| «‹ September 2025 ›» | | S | M | T | W | T | F | S | | 1 | 2 | 3 | 4 | 5 | 6 | | 7 | 8 | 9 | 10 | 11 | 12 | 13 | | 14 | 15 | 16 | 17 | 18 | 19 | 20 | | 21 | 22 | 23 | 24 | 25 | 26 | 27 | | 28 | 29 | 30 | |
|
2007 年 5 月 31 日 星期四  | |
感謝主  |
今日出門口番工見陰陰天，懶惰的我見到街上面一半人撐著傘，一半人無，咁即係唔算大雨啦，心諗：公司仲有把遮，就胆粗粗咁唔帶遮番工，點知落到樓頗大雨，上左車仲極大雨，如果落車都係咁，我實完全變雞．．．濕水雞！！！！諗起都大力搖頭，唯有求神，真係好！神仍然眷顧我，讓我做番個人，落車係完全無雨架∼
夜晚約左艾文佢地試衫，不過今次都唔係試啦，只係揀左隻色就算，我真係好難想像到出黎既效果會係點，仲有個粧啦，仲有個屎人頭啦，仲想要架車添，仲有．．． ．．．突然覺得應承做衫變左我既大難題添∼
今日全日呆滯，周董係咁撩我玩我都無咩反應，佢話：死勒，講笑都唔識添！其實我今日無咩野，真係只係呆啦，Ｄ藥明明只係寫住有睡意，但我就變左有呆意。下．．．係．．．哦．．．唔．．．我今日講得最多呢幾隻字。
好奇怪咁上左車，之後就開始落雨，又係頗大的雨，我又一次感謝主，然後睡著。
落車，回家，無雨，收到衰人醫貓，我再記起一次感謝主。
到底我幾時至肯講我願意呢？？？！！！呢個係今日的諗題。
我願承擔，我願承擔，緃然沉痛，愛是無限．．． ．．．
|
| 刊登時間︰2007-06-01 12:25 AM [ 訪客留言(0) ] [ 編輯日誌 ] [ 分享至FACEBOOK ] |
| 2007 年 5 月 28 日 星期一 | |
| 手抽筋 |
自從比d海刺"吉"親之後，隻手都有ｄ不能自己，由腫痛至麻痺至容易抽筋，都唔知係ｄ刺毒還是ｄ藥毒。
總之而家好手緊咁啦！！！(真係應晒我的生活狀況)平時寫字已經慢，而家．．．仲慢，平時考試寫野都寫到手抽筋，而家．．．唔寫都抽。
番到屋企，ｅ．．．整齊左喎∼清理左ｄ雜物，我可以彈下琴，順便練下ｄ手指啦。一練就發覺，以前已經彈得差，而家．．．仲差ｘ１００００。連八個音都．．．仲手腦唔協調！唔知我可唔可以安排到一個星期練一個鐘琴呢！！！
今日好乖咁睇過下半課書，不過仲未諗份功課點寫好，努力！！希望聽日早ｄ收到醫貓。 |
| 刊登時間︰2007-05-28 11:55 PM [ 訪客留言(0) ] [ 編輯日誌 ] [ 分享至FACEBOOK ] |
| 2007 年 5 月 27 日 星期日 | |
| 浸禮 |
昨晚半夜 交加，還擔心今天的情況會如何是好，早上起過身來，陽光普照，感謝主。還是睡得不好的我起來慢動作地梳洗、收拾行裝，最後還是忘記取了出來的記憶卡，有相機都没辦法影相了。
遲了一點出門，加上迷路王又迷路，於是比預期還是遲了一點。其實我事先已看了看地圖，但依靠的還是回憶，下車後，走到他和我返教會的巴士站，那麼即是我走錯了方向，過馬路，一個U turn，感覺很陌生，再走到他和我食早餐的地方，然後是他的家，對了．．．再輾轉一會．．．還是致電店主引路，真失敗的迷路王。雖然最後還是得不到想像中的最好結果，但束花比預期中得體，總算不費我的苦心。
