今日原本有兩樣嘢要做，但最後只得一件事要做！原本係諗住上晝幫

基仔出荃灣攞掛號信，到下晝阿 B放學段時間就去佢學校同佢玩親子活動

，但喺我搭緊車差唔多出到荃灣時個電話响起嚟，平時個電話呢個時候係

好小响，一聽原來係阿 B班主任黃老師打嚟，佢打嚟係想通知我阿 B佢喺

排隊去洗手間時唔小心仆倒而頭仔就撞咗落地下條柱到個額頭腫起咗，暫

時幫阿 B用冰墊敷住個頭仔先，最後老師講咗句『唔好意思』我心諗••

唔好意思都已經撞腫咗啦，不過我把口就緊係話『唔緊要啦，小朋友係一

定係咁嘅』之後我就打俾基仔同佢講，佢開頭聽錯以為話阿 B撞穿咗個頭

嚇到佢幾大聲『咩話』攪到連我都嚇一嚇，跟住佢就叫我帶咗阿 B返屋企

先，但我當時喺荃灣又點可以咁快返到去湊佢呢，所以就叫咗阿媽幫我湊

咗阿 B先我幫基仔做埋啲嘢就返，返到屋企一開鐵閘阿 B就好快咁幫我開

咗門，我見到佢緊係問佢『點呀，個頭仔痛唔痛呢？』跟住佢就好嗲話喺

學校撞到呢到囉，講到就喊就喊咁又叫我呵！又叫我鍚！俾佢激死又嚇死

其實今次已經係第二次阿 B喺學校咁撞到腫起哂，今次仲要俾上腫得勁，

如果再有第三次我都唔知會唔會忍唔住去學校到會話啲老師••••

    尋晚我好開心呀，因為我見到一樣我好鍾意嘅嘢，起初我猶豫咗好

耐究竟買唔買好，因為個價錢真係比較貴咗幾多吓，講真吖其實都祇不

過係一支鉛子筆，但係支筆上有Pochacoo個樣喺到，就係因為咁原因所

以先會咁貴，平時買一支普通鉛子筆都係十元八塊，但呢支起碼要十個

十元八塊先買得到囉，考慮咗好一陣最終都係衰咗喺Pochacoo手上，冇

辦法啦，鬼叫佢咁耐以嚟出嘅物品都未曾試過好似今次咁令我隻眼發光

咩！買完之後我就頭痕緊點同基仔講支筆幾錢，佢一聽到實話我黐咗線

定發神經！諗諗吓都係到時先再算咁早諗都無乜用，食完飯返到屋企，

無幾耐佢見到個盒就問我呢盒咩嚟？於是我就笑笑口咁拎住個盒望住佢

佢見到我咁笑法就知道呢樣嘢唔會平得去邊，跟住我咪打開俾佢係乜囉

之後就問我幾錢，但我好自然講『知道支筆係比正常貴，但你都知道我

有幾鍾意隻Pochacoo同鍾意咗幾耐，但今次我真係忍唔到手唔買囉。』

佢聽完之後竟然無話我，而且仲笑笑口咁講話『唔買都買咗啦，可以唔

俾咩！』見基仔玩嘢咪玩返佢轉頭囉，我話如果真係唔俾我咪放上網睇

吓有無人BID 囉！跟住佢就笑無講咩嘞！其實今次都幾出乎意料架，本

來以為基仔佢會話我一餐，但竟然無而且仲笑笑口，可能佢知道我一路

都鍾意PC好耐，所以今次就俾我開心吓呱！但點都好啦我都要多謝基仔

佢肯俾我買^^THX  

             我真係好開心呀.