今日約左我表弟佢地去踩單車，我同老豆係大埔踩去馬鞍山同佢地會合，諗住玩一玩就去飲茶。當我地去到馬鞍山時，佢地已經話要飲茶，咁就去左間酒店果度飲。飲完之後，就同表弟佢地踩去沙田孖橋果度玩一玩先，點知臨到果時落雨，立即取消左呢個活動，佢地有佢地踩返屋企，我地有我地踩返大埔。去到馬料水果時，雨勢實左太大，於是係橋底果度避避雨，大約5分鐘之後再度出發。一路行車果時都有落雨，雨勢唔可以話好大，但亦都唔細。返到屋企落下個單車房果時，人又濕，單車又濕，仲濕過濕地公園，最後搵左塊布抹抹部車，希望聽日可以踩返我部私家車返學啦。

繼7月29日之後，今日又再一次參加九巴之友既活動。今次唔係再做善事，而係去中環參觀消防船。我地12：40係大埔坐車出美孚，因為果度有免費巴士車我地去中環。可是，去美孚足足用左個半鐘之前都未試過用要咁耐時間(73X係城隧口轉46X)。最後，我地係兩點先到集合地點，比原定集合時間遲左半小時，再遲少少就要自費坐車去中環。上左隻叫精英號既消防船，都幾拋下，不過真係好多野睇。睇左個幾鐘之後就坐車返美孚，然後行去長沙灣坐72返屋企，竟然比我坐中左係72線之中，可以講係一千零一架既普通巴士，一字寄之曰：正！

中五以黎既第一次課外活動係今日展開，但今日純粹係招募會員。朕身為呢個神經劇作家既高級榮譽幹事，梗係要落去幫手做招募啦。無奈既係，其他組別就好多人報，唔洗20分鐘就滿額，但係我地就得果四個人，仲要全部都係舊人。好難先搵到一個新人入黎，佢中三的，係個女仔，唔錯，都幾靚的。

今日表面上有好多功課，但全部都係星期一至交。為免浪費左時間，我無聊到走去做左份數學家課，因為聽日交到既話就可以加一分，星期一先交就冇分加。途中都遇到少少阻滯，有幾小題唔識做，真係諗過唔要果一分，當豪比阿sir。好可惜，呢幾題到最終都被本公子解決左，應該可以成功挽回上次失去既果一分。

今晚得閒到有時間打機，打打下機果時我老豆叫我唔好打住，話有野要我做，做完有$20既報酬。原來係要將一張陳年舊相修改，補返d損毀左既部份。好鬼煩，老豆剩下得把聲係度話點做點做，講到好易咁，又唔知做落去係幾咁難，結果搞到嗌交！

今日上到班房即卡開返个locker拎返本account書出黎，點知都係計唔到个死人balance sheet，平唔到條數。後尾幾經努力，又問人借黎抄考下咁，終於做啱多一題。另外果題，亦都係最煩果題，就係阿sir既督導之下，係3：50左右做晒。

預知今日有好多功課做，尋晚好醒目咁做左少少PA。果然不出所料，今日有econ、中史、宗教、數學同PA既功課，好慶幸尋日做左少少，今日先唔係做到凌晨時分。諗住今日可以唔洗帶本PA書返黎，因為都做得七七八八，可惜預計錯左，搞到依家就乜都做唔到，迫住要係聽日返去做返，或者問人借黎抄考。

今日一早坐姨丈架車去美孚，接我舅父去阿婆到拆床。但我同我老豆就冇去客家好棧飲茶，而係去左鴨寮街買野，順便係果度食早餐。買完野之後，丟返屋企先。於是由深水埗行去長沙灣坐72返屋企，11：55開車，到落時既時間係12：52。晚飯係阿姨屋企解決，然後我姨丈就揸車車佢豉油婆出機場喇。

今晚去完阿婆度返到屋企已經係10點幾，我阿媽既朋友無啦啦打黎，話有兩部單車，問我地要唔要。阿媽好爽口咁答應左，於是我地就去左翠怡花園拎車喇。部車都幾殘，就話比我舅父。但佢地一定要係聽日就要拎且，如果唔係將有好多問題發生。

令人最開心既晅期五又到喇，返到學校先醒起唔記得帶econ既file，好彩係食完lunch之後先有econ堂，咁就可以係lunch時間返去屋企拎返。今日又係果個乜鬼學生會選舉，今年得一個候選內閣，所以我扳左不信任一票。結果係係全校一千一百幾人之中，有七百幾條友投左信任票，有三百幾條友投左不信任票，個內閣咁就當選左。