今日年初一，無咩特別，都係咁~用咗幾個鐘睇晒嗰本我唔係咁有興趣既<<少女日記>>，睇完想喊...嗰故事幾慘...其實可能係我眼淺。計過今個假期我要睇幾多本書喇...總共8本，好意頭呀~中文4本、eng4本，仲要厚既...而家仲未做好功課、仲未畫畫、仲未睇完啲書、仲未練好笛...新年流流要去拜年ga嘛!!!過兩日仲返婆婆度住，我會做得晒啲嘢嗎???

之前喺年宵花市買既嗰枝吹氣玫瑰花都幾有用呀~可以比我當咪咁喺屋企發下癲~

新一年，我唔貪心~我只要'心想事成'就得喇~哈哈哈~

26-1-2006:朝早同葉傑(女仔)去尖沙咀撲書，喺尖沙咀揾到我哋要嗰本書~好彩揾到 如果唔係嗰SBA唔知點算，葉傑(女仔)話下次書展又一齊去~好!一於咁話，唔知會唔會又撞到暑假做義工識嗰個Anthony呢!?希望唔好撞到。之後好開心咁去買雪糕食 點知撞到何耀文同alan tam，我發現我喺親街食雪糕都會比同學見到...下次要小心啲...

返到屋企，唔知為咩，狂比媽咪鬧，我就嚟癲喇!8:00p.m.去到銅鑼灣同黎伯、鈞賢、朱恩、小雲、東少、余佬+佢嗰fd去行年宵，今晚比琴晚更多人，迫到行唔到呀差啲，不過好似多咗嘢~買咗枝吹氣玫瑰花~朱恩買咗好多好多嘢，我睇中咗個士多啤梨斜揹，比黎伯話:"你5歳咩~"，即時冇買。見到有班人整爛咗人哋檔口啲嘢又唔賠，仲扮聽唔到走咗，衰得佢哋呀~拎人哋啲嘢打人，整爛咗就走!

返到屋企好驚好唔知點 想揾人傾下計，但係又太晏，驚人哋瞓晒覺，見到leo on咗line，諗住揾佢傾，點知唔應我lor! 或者我唔應該成日煩住佢...

27-1-2006:隔咗成晚，今日同Alice去行街，終於有人聽下我訴苦，同我分擔下~但係我仲係唔知應該點做，好冇因為咁而開聲話唔守6s呢!? 咁避法會唔會有啲無謂呢!?最大問題係連Alice聽完都覺恐怖...

今日返到學校比'歐陽'係咁笑，笑我琴日比佢見到我食雪糕，仲話埋比人知，食雪糕不知幾正常，笑咩喎~

今日放學prefect一齊食嘢，我食咗兩塊曲奇就即刻上去mmlc當值，上到去又見到嗰個男人，我真係覺得佢係一個"賤男"，憎佢!衰到死，成日都串我，當正我呃佢唔得閒而唔去on duty咁，唔得閒就真係唔得閒啦!巧合地唔得閒又唔信咁!之前串完我，而家就扮晒冇嘢咁，今日仲同我講:"mug你咁對我ga~"，我點對你呀!?我比足禮貌，今日又死都唔肯放我哋走，搞到咁晏至走，趕唔到返屋企睇電視...仲要Alice等咗我咁耐...

返到屋企食完飯同媽咪去咗年宵花市~ok多人~有啲好特別花，有好多公仔呀精品嗰啲賣，好得意~有啲係石油氣罐咁既吹氣公仔，好搞笑~我就買咗隻馬騮公仔~行過有隻嗰頭好大既狗(有嗰人喺入面著住套狗公仔衫)，我多手行過推一推佢嗰大頭，因為佢嗰頭太大，佢有少少失去重心，嚇得我~以為佢會跌低...周圍啲人見到就係咁笑...有啲想成個人攬過去隻嘢度呀~一定好舒服啫~仲暖笠笠~行咗2個鐘，好攰，返屋企lu~

eng要做SBA，聽講我揀嗰本a christmas carol周圍都賣斷貨...聽日要同葉傑(女仔)四圍揾書呀...晚黑同其他人又去多次年宵~

p.s.今日銘癲咗...係咁"且"住我..."且"到我件冷衫長咗咁...

