用左一日就黎寫用後感 XD
呢個係1000dpi，一插上去果然移快左，
不過響控制台果度仲可以較番慢D，
以前試過隻mouse響控制台較到最慢，
都仲移得快過前一隻較最快，無奈。
要彈下呢隻double click方面係勁差，
好多時double click唔到(不論左鍵或右鍵)
好在無上一隻click左無反應o既問題，
唔係仲以為係唔係mouse壞係電腦壞。
外型較細渣上手亦無上一隻咁舒服，
仲諗住觀察可唔可以半年唔洗換電，
衣家用左一日就有咁多暗病，
忍唔忍受到三個月都係問題......

hp跟機個無線mouse左click開始出現問題，
一係click落去無反應，一係就單擊變雙擊，
(唔知係咪玩得online game多玩壞左)
而個mouse係跟埋keyboard，即係一個無線收發器，
同時用落mouse同keyboard，衣家keyboard無事，
係個mouse壞，如果另買一個mouse就浪費左個接收器，
諗住去各大連鎖電器舖配番同一形號o既mouse啦，
事關用慣左個手感同習慣左呢個靈敏度唔想轉，
點知原來無得賣，只好求其響觀廣買一個，
mouse款式係多如天上恆河，但邊個好用就要用過先知，
以前亦買過唔少平mouse手感係令人失望，
又或者個click好硬或者個cusor移得太快或太慢，
所以都要撞手神，結果買左隻Logitech o既130蚊無線，
點解會買？一黎Logitech都係出開電腦周邊o既老品牌，
最主要係佢包裝聲稱一年都唔洗換電，有無咁神呀？
再打開個包裝，下！只係用一粒2A電？！
之前個hp用兩粒2A電頂盡都係崖到兩三個月炸喎，
(mac果隻magic mouse直情得兩三個禮拜啦 =_=)
呢個一粒電就話一年？用到超過半年我都要比個讚佢！
佢跟埋果粒係金霸王，好！今日開始就測試下，
睇下呢個mouse幾時無電。
ps : 有無人知道指一樣野壞左個「神」字點寫？

咩係最好o既天氣，就係好似今日咁，
清清涼涼又唔凍，可著住夏天衫出街，
無太陽陰陰地但又唔落雨，
行街唔會出汗，好似戶外開左冷氣咁，
亦可control到最理想o既髮型...
(無錯，係關髮型事，係要乾爽o既日子，
平時潮濕或出汗髮型都破壞左30%)
不過世界邊有咁完美架？
呢D天氣係好易落雨，又要帶多把遮，
出街唔可以兩手fing fing咁行 sosad

係正星期三放勞動假，好多同事都請多兩日咁就連假，
同埋清假，有薪假響月底前未放晒係當唔要唔會補水。
不過算啦，我上年同今年都係未放晒，由得佢。
(同部門有人放左我再放埋可能亞頭會炸形)
而今個星期番兩日放一日再番多兩日咁都幾舒服，
如果實施一個星期四天工作天制o既話，
果日假期最好放響星期三，咁時間好過好多~(FF完)
實施咩最低工資丫？我寧願佢實施四天制好過。
實施最低工資只會搞到通貨棚脹，羊毛出自羊身上，
到頭來雖然人工高左但消費又高左係番度無變數過。
你話D老細會唔會咁好死加人工唔加價？
到頭來成本都係轉駕番落消費者度，無分別。
如果實施最低工資，就一定要再加多條例，
禁止加價，車費唔加、食飯唔加、舖租唔加，
乜都唔加剩係加薪，咁先真正達到最低工資o既效果。

碼頭工人因不滿待遇而罷工，至今罷左差唔多一個月，
問題依然未解決，其實呢件事與本人無乜關係，
我都覺得果D靠血汗搵辛苦錢o既人係唔止呢個價位，
人工好應該再向上調整一下，但咁樣罷下如果老細就範，
一次得左就有第2第3次，以後得閒又罷一下D老細都有排煩，
所以感覺上佢地就算再罷多半年都唔會得賞所願。
不過佢地洗濕左個頭，爭取唔到就落唔到檯，
只好繼續罷落去，寧願被炒都番唔到轉頭。
佢地罷工都對社會上上下下有唔少影響，
好似我媽呢D響街市買餸o既師奶就話D菜貴晒。
點解我開呢個題呢，幫襯開一間幫人訂海外野o既舖頭仔，
佢同埋佢地D行定就係深受其害，今日拎訂時就訴苦，
話有D客訂左貨，因為停工而比唔到貨佢，
要賠3倍錢，人地唔會理你香港呢邊o既碼頭問題架嘛。
佢話最慘係D貨櫃車司機，租左車但無工開，要白比租，
(租車o既野唔係話今日用今日租，就好似租舖頭咁)
跟住人地唔用香港呢邊個碼頭，轉用炎田果邊，
真係肥水流入別人田啦，佢地唔開工人地一樣有辦法，
而果位舖頭仔老細就話班工人唔會夠禾王玩架，
佢話個碼頭都唔知佔禾王旗下有無1%，
就算佢地罷多幾年工都威脅唔到佢地老細......
另一說法係查實班果班工人都無諗過玩到咁大，
本來罷一下然後雙方檯底拆掂佢各讓一步就萌大奶，
點知件事又牽涉到工會，果D人邊係真心理你加唔加到人工，
佢地只係要爭取到D野然後立工勞提高民望，
咁就自然要將件事搞大，收唔到科。