唔經唔覺又到左2006年既最後一日，今朝就踩單車出去馬鞍山同我表弟佢地飲茶，然後同我表弟一齊踩返入大埔。夜晚又話出去表弟屋企打邊爐，咁又再踩多一次車，夜晚8：10先係佢屋企返黎，返到屋企係9：20。今日竟然踩左四次車，仲要都係行同一條路，去既目的地又係差唔多。

今日係我阿婆80大壽，於是下矢就出左去樂民食蛋糕，到5點左右就行路去尖東食晚飯，沿住海邊慢慢行，行到目的地都用左45分鐘。夜晚諗住坐271返屋企，但為左睇《一公升眼淚》，結果都係坐火車，用左差唔多一小時返去，返到屋企時間係10點30分！

今日係一年一度學校旅行既日子，我地去石澳。朝早9點先上到車，架車走去行獅隧+紅隧。係紅隧到塞車塞到飛起，架車又勁拋。出到港島又行錯路，去左小西灣果邊先兜返上石澳，最後用左1個半鐘先到石澳。呢一程車搞到勁多人暈車浪，班老師都好多不滿，之後好似打左去旅遊車公司port佢。之後知道有班最遲出發既，但跟車阿sir比左$20個司機，即卡走去行大老山隧道+東隧，結果早我地15分鐘到！

終於都去到我唔想打日記既日子，以後唔會日日打...88

因為我地學校有好幾條友證實中左手足口病，所以今個禮拜乜活動都冇。今日既兩堂活動課就變左上地理，放左學之後好無奈咁行返屋企，都唔知幾時先至可以恢復返團契同課外活動。

十月最後果日，學校話中三同中四都有幾條友中左手足口病，果幾班全班都要戴口罩，其中一班仲有專用尿兜。就係果日，我地班有條友同某個帶菌者接觸。到左星期三，呢條友就冇出現係我地班房之中，但果時都未證實到佢係咪中招。到左今日上週會果時，見到三個老師拎住成幾疊口罩派比我地班，人人有份，永不落空。都知果條友九成九中招，上到班房，班主任仲話只係疑似個案，不過為左全校安全，所以我地要戴住個罩。臨小息果時，宣佈話取消團契，都已經冇癮。到午飯時間之前，再宣佈，話連聽日既課外活動都要取消。咁代表乜，代表又少左溝女既機會！真係好想搵到邊個人搞到我地廣泛傳染呢個病毒！

今日又要中史小測，測甲部課程既清代對邊境民族政策至乙部課程既中日甲午戰爭。四題選答兩題，預左佢鴉片戰爭、英法聯軍之役同中日甲午戰爭一定會出一題，所以完全冇溫左界部課程既野。好彩貼題冇貼錯，好順利咁做左兩題，段估40分入面會有21至22分左右。

又到左一年一度既萬駐節，不過今年略有不同，因為呢个係一个一號風球之下既萬聖節。不過，根據氣象圖，呢个風應該唔會吹正香港，頂龍比佢掛到三號風球。

今日重陽節，我10點半就要補習。補到12：30，27幾落去買飯盒食。5：15睇電視，其餘大多數時間都係打機。

今朝去左迎囍飲茶，飲完之後就出左街。去左鴨脷洲海怡半島吹風，然後坐671返鑽石山，係荷里活廣場食左个式泰星洲炒米，$25有一大兜炒米粉，兩串串燒同菜。