今日真係超級黑仔！！！！＝＝＂　今日o既黑仔應該係由半夜開始講起。。。

訓到大約半夜３點手機突然響起，雖然我懶訓成日聽唔到手機鬧鐘響，但電話響我實聽到！！冇為意邊個打俾我就聽左電話！！

對方係個男人，我個腦淨係load到＜打錯＞兩個中文字，完全load唔到日文點講，後來我HELLO左幾句扮聽唔到聲CUT左佢線，

點知條友再打黎，今次我醒一醒，用日文同佢講＜打錯號碼＞，佢係咁同我講冇打錯，問我係咪訓緊覺，我冇理再佢CUT佢線，

之後佢再打黎，仲要求TV-CALL，我諗應該係類似視像會議，我冇聽電話。俾佢咁樣嚇一嚇，攪到我４點幾先訓得著∼

到朝早返學，原來車飛過左期，身上又唔夠錢去續車飛，唯有買單程票返學，大拿拿３８０YEN可以買個飯盒嫁ma，好唔開心。

點知落到月台睇住２９分班車走，注定今日要遲到！自己遲到都算啦，仲要累埋高同學同我一齊遲，超唔好意思

搭車時諗住send mail，爭一隻字就打好，點知電話無啦啦自動重新開機，全篇冇晒要由頭打過，心情真係跌到落谷底＞O＜

今日黑成咁都唔敢周圍去，放學立即返屋企，點知又送車尾等左成１０分鐘車！！心情低落最好就係訓返覺好o既，

結果訓訓下覺聽到怪聲，成張加藤成亮海報跌落黎，仲整＜巢＞左少少tim，點解會貼唔穩嫁？！唉。。。。。。。。。。。。。。

上星期六晚同班上o既同學幫Susie補祝生日，一行１５人去左食PIZZA放題，不過又發生左d好白痴o既野！今次係鄭同學負責訂位，

佢竟然訂得８個人，個職員話如果要等大枱至少要等1.5小時，最後Susie決定大家分開坐，完全冇左出黎食飯o既意思law！！！

1,980 YEN任飲任食兩小時，有好多款PIZZA同意粉，不過其實都唔係好抵！！例如一圍枱８個人，每次最多叫８樣野食，

d PIZZA同意粉仲要係即叫即整，差唔多等成半小時先有得食！！不過後來我都可以食到好飽，因為有幾個人做左d好傻o既事......

話說我係坐８人枱，由於張枱太長分食物唔方便，所以有人建議分開四個四個咁叫野食，我同另外三個同學叫左PIZZA，意粉各二，

大家share黎食，另外果四個人超冇默契，一人叫一碟意粉自己食，食完碟意粉都飽左七成啦，之後叫左o既野食咪食唔落俾晒我地

而且坐我隔離果個人超冇禮貌，食物等得耐又爆晒粗，好多餐廳都係如果要叫侍應就＜禁鐘＞，佢就大大聲聲响到叫人，超失禮！

呢d都算，最差係基本禮儀都唔識，叫佢幫手傳水俾其他人又唔理，淨係掛住自己飲！一碟野食share又唔會理其他人食左未，

不停食完又食，淨係你一個肚餓咩！！好彩佢唔係讀我果班，唔洗次次聚會都見到佢，真係超唔想同佢一齊食飯！！！！！！

食完飯Susie建議去唱通宵K，不過去唱K果班都唔啱玩o既，所以我冇去到！唔去仲慘，要同果個超冇禮貌o既人一齊走＝＝＂

好彩高同學打俾我話响附近，呵呵，即時話約左朋友走先！！高同學好慘呀，全程聽我發牢騷，唔知佢有冇d自投羅網o既感覺呢

唔知點解次次出親去食飯都係唔開心收場！再係咁下次唔去啦＞＜　食一餐飯o既錢足夠我食幾日嫁！！！

　開始好有聖誕氣氛啦∼∼

幾日冇打日記，並唔係我偷懶，而係唔知Susie會唔會黎睇我日記，怕呢個小驚喜會穿煲，安全起見所以停左兩日冇打！！

尋日係Susie生日，平時Susie對我咁好咁錫我，我生日時又送左隻大公仔俾我，而家輪到佢生日，我當然要花d心機啦∼

本來有諗過送飾物或者衫o既，不過呢方面我唔在行，最後整左呢樣野俾Susie：

　藍莓芝士餅，我親手整嫁

以前我都有同小K整過野食，好似曲奇餅同木糠布甸咁，芝士餅真係第一次整，仲要係一個人整，真係好驚險！！＞＜

１１月４日，星期四

放學去買材料整蛋糕！！網上o既中文食譜寫要淡忌廉同魚膠粉，我搵左幾間超市，研究左好耐，最終都搵唔到呢兩樣野！！

後來我見整蛋糕o既材料個盒面有日文食譜，發現有＜生忌廉＞呢個字，而且份量同中文食譜寫o既淡忌廉差唔多，我諗係同一樣野黎！

至於魚膠粉，我又係用同樣方法搵到類似o既材料！！初時都好順利，不過一放生忌廉同疑似魚膠粉落去之後就覺得有d危險∼

始終唔知呢兩樣野有冇買錯，份量又唔知啱唔啱，所以都係練習一次先！！第二日放學再買材料整都趕得切夜晚送俾Susie∼

好彩咋！！！！因為中文食譜寫魚膠粉放９克，我整個蛋糕又比食譜教o既大，所以放左十幾克疑似魚膠粉落去，結果.......................

完全唔似芝士蛋糕，變左好似砵仔糕咁！高同學話似布甸，Joan同Rocker話似奶酪！不過大家都話味道OK！係個口感怪左少少∼

１１月５日，星期五

Susie正日生日，如果要今日送蛋糕的話真係得返一次機會整，只許成功，不許失敗！！放學即去超市買材料返去準備整蛋糕，

後來Susie話佢同朋友慶祝，今晚應該唔返宿舍訓，約我地聽日中午先補祝，即時變得有好多時間慢慢整！！

由於尋日係練習，所以冇整到餅底，冇練習過即時出意外＝＝＂哈哈，唔夠餅乾！！我見網上寫第一次整蛋糕餅底最好厚d，

冇辦法啦，唯有去超市買！懶得行太遠，去左間貴價超市買，竟然俾我發現有麥維他消化餅，之前我搵極都搵唔到，

唯有用瑪莉餅代替。由於用消化餅整o既餅底真係好味d，所以最後我都買左盒消化餅，之前整落o既瑪莉餅餅碎即時被我冷落，哈∼

今次唔敢落太多疑似魚膠粉，日文食譜寫落５克我就落５克，落完又好怕落得唔夠，個蛋糕唔夠硬會塌∼∼∼

１１月６日，星期六

我同Joan，Rocker去Susie間房補祝佢生日，Susie見到個蛋糕真係嚇親，佢初時以為只係食普通蛋糕，冇諗過係我親手整o既，哈哈！

今次個蛋糕好成功，不過我個雪櫃太凍，雪到個蛋糕硬左d，但味道好好味，我地四個女仔一邊傾計一邊食蛋糕，終於清晒

Rocker同Susie都話想學整，問我幾時開班教整！Susie仲話下次唔好去食甜品buffet，因為我整得仲好味，嘻嘻，好開心呀

之前以為整蛋糕要買好多用具所以冇整，原來都好簡單，等我返到香港整俾大家食啦 ^O^

左：朱古力，人地送俾Susie o既生日禮物，佢分俾我地食∼

右：Susie話聽講如果過左生日先補祝同收到禮物，就要俾返錢作回禮，象徵式每人派個 １YEN∼