雖然浸體是基督徒很重要的一個環節，但人越大，對繁文縟節就越．．． ．．．。牧師話人通常都愛別人來"櫈"自己高興，我想我倒有點唱反調，什麼婚體呀！乜禮乜禮，對於我來說：簡單就是最好。我倒不想苦了我的親朋好友。只是我唔係一個人係個荒島，所以show must go on。人大了，會因為你想我做而做；你開心所以我開心，因為你是我的親朋好友嘛。
朝九晚六，花了一個辦公時間完成一日的浸禮，說不疲倦是騙人的。
今天遇到了三個爆炸：
１．早上熱到爆炸，回程時又沾上了一點雨水，很需要一個熱水浴。
２．回到家，即時開熱水爐，佢玩弄我，給我一下"Boom"的聲嚮，可能佢都熱到爆炸-____-"，仲唔知飛左ｄ咩落街。
３．我好驚．．． ，但不忘興到爆炸！！！無涼沖無寧死，最後沖左個凍到我跳舞的凍水涼。
P.S. 仲有第四個爆炸爭ｄ唔記得，最憎人放飛機仲唔聽電話，雖然我有時都係咁，不過我會好好記住你架！！！
然後提醒自己以後唔好咁對人。
|
| 刊登時間︰2007-05-27 07:52 PM [ 訪客留言(0) ] [ 編輯日誌 ] [ 分享至FACEBOOK ] |
| 2007 年 5 月 26 日 星期六 | |
| 電話VS男人 |
今日無安排節目，我要休息，好好休息，仲有已經過左期的功課未做，下星期仲測驗添，真係唔知點算。
起身就去左銀行，今日事情終於告一段落，我ｄ好寶貴既信用(卡)番晒黎啦！呵呵！前兩日無＄無卡，行街都無心機，睇中買唔到係一件好殘忍的事。之後上網、做Facial、整甜品、選科．．． ．．．不過，始終無溫過書同做功課。
中間條友話搵我傾電話，ok啦！點知佢打黎無野講，相信只係想本小姐撩佢大人講野啦，都算！最後條友竟然扮收唔到收線，ｄ戲假到呢。好似從來都無試過有人咁對本小姐，其實我一ｄ都唔介意收線，不過咁唔光明磊落的就．．． ．．．晚上，同某人各持己見，睇黎佢好忟，而我就好有耐性，雖然我好堅持，不過我無一野收佢線，仲好溫柔咁同佢重覆又重覆咁講我既論點，真係好難得我會形容自己溫柔，我的語氣的確係好溫柔而有耐性，面對佢無理取鬧同埋人身攻擊，我一ｄ都無嬲，仲可以咁好，突然覺得自己好叻，何來的EQ，可能我心情太好，而相信最大的重點係：我一ｄ都唔在乎。越來越覺得有ｄ野講得好岩，如果女人可以對個男人唔囉唆，唔發脾氣，唔呷醋，唔扭計，証明呢個女人愛極個男人都有限。然後，記起周董比我隻黎明都未聽，播左半晚，好似返番去當年，諗起伯爵朗月，好想打個電話比佢，對住佢，所有女人唔做得既野都做晒啦，仲會唔會係朋友呢？諗下就好lu，呢一刻．．．太浪漫，浪漫到只適宜閉起雙眼，躺在床上，靜靜地聽，其他的鎖事，還是算了吧。 |
| 刊登時間︰2007-05-27 12:59 AM [ 訪客留言(0) ] [ 編輯日誌 ] [ 分享至FACEBOOK ] |
| 2007 年 5 月 25 日 星期五 | |
Internation Trade  |
今日稍有知覺，個腦就出現"唔番工"呢三個字，但係隨之而來的訊息係．．．"要番學"，唯有死死地氣爬起身。
番到公司又無想像中咁攰喎！但係番學時就有ｄ心不在焉，都係因為攰啦。死啦，原來時間過得咁快，下堂已經係尾二果堂，我到今時今日，都唔係好知做緊咩，真係死得。佢果ｄ好理所當然地一步撞一步的推敲，我明，但好明顯，我推唔番，真係要搵福爾摩D救命至得。
福爾摩D．．救命呀！福爾摩D．．救命呀！福爾摩D．．救命呀！ |
| 刊登時間︰2007-05-26 11:52 PM [ 訪客留言(0) ] [ 編輯日誌 ] [ 分享至FACEBOOK ] |
