尋晚同小玉預祝生日, 本來想去西貢食泰菜, 但卡拉唔想去o甘遠(!?), 最後決定去試熊貓酒店既日式放提......

一行七人, 豹, angel, 心, 卡拉, 嘉菲, 邦邦同埋壽星仔小玉七點就殺到入荃灣, 一坐低就緊係睇下有咩野食先啦.....以o甘既價真係算多野食wor, 我地食左(部份).....

野食真係ok架,  百零蚊既日式放題當然唔好諗住係食海膽toro神戶牛啦, 但d剌身都真係大大塊架, 都新鮮同幾好味,我地個個都真係食到捧住個肚, 最後食埋個精選甜品, 今次係cheese cake, 幾好味wor....

最後我地仲見到d cocktails都好低呀, $28一杯, 就一人一杯賀一賀壽星仔啦。

話說隻豹尋日去惠康搵多多推介既芝士餅, 真係搵到wor, 鬼死o甘開心啦...但點解隻色好似唔係好同多多張相既??但佢明明寫住cheese架bor, 即係岩啦.....

點知買左開黎一試.....點解係花生醬味架!!!!!!!!!!!我唔食花生醬架!!!!!

再睇下個招紙....cheese.........& peanut butter !!

隻豹真係發雞盲架....明明覺得有d怪...但一睇到有個cheese字跟住就咩都睇唔到啦....

今朝返工時橫風橫雨, 返到公司已經成身濕晒....

o甘既天氣當然不宜出去食lunch啦, 哩個時候心爸又打救左我地啦....今次佢整左咖哩蟹比我地食呀, 加埋上次買既印度薄餅, perfect!!

(仲有今晚既日式放題...待續..)

隻豹係到諗....有咩人見過佢最最最甜蜜既笑容呢....??

應該係瑪迪同wing....記得wing講過「你睇你講起佢笑到個衰樣, 一睇就知你衰左啦....」

我大慨係「係呀係呀...我衰左啦...死啦死啦今次真係...哈哈哈哈....」

好耐好耐之前lu....o個個佢都唔知去鬼左邊啦....

不過呢...記得以前約左佢係地鐵站等, 遠遠見到佢隻豹真係就忍唔住笑到見牙唔見眼超樣衰....但差唔多行到埋去時就會忍住扮木口木面....<<<緊係啦真係超樣衰點可以比佢見到架....

然後...之後...再然後....隻豹係地鐵站等緊鐘斯.....見到佢遠遠行緊埋黎時就已經笑到烚熟o甘超樣衰....o個時就諗...哩隻野會唔會同隻豹一樣都係傻既呢.....

今日既天氣明顯轉涼, 開始覺得秋天啦......好想換季呀....

天氣涼浸浸真係特別好訓, 隻豹一訓就訓到十二點幾, 起身食野, 食得既都食晒之後就再訓, 又訓到3點....

訓醒後就同鍾斯去tea, 唔想去o甘遠就去左荷里活, 但兜巴星鬼死o甘多人, 結果去左麥當當, 聽聞佢d包加左價後仲要細左, 我緊係要去睇下係咪o甘無良啦.....食左我最愛既雙層芝士漢堡, 係咪心理作用呢....真係好似細左小小wor.....

最近身邊好多朋友仔都遇上感情煩惱, 好多問題未解決唔解決逃避去解決....好多時大家唔願意放手都係離不開唔甘心, 唔甘心點解我對你o甘好, 你要o甘對我...唔甘心我地一齊十年, 點解你話變就變....唔甘心我為你付出o甘多, 點解你o甘自私....唔甘心....

係lor係lor, 既然你對佢o甘好佢都o甘對你, 既然已經十年佢都要話變就變, 既然你為佢放棄所有佢都唔心足....點解你仲唔走呢, 為哩d野唔甘心, 只會越蝕越多架bor, 感情係咪都應該要定個止蝕位, 無架啦, 蝕到一無所有啦, 仲唔走, 唔通仲要借貴利博翻身???要連以往一齊開心既回憶都賠上, 連以後既十年都蝕埋???

其實點解一開始, 明明大家係鍾意對方架, 到最後會攪到連諗起佢都變成一種壓力....

如果真係已經行到盡頭, 可唔可以係另一角度睇, 兩個人一齊, 唔一定要只睇結果, 其實我覺得過程更加重要.....

可能最後未如所願, 王子唔可以同公主幸福快樂o甘生活落去, 直至永遠....但其實佢地都係曾經開心過, 個故事中間一樣係精彩動人... 套劇十九集都好睇....但個結局爛尾, 的確係比較無奈, 但唔好忘記你曾經每日收工就趕返屋企食飽飽就坐定定滿心期待o甘等睇電視....

又語無論次唔知想講咩....其實我只係覺得, 就算結局真係爛尾, 但你擁有既仲有十九集開心既回憶....你曾經一講起佢, 面上面就掛住一個最最最甜蜜既笑容....

分手後只有恨, 以為可以報復, 其實只係苦了自己....

原本今日應承左去菲菲既生日會, 但我又想北上, 於是我今日就放假諗住同鐘斯北上按摩.......

本來諗住早d上去, 因為唔想次次都半夜返黎, 好辛苦.....點知訓到十點幾, 起身後又咪咪摩摩, 攪到成點幾至去到九龍塘, 諗諗下驚未上到去就肚餓(明明之前係屋企食左好多野), 就去左kfc試下個宮寶雞打打低....

食完成兩點, 就去搭火車....點知一上車已經聽到話大學站咩電覽故障....去到大圍, 架車就開始停左係到唔開啦....等等等....廿幾分鍾過去....點算呢...仲等唔等??又無得坐, 一直企係到等既豹已經覺得好攰啦....

鍾斯話落車出返太子轉直通巴好唔好....但當時係勁大雨呀, 除時係黃雨紅雨黑雨夏雨吳鎮雨都出埋....又要行出去搵車出旺角....隻豹諗左陣, 有d忟呀....唔鬼上去啦, 搵車去沙田行下算啦....

就係o甘, 兩個北上唔成既人就出左沙田食tea, 今次去左A1, 好低食wor

食完tea行下行下.....傑仔打比鍾斯, 聽佢講野好似出樹wor...o甘我就諗住叫佢出黎一齊食飯睇下佢點啦...

跟住我地去左商務, 見到本戚風蛋糕書呀!!!好似整得好靚靚o甘...好想買呀, 但覺得好貴呀, 又無折, 好薄wor....但我好想學整靚靚既戚風蛋糕呀!!!整得靚之後我要整斑蘭戚風蛋糕!!!!最後鍾斯一句:想要就買啦, 有幾貴呀....成交, 好開心....再買多本散文既食普....

但有豹歡喜有人愁wor, 傑仔再打比鍾斯, 想約鍾斯出去....但見鍾斯面有難色o甘既樣....「你想我陪你一晚....」(隻豹即刻樹起耳仔聽, 唔識真係以為你地斷背呀, 呵呵)....事情好似真係相當嚴重o甘bor....鍾斯呀朋友有事你唔得o甘涼薄唔理佢架....「你就去陪佢啦...我怕佢會跳海呀...」

既然星期六晚隻豹要食自己, 就緊係要諗d野反下至得, 最後就決定再戰tiramisu.....今次d手指餅濕得濟呀....