今個星期一直忙....

上星期四, 中秋前一日至知吉蒂將會入院做一個大手術, 以後唔知會有d咩變數, 老細講到佢除時入左去唔知仲出唔出得返黎o甘, 要立刻聯絡晒d銀行, 準備好晒轉簽名摸式既文件......但文件未簽好, 星期一佢已經入左院....

星期二聯絡上吉蒂囡囡, 知道手術成功, 但是否一切如常就要睇佢醒返先知....

老細吩咐立即準備果藍送去醫院, 但佢仲係心切治療部, 跟本送唔到去....但老細一味話要快快快, 作為小小四既豹, 唯有立即叫駱車我出去買, 買完返黎老細一睇, 話唔夠大唔夠貴, 再去加到有o甘大得o甘大....急急搵人送去, 但送到去正如所料, 醫院唔比上去, 結果都係送左去佢屋企....有咩用呢。

忙完返黎仲要同老狗開會, 哩個會一開就開到7點半, 講既野都唔關我事, 唔明點解一定要我開, 唔通就係為左向我承諾今年我一定有人工加??

星期三要準備好晒比賤賓簽既野, 又再ot到7點半....

星期四再開會, 一返到公司就開始準備, 一直忙忙忙, 總算順利10點就散會....無錯, 10點可以完已經算係好順利....

知道鍾斯一向鐘意Matt Damon, 今日諗住陪佢睇無間度風雲啦....

點知去到戲院門口, 鍾斯可能知道隻豹真係無咩興趣, 結果臨時轉軑睇返豹想睇既The Devil Wears Prada。

買左6點飛, 諗住食少少野先入場, 去當當試左星星著餅同香蕉批, 星星薯餅其實就等如薯餅lor, 係唔同左樣o者, 香蕉批我覺得一般啦, 如果食到入面有多d香蕉會開心d。

食飽飽入場, 但隻low b豹今日無戴contact lenses, 連眼鏡都唔記得帶, 睇唔到字幕......我一定會買dvd。

真係老啦, 尋日收工後等埋鍾斯一齊返屋企做節, 食完飯已經覺得好攰, 見何二少同wing食完就話出去燒兔仔(燈籠), 隻豹只係覺得除左好眼訓, 仲係好眼訓, 結果邊度都無去, 月亮都無望過一眼, 十點幾趕走左鐘斯就即刻白白之後就覺覺朱。

中秋都過埋天氣仲係一樣熱, 開始懷疑以後係咪仲會有冬天, 好想換季呀.....

望穿秋水, 文華終於開返, 諗住同鍾斯去high個tea, 4點去到, 竟然話要等大約45分鐘先有位....唔想等, 轉去永樂園食熱狗, 點知去到落左半閘.....無開呀, 真係無晒心機啦, 唔鬼食啦, 去金鐘行下算....途中經過見到pacific, 隻豹腳就行左入去坐啦.....

tea完之後, 諗起要儲印花續元氣卡, 又唔想等位, 於是就直接過cwb食元氣, 哈哈....食完都係七點, 可以慢慢行街。

係citysuper見到生係水上面既仙人掌好靚好得意, 諗起瑪迪, 好想即刻可以叫佢一齊睇下.....

今日真係未停過口....

一早返到公司, 就見到大大個果籃係枱面, 好開心呀.....

一座低就鬼死o甘多野做.....做到悶悶地, 過seven睇下有咩野食, 見到之前想試既哈根大椰子雪糕, 即刻試下....我覺得普通啦, 試過就心息。

lunch原本想去試大榮華, 但Raymond 十二點幾去到已經人山人海....最後等唔到都係去返中國坊, Raymond自己坐低之後就叫晒野食等我地....點知完來Angel識得個大廚, 變左d野加大晒....食到個個飽到想嘔....唔係講笑, 隻豹坐車返公司時真係差d嘔返出黎, 真係折the.....

收工後預祝心心&靚太生日, 再試日式放題, 今次試左官塘既外野手, book左6點半, 可以食到8點3....

完本心, 靚太, 豹, angel同小玉一行5人既為食團, 但小玉有事要遲d到, 初初諗住佢7點到, 所以大家就食住等....

今次既刺身比上次熊貓酒店多選擇, 其中白拖羅好好味, 其他都ok, 而且佢既刺身係船上, 睇見都好開心, 熟既野食我就覺得上次好味d, 今次我地試左個炸蠔有d腥, 同埋個軟腳蟹厚粉左d, 其他都ok。但野食既分量我就覺得熊貓酒店好d, 今次有d野食一份已經好大份, 我地人多就無所謂, 如果兩個人變左唔可以試多d野.....不過講到尾$148, 真係好低食, 大家都食得好開心。

開心就不知時間過, 轉眼已經7點9, 到左last order啦, 小玉仲未到, 原本想叫佢不如唔好黎, 但佢又好似好想黎, 最後唯有叫定晒野等佢一坐低就食....早知佢o甘趕, 我地改食8點半啦.....

今日既行程趕趕趕.....

朝早兩隻野訓到十點都唔願起身, 起左身後隻鍾斯又萬世魔王上身, 攪到成十一點幾先check-out...

諗住去海上皇飲茶, 點知去到鬼死o甘多人等緊位.....鍾斯話去食為先睇下, 隻豹一睇錶, 幾點呀, 仲去食為先睇, 去試下附近間海聯算啦........點知d野真係好鬼難食....

食完拿拿林去dup骨, 出返黎時已經成5點啦.....即刻飛的去皇崗....搭直通車去到荷里活再飛的返屋企, 返到去已經6點幾....

隻豹o甘趕, 係因為今晚約左鍾斯屋企人7點半食飯做節, 唔想次次都遲到都要佢地等....但隻豹仲要返屋企換衫, 再去攞月餅, 買生果, 買燈籠.....

但隻豹係到趕趕趕既時候, 隻鍾斯就係到滋滋遊遊, 一時又話要去買萍果批食, 買左上到隻豹屋企又唔食掛住同豹細佬吹水.....到隻豹換好衫鬧鬼佢時佢又賴委屈話要等埋隻豹先一齊食<<<<萍果批咋~~唔係九大鬼呀, 洗唔洗等呀.....

攪惦晒買齊野, 買左隻keroro同kururu既燈籠比峰峰同東東.....

一見到佢地羅隻keroro出黎, 峰峰就好開心o甘跳晒舞......到羅隻kururu出黎時, 東東一句「我要tamama」....死啦, 咩黎架, 邊隻tamama呀???.....「我要tamama呀, 唔要哩隻...」....大王你屈就下玩住kururu先啦, 玩死左佢再玩tamama啦好唔好....

tamama之後東東又「我要食士多啤梨冰皮月餅....」點解你硬係無o個樣搵o個樣架~!!!!!我今年買既無士多啤梨味wor大王......「我要食士多啤梨冰皮月餅呀....」完來上年我買左盒生果冰皮比佢食完之後佢就念念不忘, 由今年一睇到月餅廣告開始就問姐姐幾時買冰皮月餅比佢食....知道今晚會見到我之後就不斷講住「我要食士多啤梨冰皮月餅呀...我要食呀...我要食....」....結果用左個玫瑰紅豆呃佢話係士多啤梨...「好唔好食呀??」「好好味呀....」<<<開心到跳晒舞.....

以家d細路真真難服待.........