六合彩已經好多期無人中, 今期既頭獎金額如果一注獨得估計會有四千八百萬!!!!

繼上次暑期金多寶, 我地公司同事一齊夾左買左9個no都無個中之後, 今次我地決定買複式, 十個人夾左買左十二注複式...好大既希望....

上次金多寶買九個no都無個中, 其實我已經開始覺得我地哩班人真係幾黑仔, 哈哈...

但正如上次鄧生所言「嘩...你地個個都夾...我唔夾中左咪得返我一個係到...唔制...」

今日小玉放左假, 今次要懶低佢啦....哈哈.....

今日要去金鐘做land search再去灣仔法院排期入稟同埋買戚風蛋糕.....可以下午先返到公司....即係可以訓到九點幾先起身, 呵呵

但九點靚太就打比我, 原來佢今朝起唔到身返工....問我可唔可以同老細講佢同我一齊去....o甘就下午先返工....

十點幾出門口前, angel打比我, 話個某李黎交左錢, 可以唔洗去排期啦, 即係今日只係去做land search, 諗住有時間仲可以去行下街, 哈哈....

但係....我唔記得左今次靚太跟埋一齊去....好快做完野後我想睇zara, 但入到去佢好似好無興趣o甘, 兜左個圈我就好無奈o甘出反黎....其實我仲有好多野想睇架....唉...算啦....

原本去到金鐘, 我緊係要去great行下, 睇下有咩野食買, 但佢又無咩心機行....最後都係買左份三文治就算....

都話左啦, 行街行得開唔開心, 同邊個行都好緊要架....

我既戚風蛋糕....緊係唔洗諗啦....唯有星期六叫鍾斯買比我食啦....

尋日係灣仔搭車去鍾斯屋企時見到有朱古力戚風蛋糕, 就好想食, 但當時唔可以買, 好彩星期一會過黎做small claims, 到時可以買個返公司食....

但等唔到星期一, 個心一直念念不忘.....於是今日就諗住去搵下邊度有啦.....

同鍾斯去左apm行, 諗住睇下吉之島有無啦, 點知搵到蜂蜜蛋糕, 就係無戚風蛋糕, 唔開心....

無咩心機, 6點3諗住去元氣試下燒粟米, 點知都係要排隊, 以家香港人係咪都去左耕田, 個個好似農夫o甘早食飯.....

等到7點終於有得食, 個燒粟米真係好甜呀..... 

今晚去左鍾斯屋企食飯, 見到好耐無見既東東同峰峰.....

一入門口交出禮物, 就o甘輕易博得佢地叫我一聲姐姐啦, 呵呵...

東東同我講, 今晚8點半有香港小姐睇....「係呀?o甘你鍾意邊個呀?」「8號, 徐雪(淑)敏」....

嘩....我睇o甘多八婆雜誌都唔知邊個打邊個, o甘又試下問佢「4號係邊個呀?」「4號黃瑩」....「o甘你

話邊個會係冠軍呀?」「8號suki!」....連人地英文名都知....以家d o靚仔真係估佢地唔到.....

最近都比較悶, 公司多左野做, 因為月尾就開AGM, 仲有要準備中秋晚會, 秋季旅行...

哩D野年年都係o甘做, 唔知點解今年覺得特別煩特別悶.....悶既時候最好就係搵野食, 今個星期, 心爸整左八爪魚, bb墨魚同埋醉雞亦比我地食, 食得多大家都唔多好意思, 最重要既其實係好想成日tea都可以食到好野......於是, 墨魚仔基金正式成立, 會長就由心爸擔任, 希望以後長食長有, 哈哈哈.....

越係多野做就越唔想做....結果就不斷食零食, 上網, 睇雜誌, 睇書.....總之就係唔想做野!!!!!

以家既零食都可以好有益, 最近係seven就發現左一d標榜又維他命又骨膠原既糖, 總知就係一聽個名就覺得好補o甘啦, 但我承認, 真係唔認為食包十蚊八蚊既糖就會靚左, 買只係因為覺得包裝幾靚o甘o者.....

繼續見到百力滋就發癲, 今期最愛芝士味, 蝦味.....

最近又搵返舊愛, 豹仔芝士條, 鍾意佢夠大包, 夠鬆脆, 夠粗大....唔洗再講, 總之食過佢之後對芝士波無晒興趣!!

無無聊聊行下書局, 買左一d, 幾鍾意黃偉文既"俗"(舊野, 新o個本好貴, 唔捨得, 唔知遲下會唔會有折), 佢做dj時唔多鍾意佢, 原因唔記得左, 但喜歡佢既文字, 夠低死。

心借左佢係書展買既"甜甜私房貓"我睇, 睇到我都好想養貓.....