mac要玩RO？都係裝左windows再裝RO啦。
裝完之後唔好set個像素太大，
唔係又話你directX唔夠新(其實唔關事)行唔到。
keyboard無insert掣，點坐呢？
打/sit都可以坐，唔想次次都打個指令咁煩？
犧牲一個表情熱鍵將佢set做/sit即可。
不過唔知點解用唔到double click，
想轉番預設視點double click右掣無反應，
double click放技能或食藍水不可，
double click商店牌又唔得，好唔方便！
響RO界面外double click又完全正常喎，
玩到係玩到但始終係有呢D謎之缺陷...sosad

首先裝完隻Game，等佢patch，
patch到七七八八點知話咩野安裝失敗，
又再patch過搞左好耐都係玩唔到，
原來要用系統管理身份執行先解決到。

注冊免服acc要強制set通訊鎖，
每次登入前都要打個電話解鎖，勁煩！
未解鎖login會彈句野叫你打呢個號碼，
打完個電話，唔work o既？
原來佢無寫到老朋友服個電話號碼，
去官網個表搵番，睇佢寫30秒，
以為打左去要等30秒後先登入到，
仲係唔得o既？原來係30秒內要登入！
心諗如果人地外國間屋大有兩三層樓，
響飯廳打完個電話未必跑得切入房登入。

入到Game用卡普拉開倉庫仲要入密碼，
而呢個密碼仲係虛擬鍵盤鎖，
即係唔用得keyboard入，要用mouse篤，
個鎖數字位置仲係次次random，
次次開個倉都無得快手。

一隻堪稱不朽名著o既網遊，都重玩左唔知幾多次，
由chaos玩到isa(當年聲稱香港伺服器)
我兩個ex都係響isa認識o既。
然後做寵物雜誌果陣又同班同事一齊玩私服，
甚至同同事夾份響私服課金買p點，
當時已練有Lv99神官、Lv99超魔導等，
點知個GM冰點審判比人拉左而摺服，
之後同同事轉戰另一私服BlackRO又由0開始，
後來另一個frd話私服仙境部屋多高登巴打玩，
而且實裝埋3轉，又響果度重新起家，
不過部屋又比人攻擊搞到勁lag，又停玩。
最近心血來潮又想玩番，私服雖然易升但無保障，
今次決定玩番新幹線o既官方免服，
新年果排開左新server(出左十年都仲有新ser...)
就入呢個loki free(3倍經驗)試下，之所以揀呢個，
除左新開之外，始終玩慣私服果D 50倍經，
驚適應唔番正服升呢地獄。

講開又講，居然上年年尾大陸官服先開始營運，
出左十年先有官服？唔好再遲D？！

(以下內容可能令人好不安)
呢6~7年來屋企間中會出現一D唔知咩蟲，
逞細長樹葉外型，長大約3~4毫米左右，
外殼有D似衣物纖維，包住一條微型蚯蚓，
通常痴響牆角位幾個鐘甚至大半日都唔旭，
旭起黎會露出條微型蚯蚓爬行，行動緩慢。
係我認知以外o既物種，講唔出係咩蟲，
亦理解唔到呢D咁奇怪o既野點進食及繁殖，
已知一到潮濕o既天氣出現得更頻繁，
有無人可以話我知呢隻係乜野生物？
(由於好核突完全唔想影相放上黎)
以前細個到讀完中學都未曾響屋企出現過，
唔知點解無端端出現，會唔會係新物種？
可能全世界得我屋企先有呢種奇異生物，
陰差陽錯屋企o既生態環境適合呢類物種生殖？
有年響床下底噴殺蟲水諗住將佢地一舉纖滅，
點知第二朝起身發現枕頭底有一大堆呢D蟲！
簡直毛骨悚然！唔敢再響床附近噴殺蟲水...
 

專登早幾日請今日假，
連埋4月4號加埋禮拜六日咁就連放4日，
上星期復活節係銀行假我地放勞工假無得放，
今日算係補番個4日連假比自己yeah~ XD
放一日又番一日工再放假好不爽，
不過清明時節真係雨氛氛，呢幾日都落雨，
要拎多把遮就無晒行街o既意慾。