| 2007 年 5 月 24 日 星期四 | |
勒勒比JackJack  |
今日放假呀！！真好呀！！睡到自然醒都已經中午，今日的陽光不俗，有好多野想做，但一起來都係痴住係個網度，想搵ｄ見習護士的資料，聰明的你可能一睇就明，呵呵！我又想轉行。不過咁，我搵唔到呢！聰明的你可能都明白，隨遇而安的我會點。
睇到隻野打黎，我就好趕忙咁流洗，不過唔係出去會佢，去左園圃先，大頭蝦的我又唔記得放ｄ野落袋，去到企左係度，真係忟都無用！！就是但做番ｄ野，抆左幾棵苗，濕淋淋攪到去街街都麻鬼煩。
JackJack上映的第一天就急不及待即時睇啦！！見到佢張Poster真係想偷番屋企架噃。最鍾意都係呢集有好多個JackJack，我望住佢都可以傻笑好耐，但全場好似得我一個係咁．． ，整體都．．．OK啦，始終覺得第一集係最好睇，而且故事完整ｄ，今次加個周潤發，極其量只係市場需要，套片唔係好需要佢囉。
睇完三個鐘，去搵左蘇ｃ黃講果間餐廳食鵝肝，除左個鮮蠔周打湯好味以外，無樣野好味，好失望，下次都唔會再去，呢個應該係蘇ｃ黃推介而我有去試的唯一一間唔得既，可能真係價＄平掛（但朋友竟然話貴！）
然後去左搵Wink，哈哈！送到上門添．．．真係好cheap呀．．．我ｄ菜！！跟住行街，都係買唔到要買既野啦，之後食糖水，隻野帶左我地去間好詭秘既石磨坊，我地係食既過程中，由極熱變左極凍，我要加埋極攰。上到車都唔理3721，瞓覺是也。番到屋企又點幾，第日唔駛做咁．．-_____-"。 |
| 刊登時間︰2007-05-26 11:44 PM [ 訪客留言(0) ] [ 編輯日誌 ] [ 分享至FACEBOOK ] |
| 2007 年 5 月 23 日 星期三 | |
| 攰的延續 |
星期一．泰簡單
今晚約左拍機，早兒，干兒食飯，去講左好耐既泰簡單，都算好食，只係覺得有點迫，如果唔係我地自己講野都講得好嘈的話，其實身邊的聲浪都蛮大，因為太近勒。
雖然無見好耐見下大家都好開心，不過我未食已經先攰，今日狀態不怎好呀！等到八點，一食就食到十點半，然後食甜品，我真係好想講我想番屋企先，好少有地我無咩心機食甜品，雙眼明顯地支持唔住，不過唔敢，始終難得一見，最後又係一點至番到屋企，攰到癲左啦。
不過要多謝你地，請我食霸王餐啦！下次到我．．．^^
星期二．太眼瞓
今日要預備交功課，個網真係慢到呢．．．慢都算，仲要錯誤，咩都睇唔到，來來回回徙左我好多時間至睇到要做ｄ咩，我已經無咩時間，又要擱置。然後諗起Plan B，就打電話搵個衰人幫下手，唔知點解，事情發展都今日，我既直覺話我知，唔會如我想像咁，但係算啦，鬼叫我無時間，希望不至於太差，我個腦有好多畫面，始終覺得由我自己做會更加好，唉！我就係咁。
星期三．唔舒服
可能呢排成日掛住玩，玩到個人心都散，本來要上堂，但出到去一半，個人又攰又唔舒服，攪笑既係：我放工去左個距離屋企更遠的地方折番回家，但時間係同我平時一放工就番屋企係一樣架。嚴重覺得而家果度係鬼地方。朋友狂問我：你轉工未！！！！ |
| 刊登時間︰2007-05-23 09:30 PM [ 訪客留言(0) ] [ 編輯日誌 ] [ 分享至FACEBOOK ] |
| 2007 年 5 月 20 日 星期日 | |
| 無謂的第二天 |
今日是昨日的延續，又是没做過什麼，但現已夜深。
