘅討論，結果變成一場歷時個半鐘嘅爭吵，而我入睡時間已經係三點半，因此今朝需要拖住疲累身軀返工，其次亦因為我喊咗好耐，今朝雙眼明顯地浮腫，暴風雨過後我嘅心情可想而知，我明白情緒會對工作有影響，所以我刻意迴避自己繼續維持該情緒，不過要做到強顏歡笑談何容易，在我以為自己已經完全放開時，原來事實並非如此，我嘅心神仍然恍惚，竟然可以未入駛data就急於send out email，呢個錯誤真係好離譜呢！

有key在手對住度門竟然束手無策，果一刻覺得勁無奈，只差一步就可以好好休息，但係果一步彷彿寸步難行一樣，幾經嘗試直至手痛我才捨不得地放棄，最終知道原來係自己大意所致，即時反問為何當時只懂重複地action而沒有另類嘗試。尋晚同好耐冇見嘅SOGO同事gathering，首先要做嘅update彼此嘅info，因為都差唔多成兩年冇見，之後食飯期間傾咗好多嘢，我聽咗唔少分析同意見呢，雖然同事年紀比我輕，但明顯地佢哋比較成熟懂事…

靠著自己唔依賴他人，當中需要付出嘅無疑會更多，但係無理由要他人一路帶住嚟行，人遲早係要獨立…對於自己有時能夠冷靜地進行分析同安撫他人，自己都覺得好奇怪，係勉勵他人嘅同時其實無意中勉勵緊自己，從而達到win –win situation，現實中冇話邊個影響邊個，有冇受他人影響完全取決於自己嘅決定。技巧未成熟固然要多作嘗試，既然有permission，為何偏要固步自封？機會唔係經常性出現，眼前嘅機會難道想它消逝，如果唔係，就應該好好珍惜不要浪費…今日少不免出現眼瞓情況，多得lunch time小睡了片刻，以致精神稍為比較好呢！今日竟然好天冇落雨，但我偏選擇落雨天搬電腦，真係十分諷刺。

堆積咗一大疊，仲以為會利用好多時間，但原來並非如此，事情同預料嘅總有出入，覺得多時沒有想像中咁多，覺得少時可能需要消耗唔少時間。尋晚又要返學，返完工再上堂真係頗消耗精神體力，對於個導師，明顯地佢知識非常豐富，佢可以一落筆就寫出所有格式，然後快速地填上相對嘅data搵出最後嘅answer，由於佢對課題相當熟悉，因此做數時速度相當快捷，要follow係要有清醒頭腦，不過暫時未出現跟唔上嘅情況，只係發覺自己做少咗revision。屋企部腦尋日已經比同事維修好，尋日因為要上堂要留待今日先搬回家，點知又撞正落雨，惟有用垃圾袋套住，不過返到屋企又發覺上唔到網，幾經辛苦努力麻煩之後終於整好，有電腦用真係好開心，唔知係咪上次搬已經整傷咗自己，今日再搬時feel到勁攰勁痛，幸好今次有人接手。今日返工全日都勁眼瞓，每個星期返完學之後果日都會比較攰，再加上今朝隻腳無端端抽筋，搞到我瞓得唔好，做做吓差d打瞌睡，精神狀態非常唔好。 

一個清晰嘅signal，開始知道時的確有d唔自在，不過我明白係一片苦心，而我同樣地感到事實嘅真相，拖住我學行咗一段時間都應該係時候放手畀我自己獨自嘗試，雖然比較突然，但我欣然接受挑戰，要加油努力呢！尋日我深知做錯嘢，不過事情既定之後講乜都冇用，已經到達終點當中嘅過程無法改變，冀望嘅只有下一次預防警惕。呢兩日要做嘅duties頗多，消耗咗我唔少精神，彷彿做極都唔完嘅任務，有d仲要畀我堆積咗，我必須盡快處理好，因為其實有好多嘢都唔適宜拖住。為咗解決部腦嘅問題，在得到同事答允下搬咗部主機去check，可能用力過大嘅關係，以致部分肌肉酸痛。

熱帶風暴帕布走咗都要行返轉頭，真係估佢唔到，結果換來嘅係八號西南烈風或暴風信號，亦令打工仔可以提早放工，不過同時出現唔少鼓譟情況，其實大家嘅目的都係想安全地盡快回家，在鼓譟時又有否試想想交通工具為何會出現該情況該安排，既然明白同一時間大家放工放學，香港人口有七百幾萬，要短時間內疏散人羣談何容易…唔講唔知，對上一次掛八號風原來係三年前，即二零零四年七月份，怪不得好多人都希望今次打得成。