星期三同靚太angel去左稻香打邊邊, 終於食左我今年第一隻大閘蟹啦....

鍾斯唔好食蟹, 但每年都會陪我食一次大閘蟹, 今日路過中國芳見有大閘蟹餐都幾抵o甘就試下啦.....隻蟹唔算大隻, 4-5兩倒啦, 唔算好多糕好靚, 成個餐我就覺得普普通通, 不過鍾斯話每年都會陪我食, 又食得幾開心o甘啦

今日係P既大婚之喜, 我地幾個傻野打扮靚靚去飲, 多熊豹丁都係以黑為主, 好襯呀我地.....

向來感性既P今日好激動呢, 隻豹向來冷血架ma, 見人地感動到喊就會狂笑, 正如友人所講, 未見過o甘激動既新郎哥wor...

不過笑還笑, 我都真係好衷心o甘祝P同老婆仔以後恩恩愛愛, 開開心心, 甜甜蜜蜜O甘一齊生活落去, 希望你已經找到你要既幸福, 快D生返個P仔P女比我魚肉, 哈哈哈....

據聞今年相春兼潤月, 所以喜事特別多....

今日係舊同事華華大日子, 佢請晒我地一眾同事, 今朝一早最貪靚既豹同靚太都打扮一番, 準備恭候華華既花車(o甘岩佢老婆娘家就係我地返工既屋苑, o甘好機會無理由唔逗返個開閘利是架ma) 

但點知當我地收到線報花車到左準備出去封閘既時候, 已經見到班兄弟團衝晒入黎啦, 有無攪錯~!!!邊個比佢地入黎架!!!

不過華華都好識做o甘比返個利是仔我地, 大家都利利是是高高興興o甘啦

玩左一日無心機做野, 一收工成班爛賭精就去酒樓開局, 隻豹哩d魚腩王又係比人湯啦, 今次死都要拍住嘉菲同佢孖份, 都係輸小小....

今晚華華做新郎哥情緒好高漲呀, 同平時詩詩文文既佢完全唔同....

唔知呢....其實每次當我飲完, 都覺得結婚係咪真每個人都應該經歷一次既一場大龍鳳.....如果結婚只係兩個人想一齊生活一齊走以後既路, 可唔可以簡簡單單就好, 甚至唔要o個套著左之後幾乎連新郎都唔能夠行近既婚紗.....

最近成日掛住買野, 好似好耐無同鍾斯好好地坐係到食餐飯啦....

話左收手之後, 今日決定咩都唔睇, 收工就陪鍾斯食芝士火鍋, 今次試左配海鮮併盆....

其實對隻豹黎講, 芝士火鍋配麵包就已經係最最最好味, 所以我都加左籃麵包....雖然好似唔係好多野食, 但可能芝士既關係, 都食到好飽呢...

乖乖o甘陪住鍾斯食飽飽後, 行過冷舖入去睇左陣, 仲諗緊今年織唔織件外套比佢好呢....

已經踏入11月, 朝早起身時天氣都已經明顯轉涼, 但都左中午, 太陽高掛, 依然好熱....

今日唔想行落去食lunch, 於是就叫小玉車我地出九龍城食.....但上左車都仲係諗唔到想食咩, 本來都係諗住去返街市食泰菜, 點知落左車就見到間新開既日本野食, 叫魚之味, 見佢lunch定食都係三十零蚊唔貴, 就入去試下啦....

真係好抵食呀, 一個定食配有有麵豉湯, 沙律, 薯角, 仲有杯野飲, 都係36蚊唔洗加一, 我地個個都叫雜錦壽司配烏冬同埋魚生飯, 魚生飯都好新鮮, 下次再黎九龍城lunch可以多個選擇啦。