１０月２８日，星期五

上次學校旅行去生駒山，行山攰到個個嗌晒救命，今次旅行去奈良公園，周圍都係勁臭o既鹿屎，大家都話想即刻返屋企沖涼洗鞋！！

4月5日同4月6日篇日記已經介紹過奈良公園有咩野睇，所以今次唔post風景相啦！想知o既請去返之前o既日記到睇啦∼∼

　月台擠滿晒我地學校o既人

　第一次咁大班人一齊去奈良∼

　啡色帽o既就係坂詰老師

　哈哈，白痴！

　鄭同學試過鹿餅，佢話冇乜味道！

　同一個角度，Susie同林同學睇起黎腿好長，但我同Yumi就＝＝＂

新學期2E班黎左幾位新同學，一於介紹下同學！！

　Mai，泰國人，同我住埋同一間宿舍嫁∼

　姚同學，中國人，所以同張旭，張天馳好friend

　林同學，台灣人，未黎我地班之前已經認識Susie

除左同班同學，都要介紹下呢兩個人，因為成日出現响我日記，但大家又唔知佢地咩野樣！

　高同學，台灣人

　Heran，韓國人，而家同外國靚仔一班，好羨慕呀！！＞＜

　靚仔+可愛 ！今次唔係响FACEBOOK偷相，係Heran send俾我嫁！

有日Heran同我講，話同靚仔傾計時話左俾佢聽，有個朋友讚佢靚仔，靚仔叫Heran同返朋友講多謝，果個朋友......咪就係我law，哈哈

大約12點幾去到若草山，其實只係個山坡，大家就係响呢到食午餐，大家唔好睇d草好綠油油咁，其實周圍都係鹿o既＜黃金＞

有人唔理咁多照坐落草地，有人舖張紙先坐，不過我兩樣都接受唔到，因為太接近d＜黃金＞會食唔落午餐！！哈哈∼

食完午餐等老師點埋名就走得，之後同學黎左我地宿舍打麻雀，Judy..Mira..Sara周圍去人地房突擊檢查，好彩我有執房啫∼

佢地見到加藤成亮張海報，竟然話同Kaku有d似樣＠＠＂Judy話咁多間房，我果間最乾淨，要頒個整齊獎俾我，嘻嘻

　夜晚成班人去左食飯

　我同Susie好恩愛　右邊果個係鄭同學，韓國人，都係新黎我地班o既！

夜晚食飯發生左段小插曲，話說之前間餐廳講到明16人以上一定要食放題（任飲任食兩小時，2800 Yen一位），我地有17人，

點知有人話放題貴，問可唔可以食同唔食放題o既分枱坐，之前網上問又冇人有意見，而家餐廳緊係唔俾我地分枱坐啦！！

驚我地食放題o既不停叫野食然後拎俾第二枱！！最後餐廳俾我地揀唔食放題，逐碟計錢，咁都算啦，最攪笑o既係，

每四個人一組叫野食，然後記低自己果組食左幾多碟！雖然大家分開叫野食，但d單係入晒同一個枱號，所以大家要爭野食，

最後埋單又唔知邊一組計錯碟數，個總數唔啱，總之就超混亂！其實總有人食得多同食得少嫁啦，點解要分得咁清楚呢＝＝＂

總數除返開咁多人咪算law，可能台灣同香港o既文化唔同掛！！其實出黎食飯都係想開心啫，無謂因為少少野咁執著啦∼∼∼

　我同Susie..Mira..鄭同學一組叫野食

由於唔係任食，所以要就住叫，如果唔係埋單仲貴過食放題咪好白痴，哈哈∼∼飲品都唔敢叫太多杯！食得唔夠暢快呀∼∼

不過都有幸運事，隔離枱果幾個日本女仔叫得太多食唔晒，所以拎左d雞軟骨串同炸雞皮俾我地食，慳返唔洗叫都有得食^^

　聽Heran講晚餐o既南瓜布甸好好味，所以食飽飯返到宿舍都要走去食返杯，正！！

１０月２９日，星期六

悠閒o既一日，淨係响到煲劇，開始睇＜讀心神探＞，發現林保怡個樣好悶　極有可能因為佢個樣太悶而令我唔繼續睇∼∼

　電梯內貼左張告示

內容係話收到有人投訴深夜發出嘈音，叫人11:00PM後靜d！！實在太好啦，我想投訴樓上好耐嫁啦，成日半夜3,4點行黎行去，

發出嘈音擾人清夢，希望樓上果個人睇到張告示之後唔好再嘈∼∼　其實會唔會係我樓下投訴我半夜三更成日都唔訓覺呢？哈哈∼

今日係２８號，黎左日本七個月啦！！大家係咪同我一樣，覺得時間過得超快呢？仲有五個月就放假返香港，超期待！！

　下次早餐見到呢個疑似pizza o既物體，都係唔好食，食普通麵包好過∼

因為佢入面有超多洋蔥，仲要係生o既，食完之後個口超大陣洋蔥味，要成朝不停食薄荷糖先攪得掂＠＠

永井老師真係好好人，份測驗卷竟然有供詞填充題，唔似得之前奧村老師d測驗卷難到死，不過唔知係好事定壞事啦！！

　午餐食漢堡包＋薯條，d薯條即叫即炸，又熱又脆，超好味呀∼

　Thomas請我同Heran食puff，嘻嘻，多謝

天氣咁凍最好就係訓覺，午睡......唔小心訓到9:00PM，如果唔係因為晚餐食咖喱，我真係想繼續訓覺唔食晚餐∼

咁夜食飯都竟然撞到Susie，佢話本來唔食晚餐嫁啦，不過一返到宿舍就聞到好香咖喱味，終於忍唔住走左入飯堂食飯，

哈哈∼∼原來我地兩個個鼻都幾靈！！以前Hilda Mama煲湯，我聞幾下就估到煲咩野湯，係我個鼻靈定Mama煲d湯太香呢？！

　Susie做兼職果到個店長請佢食o既，佢請我食左粒，入面有一大粒夏威夷果仁，正！！^^

嘻嘻∼∼尋日post果兩張相都見唔到個女仔o既樣，今日食飯時成功偷影左佢，大家準備好未呀？？

　佢好專心食緊飯，所以唔知我偷影佢∼∼

不過俾佢發現都唔驚，因為部電話係高同學o既，我一定會講話係高同學叫我幫忙偷拍佢，哈哈！！扮傻我至叻∼∼

講開有名人，由我第一日黎到就已經見到食堂有塊簽名板，不過又唔知係乜水！！！

　一睇就知佢叫＜蕭一傑＞

用YAHOO!搜尋，終於知道佢係邊個啦！！佢係台灣人黎嫁，之前讀＜奈良產業大學＞，係大學棒球隊o既隊員，

我認得佢套衫，宿舍有幾個日本男仔都係著呢套，所以我估佢以前係住呢間宿舍！佢而家係日本職業棒球＜阪神虎隊＞o既投手，

日本人好鍾意棒球嫁，我見YAHOO!都搵到關於佢o既新聞，佢應該都算係一個有名人∼∼

　晚餐食得好辛苦，d魚好多骨呀＞＜

今日大阪得10度左右，不過冇想像中咁凍，著一件長袖衫加厚褸就夠！！至於最辛苦，咪就係朝早起身果下law＝＝""

Thomas咪就係因為天氣太凍懶床唔起身，終於遲大到，緊係啦∼∼訓到10點幾先起身，真係羨慕死隔離！！！！