今日星期四, 隻豹如常相約熊&多氏姐妹游水, 我地如常游完之後爭扎食唔食野....入去游水前見到有架雪糕車, 我地決定如果出到黎仲見佢就食雪糕...

游完水, 出到黎果然見到架雪糕車仲係到, 隻豹第一個飛奔埋去買, 雪糕一到手就急不及待o甘食......食左幾啖見到希素揸住唔食....完來佢要影相, 隻豹即刻又好想影, 於是又摷個電話出黎要影埋一份.....摷摷摷.....搵到個電話出黎一隻手揸住個雪糕一隻手影相....但又唔知自己天生無力個人, 一隻手就唔到力按個制都手震震, 震震下.......悲劇就發生左.......

為左哀掉佢........我地決定去聰嫂再食過.......

見鴻星既水準好似好左, 老細想趁機再食多次........所以, 今日又有翅食.....

不過今日既水準已經比o個日差左啦...

因為曾生話想同我地食多次泰菜, 於是lunch就去左九龍城街市, 其實次次我地都係食返o個d野, 8個人叫左十幾樣野, lunch就有咖哩蟹食, 真係開心。

夜晚約左多比丁熊食生日飯, 由於想試九龍城既金滿堂甜品, 所以再去左食泰菜, 5個人叫左十樣野食。雖然d野食唔係好得, 但多多既芋頭魚, 海膽彿跳牆令到大家都好開心, 哈哈.......

食完飯即刻過金滿堂, 唔知食咩好樣樣都想食, 最後叫左7樣野.....豐富到呢.....個咖啡雪芭真係好好味呀~!!!

好多謝丁比遠道黎同隻豹食生日飯, 好開心呢, 仲有多謝多熊既生日禮物, 好岩用呀, 哈哈, 多謝多謝!!

最近隻豹患左懶得行街懶得買野懶得化妝症, 放假都唔係幾想周圍去, 繼上星期日懶得去街係屋企整左個超樣衰唔見得人既咖哩薯仔雞亦比鍾斯食之後, 覺得有d對佢唔住, 於是今日決定再整d(好野?!!)比佢食。

是日菜單有:大蝦沙律, 鮮蝦雜菜炒烏冬, 鹵水雞亦, 鹵水紅腸, 焗芝士薯角, 夏威夷果仁雪糕

兩個人食五餸一甜品, 飽到食飽差d坐都坐唔到........

其實隻豹向來都好少整野比人食, 因為身邊太多煮野食叻既朋友啦, 所以隻豹真係唔多敢獻醜, 除左必要時整比自己食之外, 連屋企人都唔多食過隻豹整既野食, 今次哩d全都係第一次整, 哈, 根本連自己都唔知係咪食得落肚.....

但鍾斯佢好似真係好鍾意食隻豹整既野, 每次隻豹話整野佢食佢就會好開心o甘同隻豹一齊去買野又一齊洗洗切切(雖則佢都係阻鬼住晒多), 又無論隻豹整左d咩鬼野出黎佢都好似覺得係人間極品o甘, 一路食一路點晒頭以表欣賞, 可能哩d係佢d鬼計呃隻豹以後做個煮飯婆, 哈哈....

雖然哩d都係好小好小既事, 但隻豹真係覺得呢, 兩個人相處, 真係唔係樣樣都老馮架, 我唔一定老馮整比你食, 你都唔一定要老馮要欣賞我做既野, 但如果大家都對對方所做既報以多少少既鼓勵同贊賞, 成件事都會開心好多.......

話說潘潘今個月加左人工, 想邀請我地一眾同事吃飯.....「豹, 我想請大家食飯, 你幫我安排下約佢地好唔好~??」「請食飯??好呀, 你想食咩呀?係邊度食呀??我book位!!」 「唔洗book, 食飯緊係黎我屋企食啦, 你地想食咩丫, 我家傭咩都識整.....」

噢噢噢....潘潘果然係富豪呀, 請食飯出去食埋晒d味精又無益, 又唔好食, 地方又焗促, 講野大聲d都唔方便, 緊係請返屋企二千呎大宅有誠意啦!!

係三日前, 約好大家定左今日食哩餐之後, 潘潘就比左個菜單隻豹過目, 無錯, 係菜單!!

「豹, 你睇下張菜單得唔得...??」「ok啦....差個湯wor....」

隻豹隨口講架咋, 唔係真係要咩湯架, 其實隻豹一向對西湯都興趣不大, 只係佢既然問我意見, 我又諗到d野, 咪講lor.......

轉個頭潘潘就再問隻豹「奶油龍蝦湯好唔好呀??」「哦, 好呀....」其實隻豹唔鍾意飲龍蝦湯.......

到左今日, o個班高層男人4點鍾收左市就去左打麻雀先, 豹哩d二打六就留到5點半收工先出發, 去到一眾爛睹鬼已經開晒局, 隻豹就發現左個書架於是隨手羅左本書就坐埋一邊睇.....潘潘又好鬼死客氣....「豹, 你想飲咩呀??」...坐係遠遠打緊麻雀既老細即刻知道隻豹既心意....「豹, 你唔好大佢呀, 你up得出既野佢都會有架, 咪玩野呀, 一係紅酒一係白酒好啦你~!!!」.....「係係係....比杯白酒我得啦!!」於是隻豹就只有乖乖o甘攤係張(虎??豹??)皮安樂椅, 邊食小食邊飲白酒邊睇書.....

到6點幾潘太亦都返左黎, 見隻豹係到睇書以為隻豹會好悶就走黎招乎隻豹....見隻豹睇緊本書仲好客氣o甘堅持要送左本書比隻豹, 攪到又食又拎真係.....同佢傾傾下....「本來平時星期五我自己同d朋友出去玩架, 基本上平時請客工人都自己攪得惦, 唔洗我, 點知佢(潘)前兩日無啦啦話要加個湯....平時我自己d朋友通常都飲酒唔會有湯架ma, 佢無啦啦話要加個湯仲話要龍蝦湯wor, o甘工人唔係話唔識, 但佢未整過龍蝦湯阿Derek(潘潘)又怕佢會攪唔惦, 哩個湯除左要龍蝦肉之外仲要將個龍蝦殼磨成粉放埋入去架.....所以要我一早返黎整lor...其實係邊個話要飲湯既呢??...」「errrr.......係我lor....」......「係你呀, 哇哈哈哈....你唔洗介意架, 其實都係Derek lor, 佢真係好開心, 所以就要求一次要我返黎整呢個湯....哈哈哈......」......

哩個龍蝦湯真係好好味架, 連隻豹唔多飲龍蝦湯既都覺得非常好味, 大家都激贊, 但隻豹又一次好搽左面朦膏o甘.....本來真係亂up話差個湯, 其實比個金寶湯我都ok架啦, 點知完來要麻煩到潘潘太座無得去玩要專登整個湯, 真係好唔好意思呢.....