今日Join左豪少潛水，晨咁早未夠六點就要起身，真係好難受。攪完一輪真正落海約十點半，我實在太耐無落海，真係咩都唔記得晒，好失禮呀．．．。以前都識自己SET野，但今次完全唔識，以前會有人給予我全部必備的工具，但今次無，以前落到海會有人拖住我帶我游，但今次靠自己，於是，我出事啦，第一次落海唔夠鉛要上番船，第二次落海好唔掂水兼中刺，仲唔見左BUDDY，於是上水，係水面好努力咁游左我諗一個直池度啦，覺得好鬼攰，於是決定唔落番水，我驚下次游唔番上船呢！結果我只潛左十五分鐘，真係好失敗．．．。
我呢個依賴精以後都唔可以咁依賴。
然後食過晚餐，回到家，洗過頭沖過涼，一日又就咁無左ｌｕ。 |
| 刊登時間︰2007-05-20 11:32 PM [ 訪客留言(1) ] [ 編輯日誌 ] [ 分享至FACEBOOK ] |
| 2007 年 5 月 19 日 星期六 | |
| 無謂的一天 |
今朝要番工，基本上只做了一件事，就是聽老闆無聊的Talk Show，消磨了全公司上下一個早上的時間，然而個人對這個Talk一頭霧水，主要是對象問題，Talk完才明白，原來佢講既說話，針對的只係一個人，真係徙時間。
放工後，見天陰但無雨就去左園圃，怎料前往途中開始下雨，然後一直下個哇啦哇啦不停，呆坐在那裡數小時後回家，但在途中遺下銀包，不幸中之大幸，最後都能物歸原主，只是現金全數清光，不過，我的卡都全CUT了，這個星期又没＄用，最邪的是：又是遇上公眾假期，開始討厭匯豐!!!!! 結果來來回回的没做過什麼，又過了一個下午。
回到家，吃過飯，收拾一下，講講電話，又已經夜深了！時間過得真快，只是十分無謂。 |
| 刊登時間︰2007-05-20 11:16 PM [ 訪客留言(0) ] [ 編輯日誌 ] [ 分享至FACEBOOK ] |
| 2007 年 5 月 18 日 星期五 | |
| 預備測驗的一週 |
二零零七年五月十一日（星期五），放工後上學，放學後突然電話響，失而復得的約會，原本以為是飯局，怎料是酒局，跟多熊比＋朋友仔蒲吧，雖然喝了兩杯已經開始胃痛，但還算玩得好開心，只是隔離的人有點討厭。
二零零七年五月十二日（星期六），十分疲累，睡了一整天還是想睡。
二零零七年五月十三日（星期日），拖著疲累的身軀前往園圃，做令人更疲累的工作，不過好開心，我的園圃，喜歡那種一手一腳的感覺。
二零零七年五月十四日（星期一），還是有點累，看過一陣電視就倒頭大睡，只是睡也睡不好。
二零零七年五月十五日（星期二），為了看蜘蛛俠，於是行街、食飯、買龍貓，結果深夜一點正，蜘蛛才告落幕，雖然比想像中好看，還發人深省，但很眼瞓耶。每個人都有選擇權，可以選擇行善的，選擇作惡，選擇原諒別人，選擇原諒自己。
二零零七年五月十六日（星期三），本來今晚要上堂，然而我今天的選擇是，回家睡覺。
二零零七年五月十七日（星期四），今晚只懂狂哭、嚎哭，今日的心情低落得"污糟"忍不住問，我還以為我只是在呆。
二零零七年五月十八日（星期五），到了測驗的時刻，結果跟今日的天氣一樣，雷暴、下大雨。其實已經基本上把內容看過了一遍，只是消化不良，每次都跟自己說下次要好好努力，然而還是老樣子！！！WINK說我是完美主義者，我反而覺得我只是拒絕没用主義者。
著實我覺得自己十分没用。今天我是一敗塗地的，突然很想你，原來有你在的日子是一個推動力。 |
| 刊登時間︰2007-05-19 12:19 AM [ 訪客留言(2) ] [ 編輯日誌 ] [ 分享至FACEBOOK ] |
« | 12 | 13 | 14 | 15 | 16 | 17 | 18 | 19 | 20 | 21 | ... | 71 | »
|
