今日本來應該同潘迪詩入長洲，本人真係好想好想去，而且答應咗咁多老師，總之之後就冇入，好激氣，唔想講，呢件事唔想留喺我記憶度，今日同alice同cherry去街街，諗住買返嗰書包同eng本練習，書包就買到喇，不過本練習就買唔到，度度都冇，好大穫...

今日1點同alice喺lok fu出發，因為我哋真係住得太近喇~出奇地cherry今日早過我哋到~跟住佢哋陪我揾練習揾咗都ok多地方，不過都揾唔到，本嘢嗰名又唔似名咁，叫"Practise your Conjunctions and Linkers"，唉...難揾...之後買書包，揾咗幾個，不過唔多襯我，呢個好啲~我同alice嗰袋都係靠cherry幫我哋講價講返嚟。平時行街多數都係我最遲嗌攰，點知今日行咗陣我就已經嗌攰，無用...之後去食下午茶，啲冷氣勁凍，飲完嘢更加凍，cherry起埋雞皮~梗係啦佢，著短褲~

同alice一齊撘地鐵返嚟，死lor...我哋咁大個人，連搭地鐵都撘錯...

返到嚟angie就打嚟，傾咗都ok耐，範圍好廣，講咗啲感情道理，比佢貫輸咗好多喇，愈講我就愈down，唔知點解...

聽日返學校做board~

今日係最後一日統測，測eng同bio，bio唔係好夠時間做... 測完晒真係鬆咗口氣，真係想大聲嗌一聲!

小息落咗去揾陳家強老師交學科精英嗰board份草圖，跟住又唔知點解揾埋ck sir出嚟一齊傾，明明佢同我講話要20/4之後做好，要我哋放假做，轉頭同蘇征佢哋一齊揾多次佢又話唔駛咁快，佢講晒啦! 同佢有代溝...另一個問題係之前陳sir同我講會比$200我哋整，我哋放假返嚟整，佢哋又唔會返，咁點買嘢呢?如果我哋出住先都得，不過會痳煩咗啲，要分得好清邊張單邊個跟，一亂咗就痳煩，好彩蘇征開口問啫~如果唔係我唔知點開口，跟住比ck sir講到要我哋比咁，又好彩詩喬開口叫佢比錢~

miss鄭冇返，無聊咗兩堂...喺度講白痴嘢~講T-back，笑死~

放學諗住等埋潘迪s去食lunch，因為今日有讀書會，本人做主持~講"師生戀"...等咗佢好耐，佢原來今日唔去...咁諗住同佢講11/4去長洲啲嘢...佢又話去又話唔去...但係同miss lee講咗...唉...之後同alice同毛去食飯。

返到嚟就開始讀書會，傾開好地地，但係突然間比人問問題，明明我係主持嚟ga ma...問我會唔會主動同自己鍾意既人表白，唔會，個人認為呢啲應該係男仔做，如果佢都鍾意你既話，佢應該講，唔應該係女仔講，佢唔講有2個可能，1係佢唔鍾意你(咁就算~拍拖應該係大家都鍾意對方至開心)，2係佢怕醜(可以接受，不過唔可以拖好耐都唔講)，跟住我就比人駁返轉頭，話如果我唔講咁人哋點知...咁呢樣我就唔知喇...呢個係我既觀點。

唉...我的媽啊...我呢頭至測完驗，嗰頭就要我返阿婆度...比我休息下都唔得，我仲有大把嘢要做咩都未傾好，同alice同cherry都未傾好去邊個離島，同潘迪s係咪去長洲，整board...比多日我都唔得，話咩就晒我喇已經，哼.講得真好聽，佢都冇問過我...就晒我就唔會一測完就返去啦...10/4返嚟，9/4拜山，11/4唔知係咪入長洲，12、13/4返學校整board，仲有alice同cherry...密到呀...返到去又冇嘢做...我唔係唔想返唔想拜山，而係比一日我休息下都好呀...

拜山--->陽光+墳墓(不過表弟妹應該喺度，有返啲差唔多年齡既人一齊玩)

離島--->陽光+沙灘=happy~holiday~

噢~summer呀~青春呀~

今日第一堂就測chem，死傷無數咁...個個都唔識，琴日係咁勁咪chem，冇温過phy，落重注喺chem，點知落得如此下場...原來何耀文同我一樣，琴日係咁咪chem，冇理過phy，都係咁...handsome已經問咗佢自己幾多分，唔合格...至於phy，個人認為好簡單，不過好捉字"失"，通常喺呢啲咁簡單既嘢當中，我阿媽都會話:[淺水浸死人呀!]希望唔好因為咁而浸死我呀...

放學去聽學科精英計劃嗰簡介，入咗phy同eng，都好啦~不過chem同bio入唔到，仲要整呢個計劃嗰board，好趕呀...嗰圖都未畫...

同alice返lok fu食lunch，行過間新開既嘢，見到有2個人喺出邊等緊，我只係係咁咦望咗一望嗰2個人，原來其中一個係DJ"少爺占"，真係認唔出，之後幫alice同佢影咗張相，笑得勁假呀佢哋，嗰背景又好奇怪咁喎，喺馬路邊...好多人行過，佢唔高lor~都有啲核突，咁出名~竟然喺門口等外賣...

樓上啲人又發癲，整爛本書dum落街，跟住就吹咗啲入嚟我度...保佢大喇...

今日係愚人節呀~比蘇征整古咗~佢扮晒嬲我咁~嚇得我~不過好搞笑~又比另一個人整古，寫"其實我鍾意咗你好耐"，開頭都驚咗一驚，不過比人玩咗一次，我唔會咁傻ga la~跟住我都整古咗人~哈哈哈~

統測~同何耀文鬥高分，起初只係鬥中文科，後我又諗住3盆兩勝，咁就變咗計phy、chem、bio，不過我又諗諗下...佢chem同bio可能會高分過我喎~跟住我哋又加埋中文上去，不過而家變咗4盆，可能結果係一半一半，我就想加eng，因為我一定高分過佢，跟住佢又話唔好，一係maths一係a-maths，唔得~呢兩科佢一定高過我，所以又唔得，佢而家又話唔加，計4科，但係我又話計5科，所以拗咗好耐，不斷係咁4!5!4!5!

今朝第一堂就測bio，都好~唔駛比咗mr.wan上chem 連續兩堂chem直頭想死...bio應該好多人tip中題，我諗都有好多人好高分~之後就真係上chem，唉...好難呀...phy,chem,bio我覺得最難係chem... 次次抄練習都睇唔到，阿sir寫完就硬係要企喺我前面，成個畫面比佢遮晒...

bio係咁同何耀文傾學科精英計劃既嘢~

phy開頭好精神，但係後半part就好想瞓覺，唔知點解喺親phy lab上堂，只要啲人一唔嘈就好想瞓覺 其他lab又冇事喎...落堂嗰陣宣佈phy學科精英計劃既入選人~yeah~好開心呀~ 有我呀~~~physics萬歲~好似得我一個女仔咋~之前唔識做力學作業嗰陣Eric同Leo都有教過我~ 嘩~Leo嗰啲好model answer既answer~勁!不過好耐都冇再問過佢lu~

聽日開始就係統測喇，但係我都仲未收拾好心情，而家依然冇統測應有既態度同心情，仲好似平時返學咁...