已經十二月啦, 但今日有成26-7度, 重要係有太陽o個隻......

今日同鍾斯一齊放假, 但佢下午要去見工, 隻豹夜晚又約左多多補祝生日, 所以都係一齊去飲茶就算.....

諗起豹媽想試大榮華, 所以就一齊去啦, 點心都ok, 我地十一點幾去唔洗等....

飲完茶陪鐘斯搵車去見工, 點知原本想搭o個架車要下午3點半至有, 結果烈日當空兩隻野係條街到行來行去, 真係熱到想講粗口.....要知道隻豹一向都係淑女, 可想而知真係好那熱, 一切都只係天氣既錯......

夜晚約左多熊丁豆比p, 比比要ot遲d到, 我地一行6人去左叉燒湯意, 仲坐返當年個張枱tim, 好開心。

當年, 係04年既情人節, 轉眼又就快到07年既情人節啦, 好驚呀....唔知點解覺得識左你地班野之後時間好似特別嘭嘭聲o甘過....

好耐無update日記, 最近都比較忙, 12月成個月都會好多野攪, 淨係做環保都已經煩鬼死, 只能夠話攪環保, 真係幾唔環保....

數下手指隻豹係公司已經做左3年, 能夠係到留3年仲未走, 只因為哩度簡單既人事(只限自己office), 同事間唔會明爭暗鬥, 夾左o甘耐大家都好易話為, 日子容易過..... 但除左哩樣, 哩間公司, 真係無野值得留戀......

最近又因為一d老問題, 好想走, 問題一直存在, 就係無人肯去正視同解決, 大家都扮唔知扮睇唔到, 到要爆出黎時就失憶, 咩都唔知, 自話自說, 自圓其說....總之, 所有既錯都係最細o個個錯, 即係隻豹既錯....每年重覆一次, 由最初會好唔憤氣好嬲, 到今日只係覺得好笑...

今日一返黎老細就同隻豹講已經中箭啦, 要隻豹即刻出張memo將所有事知會班上大人....左度右度, 哩張memo一出, 就會得罪晒d上大人, 講到尾, 佢地唔係唔知, 只係佢地要選擇性失憶, 希望能置身事外.....

一次又一次, 真係唔想再有下一次......有d野無得改變, 唯有我買你地怕.....過埋個農曆年, 真係要積極啦!!!!

上星期同鍾斯食完中國芳既大閘蟹覺得麻麻, 好想再食, 嘉菲話嚼江南得, 今日就約埋卡拉, angel同埋鍾斯一齊去試啦.....

真係得呀, 樣樣野都好好味, 我地叫一個4人餐, 每人兩隻5兩既蟹仲有7餸一湯一甜品, 同埋花彫薑茶, 好抵食, 我地4個都飽到捧住個肚走。

友人話, 覺得自己最後係自殺而死既....

其實....我都係.....縱然我以家真係生活得好快樂.......

我知道瑪迪又要鬧我啦....但我哩個想法一直都無變過, 覺得快樂唔會永久, 覺得幸福係唔可以把握.....可能我跟本就覺得自己唔配得到幸福.....

有一陣子, 真係好期待可以同鍾斯組織一個小家庭, 生個小baby, 幾口子每日吵吵鬧鬧哄在一起生活就好....

只係, 我真係想像唔到.....

原諒我, 我知道自己真係唔係一個可愛既女朋友, 脾氣唔好小心眼情緒化而且無安全感.....

你對我既耐性包容, 我一直好感激好感激.... 

只係, 我覺得部份既自己好似遺留左係某段時間....就算我以後過得再開心....都好似唔真實...幸福既事, 好似唔會真係發生係我身上....

今日同鍾斯北上按摩, 唔想搭火車無位坐, 所以都係係返皇崗過關...

點知今日上到去唔知攪咩勁塞車, 塞到隻豹有d暈車浪想嘔o甘濟, 好橙呀...

今次我地遇到個好可愛既的士叔叔, 塞車塞到大家悶悶地, 佢就聊我地傾計啦...

「你們是來逛街吧....女人呀, 真係一天逛到晚也不覺累...」<<<司機先生係講國語既~

「是呀...哈哈....」<<<隻豹唔識講國語唯有笑下衍佢啦.....

「每次逛街呀, 我們男人最難受了......我最怕就是我老婆說要去逛街....」

「哈哈....是嗎....哈哈哈...」<<<<繼續以笑衍佢.....

「你們是剛戀愛吧??」<<<無啦啦問埋人地d o甘既野既~?!!

「....哈哈....快3年啦....」

「3年啦....我看你們還是很愛的樣子.....」<<<哇哈哈....真係想問下佢何以見得呢?!

「哈哈....詩非場非場艾呀....哈哈哈」<<<隻傻佬無啦啦興奮到同人講起國語上黎, 好驚驚呀.......

．

．

．