今朝出門嗰陣諗住"嘭"埋度門，點知我都未捉好嗰柄，道門已經自己"嘭"埋，縮唔到，夾中咗隻手指公...痛死... 正所謂"十指痛歸心"，我一隻已經夠痛喇...流咗少少血，估唔到一早就有"血光之災"，返到學校上office拎咪，又比道門夾到... 今日都唔知做咩事...

早會嗰陣miss yeun嚟揾我，比咗張校際音樂節既程序表比我，唉吔...第一輪就係我喇，好早呀...2月唔知20定21...我啲音都未搞掂...今次死得喇... 呢個holiday又有咁多書要睇...閱讀大使嗰邊都已經5本小說既物體...嗰本咁既關於戀愛既日記...我冇咩興趣...又睇過下...睇到我成個人都慘晒...愈睇愈心煩，仲有啲book report，啲日子都唔知點過。

上Bio，講起鼻毛，又講起"鼻唔"，講講下講食"鼻唔"，好核突... 但係又好好笑~ 直頭講緊高b先生呀~

eng堂，miss to係咁叫我幫我"汁"佢枱面啲嘢，張枱日日都亂到不得了，我"汁"好佢又整返亂，永遠都有好多嘢要放，放到落我張枱，唉...

放學終於返返國畫班，成個上學期冇返過... 啲嘢仲要追返晒...我相信我得ga!!!miss都對我有好大信心!突然好想多謝公公，多得佢由細到大都培養我寫毛筆，我而家寫字同畫畫唔錯，終算有啲獎拎下~去到點知又唔駛上堂，只係比咗枝筆我返屋企掃描，要畫年花... 都唔知畫咩花好~死喇...但係我而家好想跳返舞...好好彩趕到返屋企睇電視~yeah~

睇完電視出咗去增值+買畫簿，激死~增值嗰個人，我講咗幾次，佢仲喺度傾計，都唔知係咪做嘢ga! 記住佢嗰名至得!!!之後無無聊又冇咩mood咁走去"M"買雪糕食~而家食完都覺得自己無聊，咁凍仲食雪糕，途中撞到'歐陽'~

p.s.隻手指仲好痛...不過已經係不幸中之大幸了，如果係大風，我隻手指斷咗都唔定...

Maths堂，阿sir講咗個故仔:有一隻蜘蛛，喺一嗰落完雨既地方向上爬，佢爬咗好多次，但係次次都跌返落嚟，路人甲行過，見到蜘蛛，就覺得佢好蠢，只要繞一個唔濕既地方咪得lor~心諗:"嗯!我唔會好似佢咁既~"，呢個人就成功喇~路人乙行過就覺得蜘蛛呢種不屈不撓既精神好值得學習，呢個人就跟住做喇~到路人丙，佢覺得蜘蛛好蠢，咁多次都唔得就算啦~再睇一睇自己，於是就放棄了~我覺得有陣時諗嘢真係一線之差，只係睇你點睇ga咋...

首先，派中文閱讀卷，嘩...恐怖...我都要出去嗌返啲分返嚟...唉...高b先生仲勁，上堂嗌唔掂，小息同lunch都要去揾miss屈分，佢都真係ok煩下...食完lunch之後嗰堂係physics，miss明唔鍾意佢，仲為咗拎分遲上嚟，搞到放學要揾miss，分又拎唔到，何必呢?今日中文堂我起身出去，佢就即刻彈出嚟 我即時坐返低，原來葉傑(女仔)同陳遠A佢哋都見到... 朝早喺canteen又坐喺我同葉傑(女仔)附近，不過最近我因為要紮頭髮遲咗班車，真難為葉傑了~

P.E.堂要考試了，miss鄭差唔多遲咗成堂至返到...考完啲唔係咁辛苦既嘢之後就要考跑9分鐘...跑得好辛苦...打鐘放lunch我哋仲跑緊...銘見到我哋跑，喺5樓好大聲咁幫我哋打氣~我聽到好清楚佢嗌我嗰名，不過對我一啲用都冇，因為我已經冇晒氣...跑完之後好想嘔，又好暈，成身軟晒，有少少抽筋，嗰口仲好似有啲血味tim...呢９分鐘令好辛苦...食完飯返嚟仲好想嘔+好暈+軟晒，上physics啲人仲要整我...葉傑(女仔)同何耀文講我唔舒服，佢真係唔整我喇~仲叫人唔好嘈我~太好人喇佢哋~~~

放學好返好多~已經唔暈同唔想嘔喇~不過對腳就好痛...