返咗呢份工都有大半個月，究竟自己習慣咗未呢？又究竟自己覺得份工如何？我自己又覺得有冇嘢學到呢？一連串嘅問題我諗都冇諗過，日日返到office只知道要做好份內事，其實我都feel到自己好似乜都唔諗，自己冇咗一個目標同方向咁，以上提及嘅問題當然唔係我問自己，而是臨放工前我上司突然問我，當時我真係唔知點答，俾人問到口啞啞，我能察覺到的是原來世界上包含著無數嘅濕碎事情，所謂嘅濕碎事分分鐘會消耗大部份嘅時間，我有冇嘢學到我真係唔知應該點答，我知我係學咗一d嘢，但係你問我果d係乜，我又答你唔到，要我講出實實在在嘅嘢，對我仍存在一定的難度，不善言辭嘅我答你d問題時我自己都覺得有點兒敷衍，sorry ar。

一放假就感到沉悶嘅我今日當然又係”悶”，都唔明點解我搵唔到”樂趣”，人究竟做d乜先會得到”樂趣”？個人好似冇乜嘢做咁，但係其實有好多嘢等緊我去做，只不過係我唔想去做，做乜都開始變得冇mood、冇駛幹勁，有幹勁嘅時候只會在返工期間，返咗工就算幾眼瞓都會堅持下去，那為何在家中不能擁有該份幹勁呢？

呢兩日都係平平凡凡咁度過，令我驚訝嘅係原來我可以靜到一日只講咗一句”早晨”，個個都話我好靜，但係諗深一層，冇理由做做吓嘢又傾兩句計，更何況做乜都要對住部電腦，別人看來仲以為我係自閉，不過原來太靜係好恐怖嘅一件事，冇人理會嘅感覺其實並不好受。今日又遲咗少少收工，原因係我想一氣呵成咁做駛d嘢先離開，其實d嘢可以hold起唔做住，不過我就係唔想將d嘢堆積起來，因為堆埋堆埋都係我嘅duties，雖然以後極有可能會有空閒時間，不過我仍會以我嘅責任感為首選呢！

今日原本都幾開心，因為我終於清駛幾日遺留落嚟嘅任務，不過清駛又攪到自己冇乜嘢做咁，一冇嘢做時間就過得特別慢，好唔習慣呢！但臨放工前嘅一刻又突然好憤怒，皆因part-time果個同事專登放慢手腳做嘢，而我一定要等埋佢做果part先可以完成駛我嘅任務，佢因為今日遲返，所以比較晏先完成，但係我見佢明明做完都扮check緊，又做埋好多小動作去消耗時間，睇到我眼火爆，所以我一做完就即刻離開，理應佢應該早走過我，但係我都唔理得咁多，因為我相信再stay在office我就會爆發，不過回家後才發覺我原來miss咗做一樣嘢，今輪都唔知點算啦？

對上嘅一個月我完全不在狀態，因為冇工開於是乎攪到我勁煩惱，正因為做乜都冇mood，尋晚先發現學生資助辦事處在上個月寄俾我嘅還款通知書原來今個月頭就要還錢，我攞咗又冇睇清楚d內容，一睇先知原來9/1係deadline，deadline之後還就要俾多5%附加費，咁即係我無端端要嘔多百幾蚊出來，激死我啦！點解我會咁大意ga，不過鬼叫資助辦事處咁遲先寄封信俾我，我記得我阿哥早在上年九月中就已經收到封信，而我個封係十二月尾先收到囉，唉！講都冇謂，未有糧出就要我還錢，我真係好可憐呀，極度悲傷中……

唔知係咪因為我尋日問咗條低B問題，今朝我上司問及我的近況，其實要做嘅嘢都已經開始慢慢熟習，暫時都冇come across any difficulties，但我自己知道宜家要做的只是一小部份，仲有一大堆嘢仲未學，既然公司provide時間俾我practice more，我都應該珍惜呢段時間，自己盡量做好d，佢問完我果一刻我好feel到有人關心我，雖然短短數句說話，但果種感覺好實際呢！

今日嘅我突然陷入沉思中，諗嘅莫過於一d負面嘅嘢，例如驚自己做錯、驚自己阻住人哋，成日都覺得自己做得唔好，我真係好想知道自己嘅表現如何，想知道惟一辦法當然係問我嘅上司，但係無端端問呢d問題又好似好奇怪咁，最後我都鼓起勇氣好冒昧咁提出，因為我個心好唔舒服，問咗雖然冇答案，但係心情舒緩咗，其實我唔明點解我要甘care別人對我嘅睇法，或者係因為我自己搵唔到嘢去support自己，凡事我都會好擔憂，唔係驚呢樣就驚果樣，經常性覺得自己冇用，連自己對自己都冇信心，惟有靠別人的看法去評價自己。

