呢兩晚都失眠，個人好攰。。。係壓力太大嗎？尋晚過咗一個勁 down嘅夜晚，我諗咗好多好多嘢。。。兼且亦辭埋職！
今日低能仔返工，佢本身今晚約咗人食飯，但佢個 friend最後甩佢底，所以佢今晚可以陪我。。。其實今日心情依然唔多好，好似仲有好多嘢諗咁！為咗令自己舒服啲，我選擇咗整嘢食，我鍾意整嘢食，除咗係因為低能仔外，另一個原因係，每一次有壓力、唔開心時，當我一整嘢食我就會覺得舒服啲。。。好似將所有壓力同難過都放晒落去咁！今日整咗杏仁瓦片同杏仁酥，唔知個杏仁酥佢鍾唔鍾意食呢？
今日低能仔揾多咗我，我同佢講我整緊嘢食，佢竟然問我係咪整俾佢食。。。我唔整俾你，仲會整俾邊個呢？差唔多9點嘅時候，佢 whatsapp我話依家返嚟。。。呢排佢成日都好遲先嚟接我，我問佢點解？原來佢同同事去咗行街，但下次你可唔可以話聲我知？唔好等我擔心你。。。
今晚等佢等到好肚餓，佢返嚟帶咗我去食 pizza hut，佢終於都同我食喇！佢應承咗我好耐。。。我哋又多咗一個第一次！今晚佢好好，佢陣係要我坐定定，然後擘大個口就有嘢食，種感覺係好 sweet，多謝你！！
食完飯我哋返咗屋企，睇番佢尋晚篇嘢，我諗佢今次應該真係 feel到我嘅難受！其實今晚當佢返到嚟時，佢俾咗條鎖匙我睇，原來佢執番個鎖匙扣。望住個鎖匙扣，我真係好想同佢講，可唔可以唔好再令我有藉口離開？呢段日子佢嘅忽冷忽熱，再加埋 Jason嘅 care，我真係諗不如選擇 Jason好過。。。起碼我唔使再怕自己講錯嘢，亦唔使諗點解佢成日都係咁！
坦白講，我真係一個普通人，我只係希望我身邊嗰個重視我，關心我。。。但呢段日子時好時壞，令我有啲抖唔到氣，兼且覺得佢已經將我送咗一半俾 Jason！低能仔，可唔可以唔好再將我推俾 Jason？
分類: 我們的生活點滴 |