今日又遲放工啦！有時我真係會質疑自己嘅工作能力，明明工作量唔算多，但係點解日日都唔可以準時離開，你哋問我點解咁遲先放工gei，係咪好多嘢要做？諗落其實又唔係bor，只不過我做得慢先攪成咁，講呢一句其實冇乜特別意思，但係你哋會覺得我好灰、心情好差，的確講者無心但聽者有意，人往往就係咁樣，代入唔同嘅角色會有唔同嘅感受，好多時因為一時憤怒講咗d hurt到人嘅說話，亦會因為一d好細微嘅事而亂發脾氣，其實人係咪咁難控制自己呢？付出咗好多心血而不獲得任何應有的回報，生存已經不重要了。

呢幾日我嘅心情好差，真係好想大喊一場，或者喊完我會比較舒服，有d嘢鬱住係個心度如果唔發洩出來個人真係會崩潰，正因為我過於理會別人對我所講嘅任何說話，所以自己都覺得自己有點兒神經質，有d嘢講者冇心但聽者有意……

現況嘅我好努力prevent工作上有任何出錯，但係當我一心急我就會錯埋d careless mistakes，我係咪跟住就應該話自己太失敗呢？每次當我番到屋企，你就會埋怨我做到咁晏(其實只不過唔係準時收工)，又會追問我係咪做錯嘢，而我又會好自然咁講過事實俾你知，你就會assume我做極都做錯，好似講到我改極都改唔到咁，跟住你就會問我個上司點講，佢係我做錯嘢時有冇鬧我等等，連串嘅問題令我個心好煩，我知你係關心我，但係有d嘢都唔知點同你解釋，但係你講到我好似好冇用咁，做少少嘢都會做錯，你又知唔知咁樣係會hurt到我架？

講完工作，你就會怨我唔幫你做嘢，又話叫我做d嘢都唔得，我唔係唔想幫你，但係有d嘢你都要俾d時間我消化，要我去研究一d我touch都未touch過嘅嘢，我都要時間了解吓ga ma，放咗工個個都想休息吓，但係你會叫我做呢樣做果樣，好似認為我係最得閒果個人，有陣時都唔明做大女嘅我係咪真係要成日受氣？又例如買部洗衣機我都有出錢，但係d功勞你就會俾駛阿哥，話阿哥幾千蚊部機都買比你用，我只可做無聲嘅抗議，有d嘢做得arm你係唔會將功勞俾我，每每有什麼問題你就會話我，明明有d嘢唔係我嘅職責，但你偏要我做咗佢，係我諗得太多定係事實擺在眼前呢？

另外，對上果份工我根本唔知做乜會攪成咁，你會成日用宜家份工同上一份工compare，又話上一份工有咁嘅result係我性格嘅問題，我知我自己有好多嘢需要改善，但係你唔清楚我希望你唔好將責任推在我身上，我知攪到咁嘅結局我都要付起一定嘅責任，果件事對我打擊好大，你可唔可以唔好刻意提起果件事呢？又成日問我今次呢份工d人好唔好，我就算話好你都會質疑我嘅判斷能力，咁我應該點答你呢？又叫我問吓上司有乜秘訣可以唔做錯嘢，又叫我問吓有乜進修課程對份工有幫助，我覺得有好多無形嘅壓力在我周圍呢！

今日嘅我又感到好攰，一放工就想即刻上床瞓覺，返到屋企簡直冇駛心機，其實做嘅嘢又唔多，都唔明點解會咁攰gei？冇咗partner嘅存在，大體上都冇乜問題出現，只是有點兒不習慣，唔明嘅地方我照舊會問人，希望需要解答我嘅人(特別係我上司)唔厭煩啦！做咗幾日發覺自己對電腦的認知頗貧乏，點樣generate d drive，點樣開outlook express account我統統不懂，所以人真係要終身學習。冇咗partner，我一遇到問題就會怯，因為冇咗佢幫我解決，換言之我必須自己試吓deal with the problems first，因為我唔想成日煩住我阿head，而今日我嘅feeling就係經常性質疑自己做駛d工作mei lei？

【明報專訊】許多人的願望是不用工作，天天四處玩樂，但瑞典最新研究指出，辛勤工作達致目標是人們快樂的泉源，忙碌的人最開心，愉快的感覺也最持久。瑞典哥德堡大學研究員訪問了全球數以百計人，嘗試找出令人感到快樂、滿足的泉源。有受訪者稱贏得巨額彩金會令他們快樂，但感覺十分短暫。研究發現，辛勤工作達致目標最令人感到滿足，且也是最快樂，其次是擁有良好的人際關係。

領導研究的布呂爾德教授稱﹕「最重要是保持活躍。我們的研究指出，人愈勤奮活躍就愈快樂。躺在沙灘上休息聽來很吸引，但躺得太久就不會感到滿足。」 

良好人際關係免情緒低落 

英國心理學會的萊蒙說﹕「辛勤工作令人滿足，但也要配合自己所長，否則會感到沮喪。」她又表示，跟親朋和同僚保持良好關係也很重要，因可避免出現情緒低落。